“እቶም ንኣምላኽ ዘፍቅሩ ከም ምኽሩውን እተጸውዑ ግና ኵሉ ነገር ንሰናዮም ከም ዝድግፎም ንፈልጥ ኢና” (ሮሜ 8፡28)

ሎሚ ሰብ ኣብዚ ዘመንና ንህይወቱ ንንብረቱ ንደቁ ገለ ጽቡቕ ነገር ከውሕሶም ክገድፈሎምን ወይ ክገብረሎም ንርኢ ወይ ንሰምዕ። እዚ ኵሉ ድማ ኣብ መጻኢ ጉዕዞ ናይ ህይወቶም ገለ ሕማቕ ነገር ከየጓንፎም ብምባል እዩ። ሰብ እኳ ክፉእ ክነሱ ንውሉዱ፡ ንንብረቱ ንጽባሕ ንግሆ ገለ ሕማቕ ነገር ከይመጽእ ኢሉ ክንድዚ ሰናይ ነገር ወይ ሓሳብ ካብ ሓሰበ፡ እቲ ኣብ ሰማያት ዘሎ ኣቦና ግዳ ነቶም ሕሩያት ደቁ ክንደይ ሰናይ ወይ ጽቡቕ ዘይሓስብ። “ነቶም ንኣምላኽ ዘፍቅሩ... ኵሉ ንሰናይ ከም ዝድግፎም ንፈልጥ ኢና” ይብል ቃል ኣምላኽ። ንክርስቲያን ካብዚ ቃል’ዚ ዝዓቢ ውሕስነት የብሉን። ብዝሓልፎ ኵሉ እግዚኣብሔር ንሰናይ ነገር ስለ ዝድግፎ፡ ክርስቲያን ብሰላምን ዕረፍትን ዝነብር ሰብ እዩ። ስለዚ ሎሚ ኣታ ንእግዚኣብሔር ኣምላኽካ እተፍቅር ህዝቢ፡ እግዚኣብሔር ሰናይን ደሓንን ከም ዝሓስበልና ክርድኣና ይግባእ።

ሎሚ ኣብ ህይወትና፡ ናብራና፡ ኩነታትና ተገቲሩ ብምኽሪ ሃማን ዝተነደቀ ከልካሊ ነገር እንተሀለወ፡ እግዚኣብሔር ኣምላኽና ብብሉጽ ምኽሪ ከም ዘስግረና ቃል ኣቲዩልና እዩ። ስለዚ እዚ ዘየጠራጥር ውሕስነት ካብ ሃለወና ምእማንና ኣብ እግዚኣብሔር ኣምላኽ ነጽንዓዮ። (1ቈረ 1፡9፣ 2ጢሞ 1፡9፣ ማቴ 6፡25,31-32)

ኣስተንትን፡-

1. እቲ ዝዓበየ ውሕስነትካ ኣብ ምድሪ እንታይ እዩ?

2. ብእትሓልፎ ኵሉ ጐደና ህይወት ሕማቕ ከይገጥመካ ትጠራጠርዶ?

3. ልዕሊ እግዚኣብሔር ሰናይ ክገብረለይ ወይ ክሓስበለይ ይኽእል እዩ ኢልካ ዝተደገፍካዮ ወይ ዝተጸጋዕካዮ ነገር ኣብ ህይወተካ እንታይ ኣሎ?

ስለቲ ሰናይ ዝኾነ፡ ኣምላኽ ኣብ ልዕሌና ዝሓስቦ ሓሳብ፡ ንኣምላኽ ነመስግን።

ይትባረክ እግዚኣብሔር ኣምላከ ኣበዊነ።

መካነ-ህይወት