ክንዝክረኪ ዝኸበርኪ ወላዲት ንስኺ ብርኽቲ አደ:

ኩሉ ዝፈትወኪ ዘፍቅረኪ ካባኺ ዝተወልደ:

ህጻን ቆልዓ ብኣኺ ዝዕንገል ፍቕርኺ ዝለመደ:

ምዕባለ ምስ ማዕርነት ኣብ ገለ ሰባት ገና ዘይተዛመደ:

ንማዕርነት ዝጻረሩ አለናዮ ገለ ሰባት በዓል ዳንደ:

ጾታዊ ጭቆና ዝመስለና ብአምላኽ ዝተፈረደ:

አብ ልዕሊ ጓል አንስተይቲ ዕብለላ ከም ንቡር ዝተወሰደ:

ካብ ጥንቲ ንነዊሕ ኡዋን ዝጸንሔ ሱር ዝሰደደ:

ገለ ሰብ አሎ አብ ልዕሊ ጓል አንስተይቲ ዝዓንተረ ዝሰወደ:

ንጓል አንስተይቲ ምጭኳን ንሕስያ ዘይብሉ ዘይተአበደ:

ንጓል አንስተይቲ ከምድሌታ ካብ ቤታ ከይትወጽእ ዝአገደ:

ሰብአይ ግን ከም ድሌቱ ይዕንድር ብሐዳሩ ከይተቀየደ:

አብ ምዕቡል ከተማ ዘሎ ካብቲ ኣብ ገጠር ዘሎ ዝገደደ:

ካብቲ ፊደል ዘይቆጸረ ይብእስ እቲ ሰፊሕ ትምህርቲ ዝወሰደ:

ንሐጺር ግዜ ሰበይቲ እንተ ዝኸዉን ከመይ ምስ ሰምበደ:

እቲ ጭቆና ምስ ጠዓመ ጨርቁ ደርቢዩ ምስ ዓበደ:

ገለ ሰብ አሎ ገና ምስ ምዕባለ ከይጉዓዝ ዝሐንገደ:

ጸገም ኢዩ ሕጂ ክልወጥ ክዓቢ ከሎ ዘይተማዕደ:

እቲ ባህልና እውን አብቲ ዕብለላ አሎዎ ዓቢ ግደ:

ሰብአይ ካብ ሰበይቲ የድልዮ ልቦና ክልቃሕ ክዕደ:

ጓል አንስተይቲ ግን ትቃለስ አላ አንጻር ማዕርነት ንዝጸመደ:

ንሳ ኢያ ናይ ስድራቤት ሓላፍነት ዝወሰደት እቲ ዝኸበደ:

ቆልዑታ ባዓል ቤታ ትምግብ እቲ ዝበለጸ እቲ ዝሮጐደ:

ገለ አይፍለጥን ኢዩ ማይ ጸበል እንተዘነበ አማስዮኡ ዝነጎደ:

ብዘይ ጾታዊ ፍልልይ ብማዕርነት ክንሰምር አብ ሐደ:

ምዕሩይ ሂወት ክነሕልፍ ብሓባር ክልቲኡ ጾታ ዘወሃሃደ:

ንአምላኽ ንጸሊ አብ ደቂ ሰባት ማዕርነት ክነግስ እንተፈቀደ:

ረዲኤት ናይ አምላኽና አይፈለየና ካብ ሰማያት ዝወረደ:

ክብርን ምስጋናን ንሉዑል አምላኽና:

ራህዋን ሰላምን ንሐላል ህዝብና:

ክብረትን ሞጎስን ንዝኸበራ አሐትና:

ዕድመን ጥዕናን ይዉረድ አብ ኩላህና:

ዝተባረኸት መዓልቲ አዴታት ይግበረልና።

ብዶ/ር ተስፋይ ገብረመድህን

ዝኽሪ መዓልቲ ኣዴታት: 

11 ግንቦት 2025