“ጅጎ” ዝበሃል ኣምላኽ ከምዘሎ፡ ሰሚዐን ኣንቢበን ኣይፈልጥን’የ። “ኣባ ጅጎ፡ መብልዒ ጐጎ፡ ማይ ጃሕ ኣብሎ” ክንብል ግን ይዝከረኒ። 

ስለዚ እቲ “ኣባጅጎ” ዝብል ስያሜ፡ ምናልባት ካብቲ “ጐይታ” ዝትርጉሙ፡ “እግዚእ፡ እግዚኦ” ዝብል ናይ ግእዝ ቃል ዝተወርሰ ኣበሃህላ ክኸውን ከምዝኽእል ክግምቶ እኽእል’የ። ሱር ሓሳበይ ግን ካብቲ ሃዋርያ ቅዱስ ጳውሎስ ናብ ሰብ ፊሊጲ፡ “እግዚኣብሄር ቀረባ’ዩ” ኢሉ ዝጸሓፎ መልእኽትን ካብቲ ዓበየይ ትነግረኒ ዝነበረት “ዘይከውን ዘረባ ኣባጅጎ ቀረባ” ዝብል ኣበሃህላን ንሓድሕዱ ስለዘይተቓደወለይ’የ ክጽሕፍ ተደሪኸ ዘለኹ። ብመሰረት እታ ናይ ዓባየይ ኣበሃህላ፡ “እግዚኣብሄር ቀረባ እዩ!” ኢልካ ምሕሳብ፡ ትርጉም-ኣልቦ ዘረባ እዩ። ብኻልእ ኣዘራርባ፡ ሰብ ምስ እግዚኣብሄር ሕብረት ወይስ ሓድነት ክህልዎ ይኽእል’ዩ ኢልካ ምሕሳብሲ፡ ፍጹም ዘይከውንን ዘይከኣልን’ዩ ማለት’ዩ! “እህም!” ዶ በልኩም! እንታይ ደኣ’ሞ ክትገብሩ!!

እቲ በኺኻ ዘይጽገበሉ ዝንቡዕ ሓሳብ ግን፡ ከምዚ ዝዓይነቱ መረዳእታን መርገጽን ዘለዎም፡ ኣብዚ ዘለናዮ ዘመነ ሓድሽ-ኪዳን’ውን ምህላዎም እዩ። መጽሓፍ ቅዱስ፡ “ኣስተበቍዐክሙ ኣኃዊነ በሣህሉ ለእግዚኣብሔር…. ወሐድሱ ልበክሙ” እናበለ  ኽንሱ ኸኣ፡ ኣብ ክንዲ ተነሲሕካ ናብ እግዚኣብሄር ምቕራብ ከምዝግባእ ዝምህሩ፡ ኣብ ሞንጐ ሰብን እግዚኣብሄርን ያኢ ወዲ ሰብ ክበጽሖ ዘይክእል ዓቢ ጋግ ከምዘሎ ጥራይ ጌሮም ዝምህሩን አረ ዝግዕሩን ምህላዎም’ዩ። ሰብ ብሞንጎኛ ኣቢሉ እንተዘይኮይኑ ባዕሉ ምስ እግዚኣብሄር ሕብረት ክገብር ዝኽእል የልቦን፡ ዝዓይነቱ ሰረተ-ዝንቡዕ ምህሮ እናሰዓቡ ክንሶም ከኣ ዘረባ ተረኺቡለይ ድማ ያኢ፡ ተሓድሶ ኣየድልየናን’ዩ ኸኣ ይበሃለለይ!!

እግዚኣብሄር ቀረባ ድዩ ርሑቕ?

ነቶም ንኽርስቶስ በቲ ኣማኑኤል ዝብል መጸውዒኡ ዝፈልጥዎን ተረዲኦም ከኣ ዝኣምንዎን ዘበሉ፡ እቲ ኣብ ሞንጐ እግዚኣብሄርን ኣብ ሞንጎኦምን ዘሎ ፍልልይ፡ ከምቲ ኣብ ሞንጎ ምድርን ብርኪ ወዲ ሰብን ዘሎ ፍልልይ እዩ፡- ብኻልእ ኣዘራርባ፡ እዞም ሰባት እዚኦም ምስ ኣምላኾም ንምርኻብ ብርኮም ምዕጻፍ ጥራይ እዩ ዘድልዮም። ብሓቂ ድማ እቲ “ጸውዓኒ’ሞ ክመልሰልካ፡ ዘይትፈልጦ ዓብዪን ስዉርን ነገር ድማ ከፍልጠካ’የ” ዝበለ ጐይታ ኸኣ ደበኽ ይብለሎም።

ኣማኑኤል ማለት፡ እግዚኣብሄር ምሳና ማለት እዩ

ሃዋርያ ዮሃንስ፡ “ሕብረትና ምስ ኣቦን ምስ ወዱ ኢየሱስ ክርስቶስ እዩ፡” ኢሉ ብምሉእ ምርዳእ ክጽሕፍ ከሎ፡ “ህይወት ተገሊጻ እያ፡ ንሕና ኸኣ ርኢናያ ኢና” እናበለ እዩ ዝትንትን፡ (1ዮሃ1፡2-3)። ጐይታናን መድሐኒናን ኢየሱስ ክርስቶስ ድማ፡ "ኦ ኣቦይ፡ ከምቲ ንስኻ ኣባይ ዘለኻ፡ ኣነውን ኣባኻ ከምኡ ድማ ንሳቶም ኣባና ምእንቲ ኽኾኑ እልምን ኣለኹ” ኢሉ ጸለየ፡ (ዮሃ17፡21) ኣብ መወዳእታ ክፋነዎም ከሎ ድማ “እንሆ ኣነ ኸኣ ክሳዕ መወዳእታ ዓለም ኩሉ መዓልቲ ምሳኹም እየ፡ ኢልዎም’ዩ ዝኸደ፡ ማቴ 28፡20 ስለምንታይ ደኣ’ሞ ኣቦ ከምዘይብሎም ዘኽታማት ኴንና ንኣምላኽ ኣብ ዘይርከብ ሰማይ ጥራይ ከምዝሰፈረ ጌርና ኣብ ርሑቕ እነቐምጦ?!

ካብ እግዚኣብሄር ዝፈላልየና ሓጢኣት እዩ

እግዚኣብሄር ብኣፍ ነቢይ ኢሳይያስ ኣቢሉ፡ “ኣብ መንጎይን ሞንጎኹምን ኮይኑ ዝፈላልየናስ ሓጢኣትኩም እዩ” ኢሉ ሓበረ። ክብሪ ነቲ በጃ ሓጢኣት ኩሉ ዓለም ኣብ መስቀል ዝተሸንከረ ጐይታ ይኹን እሞ፡ ክርስቶስ ድማ ነቲ ኣብ ሞንጐ ዝነበረ ከልካሊ ቀጽሪ ኣፍሪሱ ሰላም ኣወጀልና!! ስለዚ ድማ ምስ ኣምላኽ ብጐይታናን መድሐኒናን ኢየሱስ ክርስቶስ ኣቢሉ ዕርቂ ኮነልና! በዚ መሰረት ከኣ ንስሓ ሳሙና ሓጢኣት’ዩ ንብል። “ምስኡ ሕብረት ኣለና እናበልና ኣብ ጸልማት እንተነበርና ንሕሱ፡ ሓቂውን ኣይንገብርን ኢና ዘለና፡ …. ደም ኢየሱስ ክርስቶስ ወዱ’ውን ካብ ኩሉ ሓጢኣት የንጽሃና እዩ፡ … ሓጢኣትና እንተተናዘዝና፡ ኣምላኽ እሙንን ጻድቕን ስለዝኾነ ንሓጢኣትና ይቕረ ክብለልና፡ ካብ ኩሉ በደልናውን ኬንጽሃና እዩ፡” ተባሂሉ ድማ ተጻሕፈልና፡ (1ዮሃ1፡6-9)።

ስለዚ እግዚኣብሄር ቀረባ’ዩ

ሎሚ ብምኽንያት እዚ ጀሚርናዮ ዘለና ዓቢይ ጾም፡ እቲ ብመጀመርያ ከነረጋግጾ ዘድልየና ነገር፡ እግዚኣብሄር ነቶም ብሓቂ ዝጽውዕዎ ቀረባኦም ከምዝኾነ እዩ። ገለ ከምዝጨንቆ ነቲ ከሃሌ-ኩሉ ዝኾነ ኣምላኽና ኢድ ሰብ ኣይተገልግሎን’ያ፡ ስቡርን ቅጥቁጥን ልቢ ሒዝካ ምቕራብ ጥራይ ድማ’ዩ ዝደሊ’ሞ፡ ኣቱም ኩልኹም እትጽዕሩን፡ ጾር ዝኸበደኩምን ናብቲ በይኑ ከዕርፈኩም ዝኽእል ናብ ጐይታናን መድሐኒናን ኢየሱስ ክርስቶስ ኣቢልኩም ክትጥምቱ፡ ከም ቃል ቅዱስ መጽሓፍ ጌረ “ኣስተበቍዐክሙ ኣኃዊነ በሣህሉ ለእግዚኣብሔር” እናበልኩ፡ ብምሕረት ኣምላኽ እምዕደኩም ኣለኹ።

እግዚኣብሄር ይደግፈና!