መግለጺ መንበረ ጵጵስና ኣኅጉረ ስብከታት ሰሜን ኣሜሪካ፥ ኤውሮጳን ማእከላይ ምብራቕን።

ኣብዚ እዋን እዚ: ፓትርያርክ ቤተ ክርስቲያን ተዋሕዶ ኣቡነ እንጦንዮስ ናብ መንበሮም ክምለሱ እዮም ዝብል ጽንጽንታ ስለ ዝተሰምዐ፥ ምእመናን ኦርቶዶክሳዊት ተዋሕዶ ቤተ ክርስቲያን፥ ሊቃነ ጳጳሳትን መብዛሕትኦም ጳጳሳትን ብሃረርታ ይጽበይዎ ኣለዉ። ኣብ ወርሒ ግንቦት 2015 እቶም ብኢድ ፓትርያርክ ኣቡነ እንጦንዮስ ዝተቐብኡ ጳጳስ ኣቡነ ባስልዮስ፥ መነኮሳት ኣሰንዮም ድሕሪ ትሸዓተ ዓመት ንቅዱስ ኣቡነ እንጦንዮስ ኣብ ቤት ማእሰርቶም በጺሖሞም እዮም። ኣብ ዝርርቦም፥ንፓትርያርክ ቅዱስ እንጦንዮስ “ክንዓርቀኩም ኣብ ቦታኹም ክትምለሱ” ዝብል ሓሳብ ኣቕሪቦምሎም። ቅዱስ ኣቡነ እንጦንዮስ ብወገኖም፥ “ሕራይ ንዕርቅን ሰላምን ከመይ ገይረ ክሕሰም ንሱ እንድዩ ተልእኮይ። እንተ ኾነ ንስኻትኩም ንባዕልኹም ዕርቂ ምሳይ፥ ዕርቂ ምስ ቤተ ክርስቲያን፥ ዕርቂ ምስ እግዚኣብሔር የድልየኩም እዩ። ኣብ መንጎይን ኣብ መንጎኹምን ኮይኑ፥ ንጉዳይና ዝሰምዕ ሸምጋሊ ኣካል የድሊ እዩ። ከመይሲ ንስኻትኩም መባእስቲ፥ ከሰስቲ፥ ፈረድቲ፥ ኣእሰርትን ኣጸለምትን ክነስኹም ከመይ ጌርኩም ዓረቕቲ ክትኮኑ። ዓሠርተ ዓመት ተኣሲረ፥ ኣብ ፍርዲ ደኣ እቐርብ እምበር መቕጻዕቱ ከም ዝወድአ ገበነኛ ኮይነ ድሕሪ ዓሠርተ ዓመት ማእሰርቲ ኣብ መድረኽ ኣይቅልቀልን። ጉዳየይ ኣጽርየ ዝጸለመ ስመይ ኣንጺሀ እንተ ወጻእኩ፥ ንኣኹም ጽቡቕ ንኣይ ጽቡቕ ልዕሊ ኩሉ ንቤተ ክርስቲያንና ጽቡቕ እዩ። ስለዚ ገዳማውያን ኣቦታት፥ ሊቃውንቲ ቤተ ክርስቲያንን ሽማግለታት ኣቦታትን ኣብ ዘለውዎ፥ እታ ሓዋርያዊ ሰንሰለት ዝሃበት መንበረ ማርቆስ እስክንድርያ ኣብ ዘላቶ፥ ንስኻትኩም ክስኹም ኣልዒልኩም፥ ኣነ ድማ ኣብ ርእሴኹም ዘንበርክዎ ውግዘት ኣልዒለ፥ ይቕረ ተባሃሂልና ብፍቕሪ ብሰላም ቤተ ክርስቲያንናን ሕዝብናን ንጓሲ፥" ዝብል ልቦና ዝመልኦ ኣባታዊ መልሲ ሂቦሞም።

እንተኾነ፥ እዚ ሰላምን ርግኣትን ቤተ ክርስቲያን'ዚ ምስ ውልቃዊ ረብሓ ኣባ ሉቃስ ስለዘይቃዶ፥ ምስቶም "ኣመሓደርቲ ቤት ጽሕፈት መንበረ ፓትርያርክ ተዋሕዶ" ብዝብል ጉልባብ ኣብ ቤተ ክርስቲያን ተዋሕዶ  ዝኣተዉ፥ ቤተ ክርስቲያን ዘይትፈልጦም በጋሚዶታት ኣሰሊፎም፥ ነቲ ለባማት ዘንቀድዎ ኣፈፈት-ዕርቂ ኣንፈቱ ከጥፍእዎ ላሕ ይብሉ'ለዉ። ኣባ ሉቃስ ኣብ ዝኸድዎ ኩሉ ክብሪ ብዘይብሉ ኣጸዋውዓ “ኣባ እንጦንዮስ መናፍቕ ኮይኑ ረኺብናዮ፥ ንልዕሊ 400 መናፍቓን መዓርግ-ክህነት ሂቡ ቤተ ክርስቲያን ኣጥፊእዋ፥” ክትብል ዝጸንሐት መልሓሶም ቀይሮም። ኣብዚ ሰዓት እዚ፥ “እዞም ሰብኣይ [ኣቡነ እንጦንዮስ ማለቶም እዮም] ናብ ቦታኦም ምምላስ ኣብዮሙና፥ ብጳጳሳት፥ ብካህናት፥ ብመነኮሳት ብዓበይቲ ተለሚኖም፥ ሥልጣን ኣይደልን እየ ሓዲገልኩም ኣሎኹ ኢሎሙና። እንታይ ደኣ እሞ ክንገብር።” ዝብል ሓቅነት ዘይብሉ ወረታት የናፍሱ ኣለዉ። እዚ፥ ብዘይካይ ካልእ ዝርአ የለን፥ ስለዚ ሥልጣን ፓትርያርክ ናባይ እያ ኢሎም ኣብ መዓርግ ፓትርያርክ ንምድያብ ዝገብርዎ ዘለዉ  ደርሆ ፋሕቲራ እትረኽቦ ጉርሒ እዩ።

ኣባ ሉቃስ ምስ ሰብ ጊዜ ተጸጊዖም፥ ሥልጣን ቤተ ክርስቲያን ንበይኖም ብሒቶም፥ በይኖም ሲኖዶስ በይኖም ወጋዚ ኮይኖም፥ ኣብ ቤተ ክርስትያን ከቢድ ዕንወት ይፍጽሙ ኣለዉ። ሕዝቢ ኤርትራ ብሓበራ፥ ምእመናን ተዋሕዶ ድማ ብፍላይ ዓገብ ክብልዎም፥ ቤተ ክርስቲያንን ብሰላምን ብፍቕርን ክትምራሕ፥ ኣምላኽ ናይ ፍቕሪ ጸሎትና ክቕበል፥ ስደትናን መከራናን መዛዘሚ ክረክብ፥ ብሓቅን ብሓድነትን ጸኒዕና እቶም ይግብኦም ኢልና ዘቐመጥናዮም ኣቦና ኣብ መንበሮም ክምለሱ ይግባእ። ከምኡውን ነቶም ኣብ ከቢድ ሕማም ዝርከቡ ኣቡነ ዲዮስቆሮስ፥ ኣምላኽ ምሕረቱ ክልእከሎም፥ ምስ ኣቦኦም ዕርቂ ክገብሩ ብስም ቅድስት ቤተ ክርስቲያን መንፈሳዊ ጸዋዒትና ነመሓላልፍ።

እግዚኣብሔር ዘመን ሰላምን ዕረፍን ይልኣኸልና።

ጸሎትን በረኸትን ቅዱስ ኣቡነ እንጦንዮስ ኣይፈለየና።

መንበረ ጵጵስና ኣህጉረ ስብከታት ሰሜን ኣሜሪካ፥ ኤውሮጳን ማእከላይ ምብራቕን