ቆሎ ተደሪርኩም ቤ/ክርስትያን  ክትተኽሉ

ካብ ቁሩብ ቁራቦኹም ድኻታት ክተማቕሉ

ከተማታት ጸሊእኩም ከጽኩም ክትክውሉ

ሃይማኖት ኣጽኒሕኩሙልና ክብሩ ተኸሊሉ

• ብጹኣን ኣቦታት ልብኹም ይመለስ
• ብስጋ ኣይዓበኹምን እንትርፎ ብመንፈስ
• ቃልኩም ተማሂርና ኣሰርኩም ክንወርስ
• « እንተሎሚ ግን »………
• ስቕ ኢልኩም ሪኢኹም መስቀልኩም ክውረስ
• ብፖለቲከኛ ክባረኽ  ህንጻ  ቅዱስ ጊዮርጊስ
• ብዓይንና ሪኢና ቤት ኣምላክ ክረክስ

ደፋር ኣይትበሉኒ ክገልጽ ሓሳበይ

ይሕመቕ ይጸብቕ ክፍትን ብዓቕመይ

መን'ከ ኣራኸቦም? ክብል ደሪኹኒ ኣእምሮይ

• አረ መን ኣራኸቦም ?  ክልተ ኣንጻራት
• ንጋድም ንትኹል ክልተ መስመራት
• ናይ ሰማይ ናይ መሬት ዓቐበት ቁልቁለት

« መንደኣ ኣራኸቦም » ?

• ትፈልጡ እንተለኹም እስከ ኣውኩኡለይ
• ድንግርግር ኢሉኒ ጸቢቡኒ ዓቕለይ
• ሰማያውን ምድራውን እስከ ፍለዩለይ

« መንደኣ ኣራኸቦም « ?

• ይመስለኒ ኣይነበረን ክሳብ ክንድዚ ድፍረት
• ቅዳሕ ዝጽበ እዚ ክ/ሰራዊት
• ኣሎ ኢለ ኣይገመትኩን ክንድዚ ርክባት
• አረ መን ኣራኸቦም እዞም ክልተ ኣካላት
• ዓለማውያን ሰብ ብረት ካህናት ጳጳሳት
• ካብ መዓስ ሰመሩ ፖሎቲካ ምስ እምነት

« መንደኣ ኣራኸቦም » ?

• እቶም ዓለማውያን ናይ ፖሎቲካ ካድራት
• እቶም መንፈሳውያን መማህራን እምነት
• እቶም ጀነራላት መራሕቲ ሰራዊት
• እቶም መነኮሳት ርቱዓነ ሃይማኖት

« መንደኣ ኣራኸቦም « ?

• ኣይኣመንኩን ክሪኦ ማሕተም ተነቢሩ
• እምነተይ ኣይጸንሐን ከምዚ’ሎም ክደፍሩ
• ካብ ትማሊ ሎሚ እነሆ ሳዕሪሩ
• መራሕቲ’ዛ ዓለም ሓሳቦም ሰሚሩ

« መንደኣ ኣራኸቦም » ?

• ምዃን’ ኳ  ኣነ’የ  ግዲ ዘንጊዐ
• ዳርጋ ነዊሕ ኮይኑስ ናይ ትማሊ ረሲዐ
• እቲ ጨካን ክሕደቶም ንዓለም ዘንብዐ

« መንደኣ ኣራኸቦም » ?

• እወ  እቲ ጠላም ክሕደቶም ናይ ኣቡነ እንጠንዮስ
• ኣብ ማሕዩር ዘእተውዎም ምስሊ ናይ ክርስቶስ
• ጠላም ይሁዳ’ዩ ነቦኡ ዝኸስስ

« መንደኣ ኣራኸቦም » ?

• እንተ’ቲ ሎሚ በዚሑ ጉዳቶም
• ኣብ ክንዲ ናብ ዳዊት ናብ ዓለም ዘንቢሎም
• ኣብ ክንዲ ውጹዓት ወጻዕቲ ኣፍቂሮም
• ሰንሰለት ሃዋርያት እምነቶም ኪሒዶም
• ኣሕሊፎም ሂቦሞም ንፓትርያርክ ኣቦኦም
• ኣብ ክንዲ ኵሎም ሓፊርና ደቆም

« እሞኸድኣ ሕጂ » ?

• ምፍላዮም ስኢንና ምፍላይ መዓርጎም
• ምስ ኣዘዝቲ ሰራዊት ካብ ተጻሕፈ ስሞም
• ኣመሓደርቲ ዞባ ካብ ኮኑ ኣዕርኾም
• ናብ ክ/ሰራዊት ካብ በጽሐ ቅዳሕ ደብዳቤኦም
• እንታይ ኢልና ክንሓልፎ ውዕለት ናይ ስራሖም
• ናብ ኣምላኽ ንጸሊ ክድምሰስ ሓጢኣትና ሓጢኣቶም !!!።

ቀሺ ሃብቶም ሓዲሽ  ቅድስት ማርያም ቤተ ክርስትያን ጀነቫ።