ኣብ ጋዜጣ ፍኖተ-ብርሃን ብዘንበብክዎ ሓደ ዛንታ ጽሑፈይ ክጅምር ባህ ይብለኒ። ንሱ ከኣ ሓደ እዋን እዩ ይበሃል ኩሎም ኣራዊት መሮር ኣንጻር ኣባጎብየ ከይበደሎም ከሎ፥ ኣብ ሕማቕ ምኽሪ ይሓብሩ እሞ፥ ብዳርባ እምኒ ቀጥቂጦም ክቐትልዎ ይሰማምዑ። ግናኸ ናይ ድንጋጸ ነገር ግዲ ኮይኑ፡ ዕንቍርዖብ እቲ ዝሓሰብዎ ሕማቕ ምኽሪ ብምሥጢር ነባጎብየ ተካፍሎ። ንሱ ከኣ እቲ ኩነታት ከቢድዎ ከውርዶን ከደይቦን ምስ ጸንሐ፡ ንምዃኑ እገሌኸ

ዝኾነ ምኽሪ ኣብ ሕይወት ደቂ ሰባት ንዓወት ይኹን ንዕንወት ዓቢይ ኣገዳስነት ከም ዘለዎ ዝሰሓት ኣይኮነን። ብዛዕባ ምኽሪ ክንዛረብ ከሎና ክልተ ዓይነት ምኽርታት ከም ዘለዉ ክንርዳእ የድሊ። ንሱ ከኣ ዝጠቅም ምኽርን ዝጎድእን ምኽርን ተባሂሉ ይፍለጥ። ዝጎድእ ምኽሪ ማለት ኣምላኽ ዘይከብረሉ ሰባት ዝጉድእሉ፥ ንሕይወትናን ሕይወት ካልኦት ኣሕዋትናን ዘጥፍእ ሕማቕ ምኽሪ ማለት እዩ። ናይዚ ሕማቕ ምኽሪ ሱርን መሠረትን ከኣ እቲ ጸላኤ-ሠናያት ዝኾነ ዲያብሎስ እዩ። እቲ ጽቡቕ ምኽሪ እንብሎ ድማ ንረብሓ ሥጋን ነብስን ዝኸውን፡ ኣምላኽ ዝሕጎሰሉ፥ ደቂ ሰባት ዝጥቀምሉ ካብ ሠናይ ሓሳብን መንፈሳዊ ጥበብን ዝምንጩ ኣገዳሲ ምኽሪ እዩ። ከምቲ ‘’ኣብ ልዕሊ ልብኻ እንተ ዝመኽሩኻ፥ ኣብ ልዕሊ ሃብትኻ ድማ እንተ ዝውስኹኻ’’ ዝብል ምስላ ወለድና ዘሎ፥ እቶም ምኽሪ ዝቕበሉ ሰባት ካብ መን ዝመጸን እንታይ ዓይነት ምኽርን ምዃኑ ተጠንቂቖም ክቕበሉ ኣለዎም።ብኣንጻር እዚ ድማ እቲ ርጉም ሰይጣን ንኣዳምን ሔዋንን ኣብ ገነት ከለዉ፥ ከም ተመን ተመሲሉ ‘’ካብዛ ኦም እንተ በላዕኩም ኣይትሞቱን ኢኹም። እንታይ ደኣ ማዕረ ኣምላኽ ኢኹም ትኾኑ’’ ዝብል ናይ ሓሶትን ሞትን ጎዳኢ ምኽሪ ሃቦም። ንሳቶም ድማ ንሠናይ ምኽሪ እግዚኣብሔር ገዲፎም፡ ምኽሪ ሰይጣን ስለ ዝኣመኑ ካብ ሕይወት ናብ ሞት ወረዱ።

ኣቦና ዳዊት’ውን ኣብ ቀዳማይ መዝሙሩ ‘’ምኽሪ ኽፉኣት ሰባት ዘይሰምዕ፥ ብመገዲ ኃጥኣን ከኣ ዘይከይድ’’ ብዝብል ፍረ ሓሳብ ንኣምላኽ ከመስግን ይጅምር። መዝ 1፡1። ካብዚ እንርድኦ ነገር ድማ ብምኽሪ ክፉኣት ሰባትን ብመገዲ ኃጥኣንን ዝጓዓዝ ሰብ ኣንጻር መደብ እግዚኣብሔር ስለ ዝኾነ መወዳእታኡ ጣዕሳን ሞትን እንተ ዘይኮይኑ ካልእ ዝረኽቦ ረብሓ ከም ዘየልቦ ይበርሃልና። ምኽንያቱ ሕማቕ ምኽሪ ዘሪኡ ጽቡቕ ነገር ዝዓጽድ፥ ወይ ከኣ ናይ ኃጢኣት ምኽሪ ዘሪኡ ፍረ ጽድቂ ዝሓፍስ ሰብ ብፍጹም የልቦን። ብዛዕባ እዚ ጎይታና ኢየሱስ ክርስቶስ ኣብ ቅዱስ ወንጌል ‘’እቲ ሕያዋይ ሰብ ካብቲ ሠናይ መዝገብ ልቡ፥ ሠናይ ነገር የውጽእ፥ እቲ ክፉእ ሰብ ግና ካብቲ ክፉእ መዝገብ ልቡ፥ ክፉእ ነገር የውጽእ’’ ክብል ብዛዕባ ውሽጣዊ መንነት ደቂ ሰባት ኣነጺሩልና ኣሎ። ማቴ 12፡35።

ኣብ ኦርቶዶክሳዊት ተዋህዶ ቤተ ክርስቲያንና ብ 2005 ኣ.ፈ ዝተፈጸመ ሓደ ዘሕዝንን ንሰማዒኡ ዘደንጹን ነገር ኣሎ። ንሱ ከኣ እቲ ኣብ ልዕሊ 3ይ ፓትርያርክ ሃገረ ኤርትራ ብፁዕ ወቅዱስ ኣቡነ እንጦንዮስ ዝወረደ መሠረት ዘይብሉ ክስን ሕማቕ ምኽር ንብዙሕ ኣማኒ ተዋህዶ ድቃስ ዝኸልአ ጉዳይ ኮይኑ ንረኽቦ። ከምቲ ኣራዊት መሮር ንኣባጎብየ ከይበደለ ከሎ ክቐትልዎ ኣብ ክፉእ ምኽሪ ዝተሰማምዑ፡ እቲ ኣብ ልዕሊ ኣቡነ እንጦንዮስ ዝተማህዘ ረቂቕ ናይ ኃጢኣት ምኽሪ ድማ ብተመሳሳሊ መገዲ ቀናእ ሰይጣን ንተዋህዶ ቤተ ክርስቲያንና ምእንቲ ከፍርሳ ኢሉ ዝመሃዞ ናይ ዕንወት ምኽሪ ምዃኑ ኩሉ ሰብ ከስተውዕሎ ይግባእ። ምኽንያቱ ቅዱስ ኣቡነ እንጦንዮስ ምስ እዞም ዝኸሰስዎም ጳጳሳት ንልዕሊ 10 ዓመታት ዝኣክል ከም ኣኅዋትን ተሓጋገዝቲ መሳርሕትን እዮም ኔሮም። እንተ ኾነ ግና 3ይ ፓትርያርክ ከይበደሉ ከለዉ፥ ጉዳዮም’ውን ነጻ መንፈሳዊ ኣካል ከይረኣዮ፥ ካብ ሓቅን ጥንታዊ ሕጊ ቤተ ክርስቲያንናን ወጻኢ ብዝኾነ መገዲ ብደብዳቤ ካብ መንፈሳዊ ሓላፍነትኩም ኣውሪድናኩም ዝብል መርመም ዝኾነ ዘዋሪ ውሳኔ ተመሓላሊፉ። ይኹን እምበር ልዑል እግዚኣብሔር ዘኽበሮ ማንም ሰብ ከሕስሮ ፍጹም ስለ ዘይከኣል፥ ነቲ ከንቱ ክስታት ድማ ‘’እግዚኣብሔር ዘይሠመሮ ምኽሪ’’ ስለ ዝኾነ፥ ንኣቦና ቅዱስ እንጦንዮስ ዝዓዘዘ መንፈሳዊ ክብሪ ኣውሂብዎም ኣሎ። ነቶም ኣብ ሕማቕ ምኽሪ ዝሰመሩ ግና፡ ከምቲ ‘’ጉድጓድ ንኾዓቲኣ፥ እሾኽ ንሓጻሪኣ’’ ዝበሃል ወትሩ ሕፍረትን ውርደትን ኣስዒብሎም ይርከብ።

ብዛዕባ ሕማቕ ምኽሪ ክንዛረብ ከሎና፡ ኣቐዲሙ ኣብ ኣእምሮና ዝመጽእ፡ እቶም 10 ደቂ ያዕቆብ ኣብ ልዕሊ ኃዎም ጻድቕ ዮሴፍ ዝፈጸምዎ በደልን ጭካኔን እዩ ዘዘክረና። ዮሴፍ ንኣኅዋቱ ኮነ ንስድራ ቤቱ ወላ ሓንቲ እኳ ኣይበደሎምን። ይኹን እምበር እቲ ብሕልሚ ዝረኣዮ ምሥጢር  ነኅዋቱ ብግርህነት ስለ ዝነገሮም ብዘይጠቅም ቅንኢ ተላዒሎም ንኃዎም ክቐትሉ ኣብ ሕማቕ ምኽሪ ከም ዝተሰማምዑ ኣብ መጽሓፍ ቅዱስ ኣንቢብና እንረኽቦ ሓቂ እዩ። እቲ ሕያዋይ ኣምላኽ ግና ወትሩ ረዳኢ ውጹዕን ደጋፊ ግፉዕን ብምዃኑ ንጻድቕ ዮሴፍ ክመውት ኣሕሊፉ ኣይሃቦን። ምኽንያቱ እቲ ኩሎም ደቂ ያዕቆብ ዝተሰማምዕሉ ሓሳብ ‘’እግዚኣብሔር ዘይሠመሮ ምኽሪ’’ ስለ ዝኾነ ጉዕዞ ሕይወት ዮሴፍ ካብ ኣብ ጉድጓድ ሞት፡ ናብ ናይ ግብጺ ክብረት ተሰጋገረ። ከምቲ ኣብ ትንቢት ኤርምያስ ‘’ኣነ ዝሓስበልኩም ዘሎኹ ሓሳብ እፈልጦ እየ፥ መፈጸምታን ተስፋን ክህበኩምሲ፡ ሓሳብ ደሓን እምበር፥ ሓሳብ ክፉእ የብለይን’’ (ኤር 29፡11) ክብል ኣስፊሑ ዝገለጾ ድማ ኮነ። ስደት ዮሴፍ ከኣ ብረድኤት ኣምላኽ ንበረኸትን ድኅነት ሕይወትን ክኸውን ከኣለ። ነቶም ኣብ ሕማቕ ምኽሪ ዝሠመሩ ደቂ ያዕቆብ ግና እታ መዓልቲ ሓቅን ዕርቅን ምስ መጽአት ብፍርሓትን ውርደትን ርእሶም ኣድነኑ።  ዘፍ 37፡1። ስለዚ እምበኣር ንሕናውን ንሕማቕ ምኽርን ናይ ዓለም ነገርን ዕሽሽ ኢልና ኣብ እምነት እግዚኣብሔርን ኣብ ሠናይ ምኽርን ክንጸንዕ ኣምላኽ ኣዕይንቲ ልብና ይኽፈተልና።

ምክር ሠናይት ለኵሉ ዘይገብራ!

ቀሲስ ሓለፎም ዓንደማርያም ቅዱስ ሚካኤል ቤተ ክርስቲያን ሻርሎት