ኣብዚ ናይዚ ዕለት ንባብ ወንጌልን ካልኦት ንባባትን ብዛዕባ እቲ ዝሓለፈ ሰንበት ዘብዓልናዮ በዓለ መንፈስ ቅዱስ ዚምልከቱ እዮም። እቲ ንምእመናንን ኣገልገልትን ዚወሃብ መንፈስ ቅዱስ ኣብዚ ዓለም ብህይወት ክሳዕ ዘሎና ጥራይ ዘይኰነስ ኽሳዕ ዘለኣለም ምሳና ዚነብር እዩ። እዚ መንፈስ‘ዚ ድማ ብክርስቶስ ንዚኣምንን ንዚስዕብን ኵሉ ዚወሃብ ምዃኑ ቓሉ ኣረጋጊጹልና እዩ። እቲ ኣብ ውሽጥና ዚነብር ቅብኣት (መንፈስ ቅዱስ) ኵሉ ጊዜ ይምህረናን ይመርሓናን እዩ።

ንውልቃዊ ህይወትና ኸም ዚምህረና፡ ንኻልኦት ሰባት ምሂርና ኣብቲ ሓቅን ኣብቲ መገድን ጸኒዕና ምሉእ ህይወት ክንረክብ’ውን ይድግፈና እዩ። ኣብ ዮሃ 6፡12-14 ጐይታና ባዕሉ፡ “ዝነግረኩም ብዙሕ ካልእ ዘረባ ገና ኣሎኒ፡ ግናኸ ሕጂ ክትጾርዎ ኣይትኽእሉን ኢኹም። እቲ መንፈስ ሓቂ ምስ መጸ ግና፡ ንሱ ዝሰምዖ ዘበለ እዩ ዚዛረብ እምበር ካብ ርእሱ ኣይዛረብን እዩ እሞ፡ ንሱ ነቲ ዚመጽእ ኬፍልጠኩም፡ ናብ ኵሉ ሓቂ’ውን ኪመርሓኩም እዩ። ንሱ ካባይ ኪወስድን ኪነግረኩምን እዩ እሞ፡ ንኣይ ኬኽብረኒ እዩ።” ብምባል እቲ ኣባና ዚሓድር መንፈስ ቅዱስ እንታይ ከም ዚሰርሕ ገሊጹልና ኣሎ። ስለዚ ናይ መንፈስ ቅዱስ ዝዓበየ ስራሕ ብኣና ብዅለንትናና ገይሩ ንኽርስቶስ ምኽባር እዩ፡ ካብቲ ኵሉ መዝገብ ጥበብን ፍልጠትን ዝዀነ ክርስቶስ እናወሰደ ይምህረናን ናብ ምልኣት ሓቂ ይመርሓናን። ስለዚ ድማ ጐይታ፡ “መገድን ሓቅን ህይወትን ኣነ እየ፡ ብዘይ ብኣይ ሓደ እኳ ናብ ኣቦ ዚመጽእ የልቦን” ብምባል መንፈስ ቅዱስ ናብኡ፡ ንሱ ድማ ናብ ኣቦ ከም ዚመርሓና ገለጸልና። መንፈስ ቅዱስ ኣባና እንተ ዘይሓደረ ነቲ ናይ ክርስቶስ ምስጢር ክንርድኦ ዀነ ኽንጾሮ ኣይንኽእልን ኢና። “ግናኸ እንተ ኸድኩ ኸም ዜሕሸኩም ሓቂ እነግረኩም ኣለኹ። ኣነ እንተ ዘይከድኩስ እቲ መጸናንዒ ናባኻትኩም ኣይመጽእን እዩ።” ኢሉ ጐይታና ዝተዛረበሉ ምኽንያት፡ ንሱ እንተ’ልዩ ዚጐደለና ነገር ከም ዘሎ ንምምልካት ዘይኰነስ፡ መንፈስ ቅዱስ እንተ ረዲኡናን እንተ መሪሑናን ጥራይ፡ ነቲ “ናብ (ምሉእ) ፍልጠት ወዲ ኣምላኽ ናብ እኹል ሰብኣይ ናብ ልክዕ ምልኣት ብጽሕና ክርስቶስ ምዕባይ” ከም እንበቕዖ ምእንቲ ኼብርሃልና እዩ (ዮሃ 16፡17 ኤፌ 4፡11-13)።

ካብተን ጐይታና፡ “ኣነ እየ” ዝበለለን መለኮታዊ መንነቱ ዝገለጸለን ጥቕስታት ሓንቲ እዛ መገድን ሓቅን ህይወትን ምዃኑ ዝገለጸላ ጥቕሲ እያ። ናብ ሓደ ኽትበጽሖ ዝደለኻ ምዕራፍ ንምብጻሕ እትጐዓዘሉ መገዲ ኺህልወካ ናይ ግድን እዩ። ንሕና ሰባት ናብ እግዚኣብሄር ኣቦ እንበጽሓሉ መገዲ ድማ ክርስቶስ እዩ። ብዘይ ክርስቶስ ናብ እግዚኣብሄር ኣቦ ኺበጽሕ ዚኽእል የልቦን። ጐይታና፡ ኣብቲ ናይ ከረን ስብከቱ፡ ወዲ ሰብ ኪጐዓዘለን ብዛዕባ ዚኽእል ክልተ ዓይነት መገዲ፡ ኣብ ማቴ 7፡13,14 “እታ ናብ ጥፍኣት እትወስድ ደገ ርሕብቲ፡ መገዳ’ውን ግፋሕ እያ። እቶም ብእኣ ዚኣትው ድማ ብዙሓት እዮም። እታ ናብ ህይወት እትወስድ ደገ ግና ጸባብ መገዳ’ውን ቀጣን እያ፡ እቶም ዚረኽብዋ ኸኣ ሒደት እዮም እሞ፡ በታ ጸባብ ደገ እተው።” ብምባል ገሊጹ ኣሎ። ኣብዛ ጥቕሲ ሰለስተ ኣገደስቲ ነጥብታት ተጠቒሰን ኣለዋ፡ ንሳተን ከኣ መገድን ደገን ህይወትን እየን። በታ ቐጣን መገዲ ዝተጓዕዘ ዘበለ፡ ናይ ግድን ናብታ ጸባብ ደገ እዩ ዚበጽሕ። እቲ በታ ጸባብ መእተዊት ደገ ኺሓልፍ ዝተኸፍተሉ ዘበለ ዅሉ ድማ ናብ ህይወት እዩ ዚኣትው። እዚ ብቐጢን መገዲ ተገሊጹ ዘሎ ጐይታና ባዕሉ እዩ። እቲ ብጸባብ ደገ ተገሊጹ ዘሎ ንሱ ምዃኑ’ውን ኣብ ዮሃ 10፡7,9 “እቲ ደገ ኣባጊዕ ኣነ ኸም ዝዀንኩ፡ ብሓቂ ብሓቂ እብለኩም ኣሎኹ። . . . እቲ ደገ ኣነ እየ። ብኣይ ዚኣትው ኪድሕን፡ ኪኣቱን ኪወጽእን መጓስዩ’ውን ኪረክብ እዩ።” ብምባል ኣፍሊጡና ኣሎ። ኣብታ ቐጣን መገዲ ዘይተጓዕዘ ሰብ ኣብታ ጸባብ ደገ ኺበጽሕ ኣይክእልን እዩ። ከም መገዲ ተጓዒዝካሉ ሓሊፍካዮስ ኣብታ መእተዊት ደገ ምስ በጻሕካ ኣብኡ’ውን ሓሊፋ ደገ ዀይኑ እዩ ዚጸንሓካ። በታ ቐጣን ከይተጐዓዝካ ዝገበርካ ጌርካ ኣብታ ደገ በጺሕካ እንተ ዃሕኳሕካ’ውን፡ ዚኸፍተልካ ኣይህልውን እዩ። ነዚ ንምግላጽ ድማ፡ ጐይታና ሉቃ 13፡24-27 “ብዙሓት ኪኣትው እናደለዮስ ከም ዘይኰነሎም፡ እብለኩም ኣለኹ እሞ፡ በታ ጸባብ ደገ ንምእታው ተጋደሉ። ብዓል ቤት ተንሲኡ ማዕጾ ምስ ሸጐረ፡ ሽዑ ኣብ ወጻኢ ደው ምባል ክትጅምሩ፡ “ጐይታይ፡ ጐይታይ፡ ክፈተልና’፡ እናበልኩም ማዕጾ ዃሕኳሕ ከተብሉ ኢኹም። ንሱ ኸኣ፡ ‘ካበይ ምዃንኩም ኣይፈልጠኩምን እየ’ ኢሉ ኼምልሰልኩም እዩ። ሽዑ ‘ኣብ ቅድሜኻ በሊዕናን ሰቲናን፡ ንስኻውን ኣብ ገዛና ምሃርካ’ ምባል ክትጅምሩ ኢኹም። ንሱ ኸኣ፡ ኣቱም ገበርቲ ዓመጻ ዅላትኩም፡ ካበይ ምዃንኩም ኣይፈልጠኩምን እየ’ሞ ካባይ ርሓቝ’ ኪብል እየ።” ብምባል ኣብሪሁልና ኣሎ። እቲ ኣብታ መገዲ ዘይተጓዕዘ፡ ኣብ ክርስቶስ ዘይተረኽበን ብእኡ ዘይመጸን፡ ኣብቲ ኣፍ ደገ ኣይሰልጦን እዩ። ነቲ ኣብታ መገዲ ዘይፈለጦ፡ ኣብታ ደገ’ውን ኣይፈልጦን እዩ። ሃዋርያ ቅዱስ ጳውሎስ፡ “ስለዚ ኣሕዋተይ፡ ሳላ ደም ክርስቶስ (ናብቲ እግዚኣብሄር ዘለዎ ናብ ቅድስተ ቕዱሳን ዜእትው እምንቶ (ወይ ትብዓት) ረኺብና ኢና። እንኣትዎ ኸኣ በቲ መጋረጃ፡ ማለት ብስብነቱ (ብናይ ክርስቶስ ሰብነት) ዝተኸፍተ ሓድሽን ህያውን ዝዀነ መገዲ ኣቢልና ኢና።” ኢሉ ዝጸሓፎ ቓል፡ እቲ ናብ ኣቦ እንኣትወሉ ህያው መገዲ፡ ክርስቶስ ምዃኑ ኣመልኪቱና እዩ (እብ 10፡19,20)። ነቶም ካብ ዓሌት ኣህዛብ ዝዀኑ ኣረማውያን ዝነበሩ ሕጂ ግና ብክርስቶስ ዝኣመኑ ሰብ ኤፌሶን፡ “በቲ ዘመን እቲ ብዘይ ክርስቶስ ከም ዝነበርኩም፡ ካብ ሕብረት እስራኤል ፍሉያት፡ ነታ ኺዳን ተስፋ’ውን ኣጋይሽ፡ ትጽቢት ዘይብሎም፡ ኣብዛ ዓለም እዚኣ ብዘይ ኣምላኽ ከም ዝነበርኩም ዘክሩ። ሕጂ ግና ኣቱም ቀደም ርሑቓት ዝነበርኩም፡ ንስኻትኩም ብክርስቶስ ኢየሱስ ብደሙ ቐረብኩም።” ብምባል ናብ ኣቦ ዝቐረቡሉ ምስጢር ገለጸሎም (ኤፌ 2፡12,13)። ብዘይ ክርስቶስ እንተ ዄንካ ኻብ ኣምላኽ ርሑቕ፡ ኣብ ክርስቶስ እንተሊኻ ግና ቀረባ ኣምላኽ ኢኻ እትኸውን። ሃዋርያ ጳውሎስ፡ “ብእኡ (ብክርስቶስ) ከኣ ናብዚ ዘለናዮ ጸጋ ብእምነት ምእታው ረኺብና፡ ብተስፋ ኽብሪ ኣምላኽውን ንምካሕ ኣሎና። . . . ስለዚ ድማ ነቶም ብእኡ ኣቢሎም ናብ ኣምላኽ ዚመጹ፡ ኵሉ ጊዜ ምእንታኦም ኪልምን ንዚነብር ስለ ዝዀነ፡ ፈጺሙ ኼድሕኖም ይኽእል እዩ።” ብምባል ነዚ ሓቂ እዚ ኣረጋጊጹልና እዩ (ሮሜ 5፡2 እብ 7፡25)።

እቲ ንክርስቶስ ዚኣምንን ብእኡ ዚመላለስን እዩ ነቲ ፍልጠት ሓቂ ዚረኽቦ። ምኽንያቱ ዅሉ ሓቂ ኣብቲ መዝገብ ጥበብን ፍልጠትን ዝዀነ ክርስቶስ እዩ ዘሎ (ቈሎ 2፡3)። ጐይታና ኣገዳስነት ሓቂ ንምግላጽ፡ ነቶም ብእኡ ዝኣመኑ ኣይሁድ “ንስኻትኹም ኣብ ቃለይ እንተ ጸናዕኩም፡ ብሓቂ ደቀ መዛሙርተይ ኢኹም፡ ንሓቂ ኽትፈልጥዋ ኢኹም፡ እታ ሓቂ ድማ ሓራ ኸተውጽኣኩም እያ።” ኢሉ ገለጸሎም (ዮሃ 9፡31,32)። ሓቂ ካብ ሓጢኣት እያ ሓራ እተውጽእ። እቲ ኻብ ሓጢኣት ሓራ ዝወጸ ድማ፡ ካብ ፍርድን ቍጥዓን ናይ ኣምላኽ ሓራ ይወጽእ ማለት እዩ። ከምቲ፡ “ቍጥዓ ኣምላኽ ካብ ሰማይ ኣብ ረሲእነትን ዓመጻ ዘበለ ዅሉን፡ ነቲ ሓቂ ብዓመጻ ኣብ ዚኸድንዎ ሰባት ይግለጽ እዩ።” ዚብል ተጻሒፉልና ዘሎ፡ ብግብሪ ዓመጻ ምምልላስ፡ ነታ ሓቂ ኽትደፍናን ከተጥፍኣን ምፍታን እዩ። እግዚኣብሄር በቶም ንሓቂ ዚደፍንዋ ኣዝዩ ዚቝጥዓሉ ምኽንያት፡ ንሓቂ ምድፋን ማለት ንኣምላኽ ምድፋን ማለት ስለ ዝዀነ እዩ። ምኽንያቱ እግዚኣብሄር ባዕሉ ሓቂ እዩ። ከምቲ ክርስቶስ ሓቂ ዝዀነ ኣብን መንፈስ ቅዱስንውን ሓቂ እዮም። ስለዚ ድማ “ኣምላኽ ሓቂ፡ መንፈስ ሓቂ” ተባሂሎም ይስመዩ። ጐይታና ንጲላጦስ፡ “ኣነ ንሓቂ ኽምስክር፡ ምእንት’ዚ ተወለድኩ፡ ምእንትዚ’ውን እየ ናብ ዓለም ዝመጻእኩ፡ ካብ ሓቂ ዝዀነ ሰብ ከኣ ድምጸይ ይስምዕ እዩ።” ኢሉ ምስ ተዛረቦ፡ ተገሪሙ፡ “ሓቂ እንታይ እዩ. . . ኢሉ ሓተቶ (ዮሃ 18:37,38)። ወንጌላዊ ዮሃንስ፡ ብዛዕባ ጐይታ “እቲ ቓል ስጋ ዀነ፡ ጸጋን ሓቅን መሊእዎ ኸኣ ኣባና ሓደረ . . . ሕጊ ብሙሴ ተዋህበ ጸጋን ሓቅን ግና ብኢየሱስ ክርስቶስ መጸ።” ብምባል መስኪሩሉ ኣሎ (ዮሃ 1፡14,16,17)። በቲ ሓቂ ዝዀነ ክርስቶስ ብምእማን፡ ካብ ሓቂ ዝዀነ ዅሉ፡ ክብሪ ኣምላኽ ኪርእይ ኣብቲ ክርስቶስ ዘለዎ ድማ ኪኸውን እዩ። ከምቶም፡ “ሓቂ ኣብ ኣደባባይ ወዲቑ እዩ እሞ፡ ቅንዕና ኺኣትው ኣይተኻእሎን፡ እወ፡ ሓቂ ተሳእነ. . . እግዚኣብሄር ነዚ ረኣየ፡ ቅንዕና ስለ ዜልቦ ኸኣ ጐሃየ፡ . . . ሓቂ ጠፍአ ካብ ኣፎም’ውን ኣቋረጸ” ዝተባህለሎም ከይንኸውን ርእስና ንሓልው (ኢሳ 59,14,15 ኤር 7፡28)። ንጉስ ሰለሞን “ንሓቂ ዓድጋ እሞ ኣይትሽጣ” ብምባል ምዒዱና ኣሎ (ምሳ 23፡23)።

እቲ ኣብቲ መገድን ሓቅን ዝዀነ ክርስቶስ ዝጸንዐ ዅሉ ድማ ህይወት እዩ ዚረክብ። ምኽንያቱ ድማ፡ “ህይወት ኣብኡ ነበረት፡ እታ ህይወት (ናቱ) ኸኣ ብርሃን ሰብ ነበረት” ተባሂሉላ እዩ (ዮሃ 1፡4)። ስለዚ ኸኣ ነቶም ኣሚኖምን ንዅሉ ሓዲጎምን ዝሰዓብዎ ደቀ መዛሙርቱ፡ “ኣነ ህያው እየ’ሞ ንስኻትኩም’ውን ህያዋን ክትኰኑ ኢኹም” ኢሉ ኣረጋገጸሎም (ዮሃ 14፡19)። ንሳቶምውን፡ “ንኣይ ህይወተይ ክርስቶስ እዩ፡ ሙማት’ውን ረብሓይ እዩ” እናበሉ ንስግኣትን ብሓጐስ ተቐበልዎ (ፊሊ 1፡20,21)። ህይወት ኢየሱስ ኣብቲ መዋቲ ስጋኦም ምእንቲ ኽትገሃድ ህይወቶም ንመከራ ሞትን ኣሕሊፎም ሃቡ (2ቈረ 4፡10,11)። ህይወትና ክርስቶስ ምዃኑ፡ “. . . እዛ ህይወት እዚኣ ኣብ ወዱ ኣላ፡ እቲ ወዲ ዘለዎ ህይወት ኣላቶ፡ ወዲ ኣምላኽ ዘይብሉ ህይወት የብሉን” ብዚብል ቃል ተገሊጹልና እዩ እሞ፡ ናብ ኣቦ ምእንቲ ኽንበጽሕ በቲ መገድን ሓቅን ህይወትን ዝዀነ ክርስቶስ ንመላለስ።

ጸጋ ጐይታና ኢየሱስ ክርስቶስን ፍቕሪ ኣምላኽን ሕብረት መንፈስ ቅዱስን ምስ ኩላትና ይኹን።

ኤርትራዊት ቤተ ክርስቲያን ተዋህዶ: መንበረ ጵጵስና ሰሜን ኣሜሪካ