ናብ ኣዳለውቲ መጽሄት ብሥራት ኅብረት ወንጌላውያን።

መንፈሳዊ ሰላምታና ብምቕዳም፣

ኣስዒብና ኣብ ወርሒ ታሕሳስ 2011, ዝተሓትመት መጽሄት ብሥራት፣ ቁጽሪ 60 ኣብ ገጽ 22, ብመምህር ስብሓት ዘርኤ፣ እተጻሕፈት ዝምልከት ክንጽሕፍ ተገዲድና ኣሎና።

እቲ ጸሓፊ ንቅዱሳን ኦርቶዶክስ ተዋሕዶ ቤተ ክርስቲያን ኣመልኪቱ፣ “ኣብ ኤርትራ ኮነ ኣብ ኢትዮጵያ ዓቢይ ክብርታትን ኣምልኾን ዝግበረሎም ዝትረኸሎምን ቅዱሳን መዓርግ ዝለበሱ ልዕሊ ኣምላኽ ዝምለኹን ዝኸብሩን ዝፍርሑን እውን ሰባት እዮም። ካብቲ ናይ ፈጠራ ልቢወለድ ታሪኽ ዝደረስዎን ዝሰኣልዎ ስእሊ እስከ ገለ ንጥቀስ፣” ድሕሪ ምባል ቅዱስ ጊዮርጊስ፣ ኣቡነ ኣረጋዊ፣ ኣቡነ ተክለሃይማኖት ቂርቆስ፣ ዘይኮነን ዘይመስልን ታሪኾም ሰኒዑ፣ ኣስፊርዎ ይርከብ።

ብዓቢኡ ነቲ ብስም ኣብን ወልድን መንፈስ ቅዱስን ዝተጠምቀን ብድኅነት ክርስቶስ ንዝኣምንን ዘምልኽን ብጀካ ሓደ ኣምላኽ ካልእ ንዘየምልኽን ሕዝቢ ከምዚ ዓይነት ድፍረትን ጣዖትን ሰባትን ከም ዘምልኹ ገርካ ኣብ ጽሑፍ ብመጽሄት ጽሑፋት ምዝርጋሕ፣ ብሓቂ ዘሕዝንን፣ ንዕቀት ነቲ ቅዱስ ሕዝቢን ኣብ ርእሲ ምዃኑ፣ ኣብ ሓድሕድ ክርስቲያናት ህውከትን ጽልእን ዝጽሕትር ባእሲ ንምትካል ዝዓለመ ሓደገኛ እዩ።

ስለዚ ኣዳለውቲ እዚ መጽሄትን፣ ብፍላይ ድማ ጸሓፊ እዚ ምስናይ ይቕረታ ክእርሞን ኣብ ቀጻሊ መጽሄት ብግልጺ ምስናይ ይቕሬታኡ ብፍላይ ነቶም ብቅዱሳን ኣገልገልቲ ኣምላኽ ኢልና ዝተቐበልናዮም ኦርቶዶክስ ተዋሕዶ ምእመናን ይቕረታ ክሓትትን ጌጋኡ ክእርምን ብመንፈሳውን ኅውነታውን ፍቕሪ ብትሕትና እናሓተትና፣

እዚ ጽሑፍ እዚ ተኣሪሙ ምስ ዘይወጽእ ግን፣ ነቲ ኣብ መንጎ ኣኅዋት ክርስቲያናት ንዝፍጠር ጽልኢ ተሓተቲ ኣዳለውቲ እዚ ጽሑፍ እዚ ምዃንኩም እናገለጽና፣ ብወገናውን ሓላፍነት ናይ ሃይማኖትና ስለ ዘሎና ዘይንደልዮን ዘይንምነዮን እኳ እንተ ኾንና፣ ናብ ምእመናንና ክንዝርግሕን ብጽሑፋትና ድማ መልሲ ክንህበሉ ምዃንና ኣቐዲምና ነዘኻኽር።

እግዚኣብሔር ሰላሙን ምሕረቱን የብዝሓልና።