ትግርኛ

ኣብ ስደትን ኣብ ዓድን እትርከቡ ፍቁራን ምእመናንን ምእመናትን። 

"ሕፃን ተወልደ ለነ ወልድ ተውህበ ለነ" ሕፃን ተወሊዱልና ወዲ ተዋሂቡና (ኢሳ 9:6)። ጐይታናን ኣምላኽናን ኢየሱስ ክርስቶስ ትንቢት ነቢያት፡ ፍጹም ንምግባር ኣብ ምዱብ ጊዚኡ፡ ካብ ሰማየ ሰማያት ወሪዱ ካብ ቅድስት ድንግል ማርያም ተወሊዱ፡ ብሥራት ሓጎስን ሓርነትን ዝለበስናሉ ዕለተ ልደተ ክርስቶስ (2001 ዓ.ም.ግእዝ) እንቋዕ ብደሓነ ሰላም ኣብጽሓና።

ዝለመንካዮ ዘይከልእ፡ ዝሓተትካዮ ዘይርስዕ ኣምላኽና፡ ዓሚ ናብዚ ዕለት’ዚ ንኸብጽሓና፡ ብዝለመናንዮን ዝሓተትናዮን ኣብዚ ቅዱስ ዕለት ኣብጺሑና ኣሎ። እዚ ሎሚ እነብዕሎ ዘሎና ዕለተ ልደት ክርስቶስ፡ ካብ ኩሉ በዓላት ፍሉይን ብሉጽን ዝገብሮ፡ ድኹም ስጋ ኃይል ዝለበሰሉ፡ ኃያል መለኮት ድማ ምስ ድኹም ሥጋ ዝተወሃደሉ ክቡርን ኣዝዩ ዓሚቕ መለኮታዊ ምሥጢር ዝኃዘ ዕለት እዩ።

እቲ ሰማይ ዝፋኑ ምድሪ መርገጽ እግሩ ዝኾነ ክርስቶስ፡ ኩሉ ክብሩ ገዲፉ ኣብ መብልዕ ማል ዝተወልደሉ፡ ብእስትንፋስ ኣድግን ላሕምን ዝሞቖሉ፡ ኣዝዮም ንዑቓት ዝበሃሉ ኅብረተ ሰብ ጓሶት ምስ መላእኽቲ ሓቢሮም ዝዘመሩሉ፡ ድኹምን ንዑቕን ዝተባህለ ካብ ሓመድ ዝተላዕለሉ ቅዱስ ዕለት እዩ። ጐይታናን መድኃኒናን ኢየሱስ ክርስቶስ ኣብቲ ጽንኩር ጊዜ ዘመን ጸልማት፡ ሰብ ንሰብ ኣራዊት ዝኾነሉ ዘመን፡ ቁሊሕ ኢልካ ረዳኢ ኣብ ዘይርከቦ እዋን፡ ብኽያት መሳኪን ሰሚዑ ምእንቲ ፍቕሪ ሰብ ካብ ሰማያት ወረደ።

ፍቁራን ምእመናንን ምእመናትን፡ በዚ ዕለት እዚ እምበኣር ኣብ ልቢ ኩላትና ክሰፍር ዝግብኦ ጉዳይ፡ እቲ ኣብ መብልዕ-ማል ዝኃደረ ክርስቶስ፡ ከምቲ ቅዱስ ሓዋርያ ጳውሎስ ዝተቐሶ "ንስኻትኩም ማኅደር መንፈስ ቅዱስ ቤት መቕደስ ሕያው ኣምላኽ ኢኹም" ዝተባህለ፡ ልብና ማኅደር ኣምላኽ ከም መብልዕ ማል ዝዓረፈሉ ክዓርፈሉ ክፉት ልቢ ንጹህ ሕልና፡ ቅኑዕን ሓቀኛን እምነት ሒዝና ደው እንብለሉ ዕለት እዩ።

ፍቁራን ምእመናንን ምእመናትን፡ ኣብዚ ጥልመትን ክሕደትን፡ ሓሶትን ጥበራን፡ ምትላልን ዓመጽን፡ ኲናትን ስንክልናን፡ ጥሜትን ስእነትን፡ ማእሰርትን ሞትን፡ ወረ-ኲናትን ስደትን ዝገነነሉ ሰዓት፡ ኣብ ሃይማኖትና ጸኒዕና ብእምነት ደው ክንብል ብፍቕርን ጸሎትን ክንነቅሕ ሓደራ ንብል።

ኣብ ቅድስት ኦርቶዶክሳዊት ቤተ ክርስቲያን ወሪዱ ዘሎ ሰይጣናዊ ፈተና፡ ብጸሎትን ምህልላን ክንፈትሖ፡ እግዚኣብሔር ንብፁዕ ወቅዱስ ኣቡነ እንጦንዮስ ርእሰ ሊቃነ ጳጳሳት ወፓትርያርክ ዘሃገረ ኤርትራ ብጥዕናን ሰላምን ክሕልዎም ብጸሎት ክንተግህ መንፈሳዊ መልእኽትና ነመሓላልፍ።

ደጊምና, ቅዱስ በዓል ልደተ-ክርስቶስ ይግበረልና። ኣሜን።
ቆሞስ ከሰተ ገብረሚካኤል,
ኣቦ መንበር ንኡስ ሃገረ ስብከት ሰሜን ኣሜሪካ።