ቅነ-ጉባኤ

ቅነ-ጉባኤ - 2010

ህዝቢ ኣክቡ ቅዱስ ጉባኤ ከም ዘሎ ንገሩ! ዩኤል 2፡16።

መንበረ ጵጵስና ሰሜን ኣሜሪካ ናይ ሎሚ ዘመን መበል 12 ዓመታዊ ጉባኤ ኣመንቲ ኦርቶዶክስ ብብፁዓን ጳጳሳት፥ ኣቦታት ካህናት፥ ዲያቆናት፥ ምእመናን ህዝበ ክርስቲያንን መንእሰያት ትምህርቲ ሰንበትን ማዕሪጉ ብልዑል ክብርን ብዝተፈላለየ መንፈሳዊ ንጥፈታትን ንኽካየድ ዘድሊ ምድላዋት ይገብር ኣሎ። በዚ መሠረት ነቢይ ኢዩኤል ‘’ህዝቢ ኣክቡ ቅዱስ ጉባኤ ከም ዘሎ ንገሩ’’ (ኢዩ 2፡16) ከም ዝበለ፡ ነዚ ኣብ ቅዱስ ገብርኤል ቤተ ክርስቲያን ኒው-ዮርክ ዝግበር ዓመታዊ ጉባኤን ክብረ በዓል ገብርኤልን ነፍሲ ወከፍ ኦርቶዶክሳዊ ክሳተፎ ዕድመ ቅድስት ቤተ ክርስቲያን ምዃኑ ነዘኻኽር።

ኣብ’ዚ ጉባኤ’ዚ ብዛዕባ እታ ተስፋኣ ወትሩ ካብ ኢድ እግዚኣብሔር ጥራይ ዝኾነት ተዋህዶ ቤተ ክርስቲያንናን እሙን መራሒና 3ይ ፓትርያርክ ኤርትራ ቅዱስ ኣቡነ እንጦንዮስን ኣብዚ ናይ ፈተና እዋን ብጸሎትን ምህለላን መስዋዕቲ-ቅዳሴ ጌርና ንእግዚኣብሔር ክንልምን ኢና። ከምኡ’ውን ንመንፈሳዊ ሕይወትና ብዝጠቕሙ ዝተፈላለዩ ስብከታት፥ ሰሚናራት፥ ትምህርትን መዝሙራትን ጌርና ንሕድሕድና ክንተሃናነጽ፥ ብተውሳኺ ናይ ብፁዓን ኣቦታትና ጳጳሳት ቡራኬን ማዕዳን ክንቅበል ጽቡቕ ኣጋጣሚ ምዃኑ ኩላትና ክንስሕቶ ኣይግባእን።

ሠናይ ፍቓድ ኣምላኽ ኮይኑ እቶም ኣብ’ዚ ናይ ሎሚ ዘመን ካብ 22-25 July 2010 ዝካየድ፡ መበል 12 ዓመታዊ ጉባኤ ሰሜን ኣሜሪካ ክሳተፉ ተመዲቦም ዘለዎ ብፁዓን ጳጳሳት ድማ፥ ብፁዕ ኣቡነ መቃርዮስ ዝመርሕዎ፥ መትሮፖሊታን ብፁዕ ኣቡነ ሰራፊም ጳጳስ ኦርቶዶክሳዊት ቤተ ክርስቲያን ዓዲ እንግሊዝን፡ ብፁዕ ኣቡነ ዳዊት ጳጳስ ኦርቶዶክሳዊት ቤተ ክርስቲያን ግብጽን ካልኦት ናይ ክብሪ ዕዱማት ኣጋይሽን ዝርከብዎ ምዃኑ ተፈሊጡ ኣሎ። ስለ’ዚ እምበኣር ነፍሲ ወከፍና ብዝተገብረልና ኩሉ ሠናይ ነገራት ንኣምላኽ ከነመስግን፥ ብዛዕባ እቲ ዝተረፈና ምእንቲ ሰላም-ህዝብና፥ ሰላም-ሃገርና ኤርትራን ሰላም-ምሉእ ዓለምን ሓቢርና ክንልምን፥ ምስ ሙሉኣት ስድራ ቤትኩም ተሳተፍቲ እዚ መንፈሳዊ ጉባኤ ክትኮኑ ኣምላኽ ልብኹም የነቓቕሕ። ከም’ቲ “ሕራይ እንተ በልኩምንን እንተ ተኣዘዝኩምንን ምድሪ እተፍርዮ ሠናይ ዘበለ ክትበልዑ ኢኹም’’ ዝበለና፥ ነቲ ኣቦ ምሕረት ዝኾነ እግዚኣብሔር ኣምላኽና ብንስሓ ንቕረቦ እሞ ንሱ’ውን ክቐርበናን ምሕረቱ ከውርደልናን ምዃኑ ዘጠራጥር ኣይኮነን። ኢሳ 1፡16።

በዚ ኣጋጣሚ ንኹሎም ምእመናን ኣብ መበል 12 ዓመታዊ ጉባኤ ክትሳተፉ ዝመደብኩም ኣብ ዝሓጸረ ጊዜ ብርትዓዊ ዋጋ ናይ መደቀሲኹም ሆቴል ክትሕዙ ኣብ’ዚ ጠውቑ። ካብ ኤርፖርት ክንቅበለኩም እትደልዩ ኣጋይሽና ከኣ ናይ ትጓዓዝሉ ኣየር ቲኬትኩም ቅዳሕ ክትልእኩልና ብኣኽብሮት ከነዘኻኽረኩም ንፈቱ። ብተወሳኺ ኣብ ከተማ ኒው-ዮርክ ትዓርፍሉ ኤር-ፖርት ጆን ኤፍ ከነዲ (New York JFK Airport) ወይ ድማ ላጓርዲያ (New York LaGuardia Airport) ክኸውን ድማ ንሕብር። ንዘድሊ ሓበሬታ በዚ ዝስዕብ ቴሌፎናት ደዊልኩም ግቡእ ምትሕብባር ክትረኽቡ ትኽእሉ። ዕድመን ጥዕናን ን3ይ ፓትርያርክ ቅዱስ ኣቡነ እንጦንዮስ። ልዑል እግዚኣብሔር ንጉባኤና ይባርኽ! ብደሓን ምጹ!!