“ንዓይ ግና ናብ ኣምላኽ ምቕራብ ይሕሸኒ….” (መዝ 73:28) ኣብ ትሕቲ ዝብል መሪሕ ጥቕሲ ንመበል 25 ዓመት ክካየድ ዝቀነየ ጉባኤ ኦርቶዶክሳዊት ተዋህዶ ቤተ ክርስቲያን ኤርትራ፥ መንበረ ጵጵስና ሰሜን ኣሜሪካ ብሰላም ተዛዚሙ፡፡ እቲ ጉባኤ ኣብ ከተማ ባፍሎ ኒውዮርክ ካብ ሓሙስ 3 ነሓሰ ክሳብ ሰንበት 6 ነሓሰ 2023 ዓ.ም እዩ ተኻይዱ። እግዚኣብሔር ረዲኡና ጉባኤና ካብቲ ዝተጸበናዮ ንላዕሊ ናይ በረኸት፣ ናይ ምጽንናዕ፣ ናይ ፍቕሪ ጉባኤ እዩ ነይሩ። ኣብ ነፍሲ ወከፍ መዓልቲ ብጸሎት ዝጀመረ መደባት ናይ ንጉሆ፣ ድሕሪ ቀትርን ምሸታዊ መደባት ተሰሪዑ እዩ ክካየድ ቀንዩ።

ኣቐዲሙ ሃገረ ስብከት ብዘውጽኦ መደብ መሰረት፣ እቶም ዝምህሩ በብዝተመደበሎም ግዜ መደባቶም ኣቕሪቦም። ከም ኩሉ እዋን: ናይ ሎሚ ዓመት መደባት ጉባኤ’ውን ኣብ ስብከት፣ ትምህርቲ፣ ሰሚናርን ጸሎትን ዘድሃበ ጉባኤ እዩ ኔሩ። ከምኡውን ህዝቢ ዝተሳተፎ ናይ ሕቶን መልስን ግዜ ኔሩ። መደባት ጉባኤ 2023 ብመገዲ tewahdo.TV ብቐጥታ ተመሓላሊፉ መደባት ናይ ነፍሲ ወከፍ መዓልቲ ድማ ስለ ሃገርናን ህዝብናን ብዝግበር ጸሎት ይዛዘም ኔሩ። 

ቀዳም 5 ነሓሰ 2023፥ መመረቕታ ቤተ ክርስቲያን ቅድስት ማርያም ባፍሎ ስለዝነበረ፡ ብድሮውን ሰናይ ዝኾነ ዋዜማን ጸሎተ ሰርክን ተጌሩ። “ሓነጽዋ ወሳረርዋ ለቤት ክርስቲያን” [ንቤተ ክርስቲያን ሰረትዋን ሃነጽዋን] ዝብል ጣዕመ ዜማ ዘለዎ ዋዜማ ተጌሩ። መመረቕታ ቤተ ክርስቲያን ቅድስት ማርያም ባፍሎ ስለዝነበረ፡ ብሓጎስን ብጸሎትን ተኻፋሊ ሓጎሶም ንምዃን ህዝቢ ካብ ዝተፈላለየ ቦታ እዩ ተጋቢኡ ኔሩ። ስለቲ ኣምላኽ ዝገበረልና ሰናይ ነገር’ውን ብሕብረት ንኣምላኽ ኣመስጊኑ። ኣዝዩ ግሩም ዝኾነ ህንጻ ቤተ ክርስቲያን ንኽውንኑ ንዘብቕዖም ኣምላኽ ስብሓት ይኹኖ፡፡ ነፍሳት ዝህነጻሉ ቤተ ክርስቲያን ክኸውን ድማ ጸሎትናን ሰናይ ትምኒትናን ንገልጽ፡

ሰንበት 6 ነሓሰ 2023፡ ዝነበረና ጉባኤ ብጸሎተ ቅዳሴ ተዛዚሙ። ኣስዒቡ፣ መንበረ ጵጵስና ሰሜን ኣሜርካ፥ ናይቲ ዝተገብረ ዕርቂ ክልተ ሃገረ ሰብከታት በጺሕዎ ዘሎ ደረጃን ንህሉው ኩነታት ቤተ ክርስቲያን ተዋህዶን ዝምልከትን ንህዝቢ መግለጺ ሂቡ። ከምኡ’ውን፡ እቲ ኣብ ኤርትራ ዘሎ “ሲኖዶስ” ነቲ ዝተጋህሰ ቀኖናዊ-ጌጋ ኣሪሙ ስለ ዕርቂ ክሓስብ፡ ፖለቲካዊ ሓይሊ-ኤርትራ ካብ ቤተ ክርስቲያን ተዋህዶ ኢዱ ከውጽእ፡ ቤተ ክርስቲያን ካብ ፖለቲካዊ ጸቕጢ ሓራ ክሳብ እትወጽእ፡ ምእመናን ብጸሎት ነቂሖም ኣብ እምነቶም ብጽንዓት ደው ክብሉ ኣተሓሳሲቡ።

ብጹእ ኣቡነ መቃርዮስ፡ ንምእመናን ማዕዳን ምትብባዕን ዝመልኦ መልእኽቲ ሂቦም። ንሶም፣ ቤተ ክርስትያን ካብ ፈተና ከምዘይትዓርፍ፣ ኣብ እዋን ፈተና ምእመናን መንፈሳዊ ዕጥቂ ዓጢቖም ኣብ እምነቶም ደው ክብሉ፣ ውሉደ-ክህነት ድማ ከም ኢያሱ ንህዝቢ ብትብዓት ክመርሑ ማዕዳ ሂቦም።

ብተወሳኺ፥ ብጹእ ኣቡነ መቃርዮስ፥ ብርክት ዝበሉ መንእሰያት፥ ብዝተፈላለየ መዓርገ-ዲቁና (ኣንበብቲ፡ መዘምራንን ንፍቀ-ዲቁናን) ቀቢኦም። በዚ ኣጋጣሚ፥ ነዞም ዝተቐብኡ ዲያቆናት ዘመን ኣገልግሎቶም ኪባርኽ ናብ ኣምላኽ ንጽሊ።

ብድሕሪኡ ኣጋይሽን ነበርትን በሓባር ናብቲ ዝተዳለወሎም ቦታ ብምእታው ነታ መዓልቲ' ብኣዴታት ቤተ ክርስቲያን ባፍሎ ዝተዳለወ ሽሻይ ተኻፊሎም። እግዚኣብሔር ፈቒድዎ ድማ በዚ መደምደምታ ናይቲ በዓል ኮይኑ።

ንኣቦና ቀሲስ ማርቆስ ደባስ፡ ካህን ቤተ ክርስትያን ቅድስት ማርያም ባፍሎ፣ ሰበኻ ጉባኤን ምእመናን ቤተ ክርስትያን ቅድስት ማርያም ባፍሎን፣ ኣጋይሽ ኣብ ምቕባልን ኣብ ዝተፈላለየ ካልእ ኣገልግሎት ዝዓየዩን ዘገልገሉን ኹሎም ምእመናን እግዚኣብሔር ዓስቦም ይሃቦም። ነተን "ኢድካ ዘቖርጥም” መግቢ ዘዳለዋ ኣዴታት ቤተ ክርስትያን ቅድስት ማርያም ባፍሎ፡ ኣምላኽ ኣዕዚዙ ይባርከን። ከምቲ ሳሙኤል "እግዚኣብሔር ክሳብ ኣብዚ ረድኣና ኢሉ ድማ ኤብን-ዔዘር ሰመዮ" (1 ሳሙ 7.12) ዝበሎ ንሕናውን እግዚኣብሔር ክሳብ ኣብዚ ረዲኡ ጉባኤና ብሰላም ኣፈጺሙና እዩ'ሞ "ኤብን-ዔዘር" ንብል።

እግዚኣብሔር ንቤተክርስቲያንናን ህዝብናን ሰላሙ ይሃብ!

ኣምላኽ ንብጹኣን ኣቦታትና፡ ብጹዕ ኣቡነ መቃርዮስን ንብጹዕ ኣቡነ ሲኖዳን ዕድመን ጥዕናን ይሃቦም። ኣሜን።

መንበረ ጵጵስና ሰሜን ኣሜርካ

10 ነሓሰ 2023

ዝርዝር መደባት ፕሮግራም መበል 25 ዓመታዊ ጉባኤ -CONFERENCE 2023 PROGRAM DETAIL