ብቕድስቲ ቤተ ክርስትያንና፡ ብአቈጻጽራ ግእዝ ካብ መስከረም 9 ክሳብ 15 ዘሎ ሳምንቲ “ፍረ” ተባሂሉ እዩ ዚጽዋዕ። እቲ ተስሪዑ ዘሎ መዝሙርን ምስባክን ንባባትን ኵሉ’ውን ፍረ ጠቀስ እዩ። አብ ዝሓለፉ ናይ ክራማት ንባባትና ብዛዕባ “ምስላ ዘርእን ዘራእን፡” ከምኡ ድማ “ምስላ ስርናይን ክርዳድን” ከም ዝተመሃርና ዚዝከር እዩ።

እዚ ኸም መሪሕ ጥቕስና ተጠቒሱ ዘሎ ኽፋል ጥራይ ዘይኰነ እቲ ልዕል ኢሉ አብ ማር 4፡26-29 ተጠቒሱ ዘሎ “መንግስቲ አምላኽ ዘርኢ አብ ምድሪ ኸም ዚዘርእ ሰብአይ እያ። ንሱ ለይትን መዓልትን ይድቅስን ይትንስእን። እቲ ዘርኢ ድማ፡ ንሱ ኸይፈለጦ፡ ይበቍል ይዓብይውን፡ እታ ምድሪ ባዕላ ትፈርይ ቅድም ጮማ ብቚሊ፡ ድሐር ሰዊት (ዘለላ) አብቲ ሰዊት (ዘለላ) ድማ ብጹሕ ስርናይ (ይፈርይ)። (እቲ ስርናይ) ምስ በጽሐ፡ ቀውዒ ኣትዩ እዮ’ሞ፡ ማዕጺዱ ይስደድ።” ብምንባል፡ ዝምድና ምዕባይን ምፍራይን ብንጹር ስእሊ ገሊጹልና አሎ። ምዕባይ እንተ ዘየልቦ፡ ምፍራይ ከቶ ኺህልው አይክእልን እዩ። እዚ ሓቂ እዚ አብ ኵሎም ህይወታውያን እንስሳታትን አትክልትን ሰብን ብማዕረ ዝተረጋገጸ እዩ። ኣብቲ ፍጥረታዊ ዓለም ጥራይ ዘይኰነ፡ አብቲ መንፈሳዊ ዓለምውን ዝስርሕ ሓቂ እዩ። እዚ ሳምንቲ እዚ ድማ ምድሪ ፍሪአ እትህበሉ ጊዜ ብምዃኑ ንአምላኽ ከነመስግንን፡ ብዛዕባ’ቲ ንሕና ኸም መንፈሳውያን ግራት ከነፍርዮ ዚግብአና ፍረውን ከነስተንትንን ርእስና ኽንምርምርን ዝተሰርዓልና እዩ። ምኽንያቱ ጐይታና ዀነ ቅዱሳን ሃዋርያቱን ብዛዕባ ህይወትና ብግራት መሲሎም ምሂሮምና እዮም። እቲ ሃዋርያ ጳውሎስ፡ “አነ ተኸልኩ፡ አጵሎስ ኣስተየ፡ አምላኽ ግና አብቈለ። እምበአርሲ እቲ ዜብቍል አምላኽ ደኣ እዩ እምበር፡ እቲ ዚተክል ወይስ እቲ ዜስትይ ዚዓብስዎ የብሎምን።. . . ንሕና መዓይይቲ አምላኽ ኢና፡ ንስኻትኩም ግራት አምላኽ፡ ህንጻ አምላኽ ኢኹም”። ዝበሎ ቓል ንሕና ግራት አምላኽ ምዃንና ብንጹር ዜርእየና እዩ (1ቈረ 3፡6,7,9)። ስለዚ ኸም ግራት አምላኽ መጠን ነቲ አባና ዝዘርኦ ቓሉ አብቍልና፡ ኣዕቢና፡ አፍሪና ኽንመልስሉ ሰብ ሕድሪ ኢና።

ካብኡ ሓሊፍውን፡ ከምቲ ጐይታ ባዕሉ ንርእሱ ብጉንዲ ወይኒ ዝመሰል፡ ንኣና’ውን ብተኽሊ ወይንን ብኦም በለስን አውልዕን’ውን ይምሰለና እዩ።፡ ንአብነት ብሓፈሻ ንህዝቢ እስራኤል አመልኪቱ፡ አብ ትንቢት ኢሳያስ፡ “እቲ አታኽልቲ ወይኒ ናይ እግዚአብሔር ጐይታ ሰራዊትሲ ቤት እስራኤል፡ እዩ። እቲ ተኽሊ ደስታኡ ኸአ ሰብ ይሁዳ እዮም።” ብምባል አረጋጊጹልና ኣሎ (ኢሳ 5፡7)። ሊቀ መዘምራን አስፋውን “ጒንዲ ወይኒ ኻብ ግብጺ ኣውጻእካ፡ ኣህዛብ ሰጒጒካውን ተኸልካያ።” ኢሉ አሎ (መዝ 80፡8)። አስዒቡ ብዛዕባ ህዝቡ ኺጽልይ ከሎ ድማ፡ “ዎ ኣምላኽ ሰራዊት፡ ተመለስ፡ ካብ ሰማይ ኣንቈልቊልካ ርኤ፡ እንሆ ኸኣ ነዛ ወይንን፡ ነዛ የማነይትኻ ዝተኸለታ ኦምን፡ ነቲ ንኣኻ ኢልካ ዘጽናዕካዮ ጨንፈርን ብጽሓዮም።” ኢሉ ናብ አምላኽ ተማሕጸነ (መዝ 80፡14,15)። ስለዚ እንተ ኸም ግራት እንተ ኸም ተኽሊ፡ ብምዕባይ ፍሬኻ ናይ ምብዛሕ ሓላፍነት ከም ዘሎና ኽንዝንግዖ ኣይግባእን።

ገና አብ ደረጃ ሳዕሪ ወይ ጮማ ብቚሊ ዘሎ ዘርኢ ስርናይ ፍሬ ኺህብ አይክእልን እዩ፡ ዋላ ዘለላ አውጽኡ ምፍራይ አብ ዚጅምረሉ ጊዜውን ከምኡ፡ ፍረ ኽትጽበዮ አይከኣልን እዩ። ስለዚ እቲ ዘርኢ ፍረ ኽህበካ ዚኽእል፡ ብመንጽር እቲ ዝተተኽለሉ ጊዜ እናዓበየ ምስ ዚኸይድ እዩ። እንተ ብስእነት ማይ እንተ ብዋሕዲ መአዛዊ ማዕድናት ከይዓብየ ምስ ዚተርፍ ግና ፍረ ኺህብ አይክእልን እዩ። እታ ፍረ አድሪ ካብ ኵሉ ዓይነታት ዘርኢ አሕምልቲ ኣዝዩኣ ዝነአሰት ክነሳ፡ ዕብየት ስለ ዘይተቋርጽ ናብ ደረጃኦም ዓብያ ካብታ ፍረ አድሪ ብተዓጻጻፊ ንዚዓብያ ሓያሎ አዕዋፍ እንዳን መጽለሊትን ክትከውን ትበቅዕ። እቶም ዝዓብዩ ዘርኢ አሕምልቲ ግን ሓጺር ናይ ዕብየተ ዓቕሚ ስለ ዘለዎም፡ ንኻልኦት ህይወታውያን ኪጸሩን ኬጽልሉን ኣይክእሉን እዮም።

ጐይታ በዚ ኽልተ ምስላታት ገይሩ ዘየቋርጽ ዕብየት ብምዕባይ ንፍሬና ኽነብዝሕ ምዒዱና አሎ። ብአካል እናዓብና ኽንካይድ ከሎና እናደልደልና፡ ናይ ምግባር ዓቕምና እናወሳኻ፡ ፍሬና ድማ እናበዝሐ ኸም ዚኸይድ፡ አብ መንፈሳዊ ህይወትናውን እናዓበና ምስ እንኸይድ ኢና ንፍሬና እነብዝሖ። ሃዋርያ ጴጥሮስ “እግዚአብሔር ሕያዋይ ምዃኑ ጥዒምኩም እንተ ዄንኩምሲ፡ ብእኡ ንምድሓን ምእንቲ ኽትዓብዩ፡ ከምቶም ሕጂ እተወልዱ ህጽናት ነቲ ሕዋስ ዘይብሉ መንፈሳዊ ጸጋ ብሃግዎ።” ብምባል ምድሓና’ውን እናዓበየ ኪኸይድ ከም ዚግብኦን፡ ምሉእን ቅልጡፍን ዕብየት ንምዕባይ’ውን ሕዋስ ዘይብሉ መንፈሳዊ ጸባ ማለት ሕዋስ ዘይብሉ ቃል እግዚአብሔር ክንምገብ ከም ዚግብኣና አመልኪቱና ኣሎ (1ጴጥ፡ 2-3)።ስለዚ ድማ ሃዋርያ ጳውሎስ “ብአምላኽ ተደሪኽና ብገርህነት ኣብ ቅድሚ አምላኽ ብክርስቶስ ኬንና ንዛረብ አለና እምበር፡ ከምቶም ብዙሓት ንቓል አምላኽ ዚሓዋውሱ አይኰንናን።” ብምባል ተአመነ (2ቈረ 2፡17)።

ሃዋርያ ጳውሎስ ነቲ መራሕነት ቤተ ክርስትያን ኤፌሶን ዝተረከበ መንእሰይ ጢሞቴዎስ ብኸመይ አብ ውልቁ ህይወቱ ዀነ አብ አገልግሎቱ ዕውት ከም ዚኸውን “ነቶም አመንቲ ብቓል፡ በካይዳ፡ ብፍቕሪ፡ ብእምነት ብንጽህና’ውን ኣርአያ ዂኖም እምበር፡ ነታ ንእስነትካ ሓደ እኳ ኣይንዓቃ። ኣነ ኽሳዕ ዝመጽእ ናብ ምንባብን ምምዓድን ምምሃርን አቕልብ፡. . . ነዚ አጸቢቕካ ሕሰብ፡ እናወሰኽካ ከም ዘለኻ፡ አብ ኵሉ ምእንቲ ኺግለጽሲ፡ ነዚ ነገር’ዚ ብምሉእ ርእስኻ ወፍይ።” ብምባል ጸሓፈሉ (1ጢሞ 4፡ 12,13,15)። ስለዚ ንሓደ ብዙሕ ብምፍራይ ንአምላኽ ኬኽብር ዘንቀደን ዝተዓጥቀን ክርስትያን፡ ብዛዕባ እናዓበካን እናወሰኽካን ምኻድ ብዕምቈት ኪሓስበሉን ኪግደሰሉን፡ ካብኡ ሓሊፉ ድማ ብምሉእ ፍቓዱን ዓቕሙን ኪውፈየሉ ናይ ግድን እዩ። ከምኡ ስለ ዝዀነ ድማ “. . .  ተማቐልቲ እቲ አምላኻዊ ባህርይ ምእንቲ ክትኰኑ፡ብትግሃት ዘበለ ተጋደሉ።አብ እምነትኩም ደግነት ወስኹ አብታ ድግነትውን ፍልጠት (ወስኹ)፡ ኣብታ ፍልጠት ከኣ ምግታእ ርእስኻ (ወስኹ)፡አብቲ ምግባእ ርእስኻ ድማ ዓቕሊ ኣብቲ ዓቕሊውን ፍርሃት እግዚአብሄር፡ ኣብ ፍርሃት እግዚአብሄር ድማ ምፍቃር ኣሕዋት፡ አብቲ ምፍቃር ኣሕዋት’ውን ፍቕሪ ንዂሉ ሰብ (ወስኹ)፡ እዚ ነገር’ዚ እንተ አሎኩም፡ እናማዕበለ’ውን እንተ ኸደ፡ ንምፍላጥ ጐይታና ኢየሱስ ክርስቶስ ሃካያትን ዘየፍርዩን ክትኰኑ ኣይሓድገኩምን እዩ።” ተባህለልና (2ጴጥ 1፡4-8)፡ እምበአር ካብዚ ቓል እዚ ኸም እንርድኦ፡ ካብቲ ባህርያት አምላኽ ነቲ ዘዝጐደለካ ክትውስኽ፡ ነቲ ዘዝወሰኽካዮ ድማ እናአብዛሕካዮ እናማዕበልካዮን ክትከይድ ይግባእ። ንአብነት እቲ ዘይነበረካ እሞ ዝወሰኽካዮ ባህርይ ፍቕሪ እንተ ዀይኑ እቲ መጠን ናይ ፍቕሪኻ እናወሰኻ ኪኸይድ፡ ከምቲ ክርስቶስ ጐይታና ናይ ህይወቱ ምእንታና በጃ አሕሊፉ ኽሳዕ ምሃብ ዘፍቀረና፡ ንሕና ድማ ህይወትና ነቶም ዘፍቀርናዮም ህይወትና ምእንቲኦም በጃ ክንገብር ክሳዕ እናኽእል ፍቕርና እናዓበየ ኪኸይድ ይግብኦ ማለት እዩ (1ዮሃ 3፡16)። ቅድሚ ሕጂ ንዘይበደለና ሓውና ጥራይ ከነፍቅር እንተ ጸኒሕና፡ ሕጂ ግና ዋላ እናበደለና ኸሎ’ውን እቲ ፍቕርና እንተ ቐጺሉ እንተ ዘይጐዲሉ፡ አረ ኻብኡ ሓሊፉ ፍቕርና መሊሱ እንተ ወሲኹ፡ ሽዑ ብፍቕሪ እናዓበና ንኸይድ ከም ዘሎና ምሉእ ብምሉእ ርግጸኛታት ክንከውን ንኽእል ኢና። ንዚፈትውና ጥራይ ነፍቅር እንተ ዄንና ግና እዚ ፍቕሪ ዓለም እምበር ፍቕሪ ክርስቶስ ኣይኰነን። እቲ ፍቕርና ዝተማልአ ዕብየት የርእይ ከም ዘሎ እንፈልጥ፡ እቲ አብ 1ቈረ 13፡4-7 ተዘርዚሩ ዘሎ ባሕርያት ፍቕሪ ዂሉ ይማላእ እንተ’ልዩ እዩ።ብትዕግስቲ እንተ ዀነ’ውን ልክዕ ከምኡ ኽንዓብይ ይግብአና። ቅድሚ ሕጂ ንእሽቶ በደለ እንተ ወሪዱና፡ ዕጽፊ እንምልስን እንጸልእን እንቕየምን ሰባት ዝነበርና፡ቍሩብ ትዕግስቲ ምስ አጥረና፡ ዕጽፊ ኻብ ምምላስ ብኽንደይ ገድሊ ርእስና ንዓግት፡ አብ ውሽጥና ግን ጓሂ ይስምዓና፡ ነቲ ሰብ ዝነበረና ፍቕርን አኽብሮትን ግን ይጐድል። ትዕግስትና እናዓበየ እንተ ኸይዱ ግና፡ እቲ ብኽንደይ ገድልን ጓህን እንዕገስ ዝነበርና፡ ብቐሊሉን ብሓጐስን ክንዕገስ የኽእለና ካብ ትዕግስቲ ክርስቶስ ዝበዝሐ ተኻፊልና ንትዕግስትና እንተአብዚሕናዮ ግና፡ የማናይ መልትሕና ንዝወቕዓና ነታ ጸጋመይቲውን ነዳልወሉ፡ ነቲ ቐምሽና ኺወስድ ዚማጐተና እታ ኽዳንናውን ንሓድገሉ፡ ማለት ተወሳኽን ዝኸበደን በደል ንምቕባል ድሉዋት ንኸውን። ነቲ ንሱ ዜሕድገናን ዚብድለናን ዘሎ ዘይኰነስ፡ ነቲ ክርስቶስ ዜካፍለና ዘሎ ባህርያቱን ነቲ ንሱን ትዕግስትና አዳልይዎ ዘሎ ኽብረትን ብምርአይ ንሕጐስን ንጸናንዕን ማለት እዩ። ትዕግስትካ ፍቕርኻ ወዘተ አብቲ መባእታዊ ደረጃ (አብቲ ደረጃ ጮማ ብቚሊ) ደው እንተ ኢሉ ግና፡ እቲ ዚድለይ ፍረ ኣይህብን እዩ። ዘየፍርይ ዘበለ ዂሉ ድማ ተቘሪጹን ተዓጺዱን ናብ ሓዊ እዩ ዚድርበይ። ህይወትና፡ ልክዕ ከምታ ፍረ አድሪ፡ ብዘይ ደረት እንተ ዓብዩ ግና፡ ፍሬና ይበዝሕ፡ ካባና ንዚኸብዱ ኵነታትን ሰባትን ክንጸውርን ክንዕገስን ንኽእል። እናዓበና ብዝኸድና መጠን ንክርስቶስ ናብ ምምሳል ኢና እንዓብይ። ንክርስቶስ ብባህርያትና ብዝያዳ እናመሰልናዮ እንተ ኼድና ድማ ኵሉ እቲ ሓሳባትናን ቓላትናን ተግባራትናን ልክዕ ነቲ ናቱ ይመስል፡ ብአገግሎትና ዀነ ብህይወትና፡ ከምታ ፈራዩት ወይኒ ዙብ ኢልና ንፈርይ፡ እግዚአብሄር ኣቦን ወልድን መንፈስ ቅዱስን ከአ ኣባናን ብአናን ይኸብሩ። ከይዓበና፡ ዕድሜና ምሉእ አብ መፍንሳዊ ቚልዕነት ተደሪትና እንተ ነበርና ግና ፍረ- መንፈስ፡ ፍረ ጽድቂ ዘይርከበና፡ ንመርገም እተቓላዕና፡ ንጥፍአት ዝተመደብና ዓያሱ ኢና እንኸውን’ሞ ብዕብየት ፍሬና ንምብዛሕ አጸቢቕና ንሕሰብ ምሉእ ሓይልናን ርእስናን ድማ ንወፍየሉ።

ጸጋ ጐይታና ኢየሱስ ክርስቶስን ፍቕሪ ኣምላኽን ሕብረት መንፈስ ቅዱስን ምስ ኩላትና ይኹን።

ኤርትራዊት ቤተ ክርስቲያን ተዋህዶ: መንበረ ጵጵስና ሰሜን ኣሜሪካ