ምስጋና ነዘውትር ኣብ ዝኾነ እዋን:

ንኣደታትና ንኣንስትና ብጉቡእ ነመስግነን:

ደቂ ኣንስትዮ ይመስገና ብሓባር ኩለን:

እዘን ብሩኻት ኣሓትና መዘና ዘይብለን:

ንዝዓበና ንዝነኣስና ኣለይትና ንሰን:

ንዓና ኩርዓትና ሓበንና ንሳተን :

ክብሪ ንኣምላኽና ሞገስ ንዓታተን::

በዓልቲ ቤቱ ዘኽብር በሊሕ:

ኣብ ስድራቤቱ ስሙ ሰፊሕ:

ኣብ መረበቱ ሓዳሩ ገፊሕ:

ኣብዛ ዓለም ዕድሚኡ ነዊሕ::

በዓልቲ ቤቱ ዘየኽብር ልበ-ተሪር:

ኣብ ጃህራን ፈኸራን ዝነብር:

ሓዳሩ ይኸስር ክብረቱ ይሓስር:

ኣብዛ ዓለም ዕድሚኡ ይሓጽር:: 

ቆልዓ ኣብ ሕቑፎ ኣዲኡ ይቀብጥ ይሕንቅቅ: 

ሰብኣይ ሰበይቱ ዝፈቱ ሓዳሩ ይመውቅ:

ቆልዓ ናብ ኣዲኡ ይጎዪ ክሕቆፍ:

ሰብኣይ ናብ ሰበይቱ ይጽጋዕ ክድገፍ:

ቆልዓ ኣዲኡ የናዲ ክምገብ ክዕንገል:

ሰብኣይ ሰበይቲ ይደሊ ሓዳራ ተገልግል:

ቆልዓ ካብ ኣዲኡ ይረክብ ዘይውዳእ ፍቕሪ:

ሰብኣይ ካብ ሰበይቱ ይቕበል ዘየቋርጽ ምኽሪ:

ቆልዓ ይርዕድ ይደሃል ኣዲኡ ዝሰኣነ:

ሰብኣይ ሰበይቲ ዘይብሉ ገና ከይመሰለ መኸነ:

ቆልዓ ካብ ኩሉ ሰብ ዝያዳ ኣዲኡ ይፈቱ:

ሰብኣይ ሰበይቱ ኣይፍታሕ ከይጽልምት ቤቱ:

ቆልዓ ይጉብዝ ይዕንትር ጸባ ኣዲኡ ዝጸገበ:

ሰብኣይ ይኾርዕ ለባም ሰበይቲ ዝረኸበ:

ቆልዓ ብጽቡቕ  ይዓቢ መግቢ ኣዲኡ ዝበልዐ:

ሰብኣይ ይልብም ምኽሪ ናይ ሰበይቱ ዝሰምዐ:

ቆልዓ ይመርጽ ይምርዖ ኣዲኡ ትመስል:

ሰብኣይ ሰበይቲ ይምርዖ ኣብ ቤቱ ትዓስል:

ቆልዓ ይዝክር ካብ ኣዲኡ ዝረኸቦ ምዕዶ:

ሰብኣይ የኽብር ምስ ሰበይቱ ዝገበሮ ጽምዶ::

ፍቕሪ ኣብ ሰበይቲ ጥራይ  ከምዘላ ንዘክር:

ኣብዛ ዓለም ቀሲንና መታን ብሰላም ክንነብር:

ቃል ኪዳን ነደልድል ኣንስትና'ውን ከነኽብር:

ኣዲኡ ሰበይቱ ዘመስግን ይኸብር ይረዝን:

ኣዲኡ ሰበይቱ ዘየመስግን የጉሂ የሕዝን:

ኣዲኡ ሰበይቱ ብግቡእ ዘመስገነ:

ኣብ ህዝቡ ከበረ ኣብ ሂወቱ ቀሰነ::

ኣዲኡ ሰበይቱ ዘመስገነ ዘኽበረ:

ሰናይ ምስጋና ወትሩ ዘዘውተረ:

ኣብ ፍቅርን ሰላምን ከምዝነብር ዝገበረ:

ጻምኡ ይረክብ ናይ ምስጋንኡ ፍረ:

ረብሐ ምበር መን ኣሎ ዝኸሰረ:

ካብዚ ዝበለጸ እንታይ ኣሎ ጥዑም ወረ:

ክብሪ ይዅኖ ነቲ ደቂ ሰባት ዝፈጠረ:

ሰላም ይኹን ምስ ኵላትና ደቂ እረ::

ዶ/ር ተስፋይ ገብረመድህን:

24 ሕዳር 2025