ኣብ ዝኾነ ደረጃ ይሃልዉ ግን ብስም ፍጡር ከነምልኽን ክንምሕልን ፈጺሙ ኣይግባእን። ነዚ ንምድራዕን ኣብ ርእሲ ህዝቢ ተደራቢ መከራን መቕሰፍትን ንምውሳኽን ጎየልትን ተለሃይትን “ስብሓት ነቲ ገንሸል፡ ስብሓት ነቲ ስዉእ” እናበሉ ክለሃዩን ክዝይሙን  ነቲ ብጀካ ንኣምላኽ ንበይኑ ንካልእ ዘይወሃብ ክብሪ ንፍጡራት ንስዉኣት ሰባት ክህብዎ ይስምዑ ኣለዉ። ሓሳባተይ ስዉኣትና ኣይነኽብር ኣይንዘክሮም ማለተይ ኣይኮነን እኳደኣ፡ እታ ክብርቲ ሕይወቶም ስለ ዘይበቐቑልና ኣብ ጸሎትናን ሒልናናን ብሕይወት ክሳብ ዘሎና እናዘከርናዮም ክንነብር መንፈሳዊ ግቡእና እዩ። ኩሉ ከም ዝፈልጦ ሕዝቢ ኤርትራ፡ ካብ ጥንቲ ጥቅምቲ ጀሚሩ ኣማኒ ኣምላኽ፡ ድሒሩ ድማ ምስልምናን ክርስትናን ዝኣምን ሕዝቢ እዩ። ብዘይ ኣምላኽ ሓንቲ ስድሪ ክስድርን፡ ጽቡቕ መነባብሮ ክነብርን፡ ሰላምን ቅሳነትን ክረክብን ከም ዘይክእል ስለ ዝፈልጥ ነቲ  “ብዘይ ብኣይ ሓንቲ እኳ ክትገብሩ ኣይትኽእሉን ኢኹም” ዮሓ. 15፡5 ዚብል ኣምላኻዊ ቃል ኣኽቢሩ ዝኸይድ ዝነበረ ሕዝቢ እዩ ነይሩ። ክምስክር እንከሎ ንማዕተበይ፡ ሰብ እንተዘይርኣየኒ ኣምላኽ ይርእየኒ፡ ሰብ እንተዘይሰምዓኒ ኣምላኽ ይሰምዓኒ፡ ሰብ ልበይ እንተዘይመርመሮ ኣምላኽ ውሽጠይ ይፈልጠኒ ኢሉ እዩ፡  ክርስቲያን ብመጽሓፍ ቅዱስ ብስም ኣምላኽ፡ ኣስላማይ ብቁርዓን ብስም ኣላህ፡ ኢሎም፡ ካብ ሒልናኦም ኣብዚ ዓለም ወሊደ ከዕቢ ዘሪአ ከፍሪ፡ ሞይተ ክጸድቅ ብምባል፡ ሰማይ ሃገረይ፡  ብሓቂ ዝምሕልን  ዝምስክርን ሕዝቢ እዩ ነይሩ። ኣምላኽ ተወኪሉ ጸላእቱ ይስዕርን ይዕወትን እምበር ኣብ ብዝኁን ብልሑን ተኣማሚኑ፡ እግዚኣብሔር ጠሊሙ፡ ብስም ፍጡር ሥጋ ለባሲ ሰብ ኣሚኑን ምሒሉን ኣምሊኹን ዝተዓወተሉ ጊዜ የለን። ከመይሲ “እግዚኣብሔር ከምዚ ይብል ኣሎ እቲ ኣብ ሰብ ዝውከል ቅልጽሙ ድማ ኣብ ሥጋ ዚገብር ብልቡውን ካብ እግዚኣብሔር ዚርሕቕ ሰብ ርጉም እዩ።” ኤር.17፡5 ዝብል ቃል ስለ ዝኽተል።ስለዚ እምበኣር በዓል ጉዳይና በዓል ነገርና እግዚኣብሔር ምዃኑ ክንግንዘብ ግቡእና እዩ።እዚ መርገም እዚ ኣብ ርእሲ ሕዝቢ ንኸይበጽሕ፡ ኣምላኽን ይከላኸለልና እዩ። ባህግን ድሌትን ኣምላኽና ኩሉ ክድኅንን ኣብ ፍልጠት ሓቂ ክበጽሕን እዩ፡ እምበር ብመርገም ክንቅጻዕ ስለ ዘይደሊ፡ ኣጋዲ እዚ ምስ ኣምላኽን ዕቤቱ ዘባእሰና ቅዋም ባዕሉ ኣምላኽ እምበር ፖለቲከኛታት ከምዘይኮኑ ክንግንዘብ ይግባእ እብል። 

ክብሪ ንእግዚኣብሔር ኣብ ላዕሊ ሰላም ድማ ኣብ ምድሪ ኣብ መንጎ እቶም ሥምረት ኣምላኽ ዘለዎም ሰባት።

ልሳነ-ሰይፍ ዘገዳም።