"እቲ ብኣይ ዝኣምንሲ እንተ ሞተ እኳ ብሕይወት ኪነብር እዩ!"

ክቡር ዓንደማርያም ሓውና ድማ ምስ ዓብን ንእሽቶን፥ ምስ ሰብኣይ ይኹን ሰበይቲ፥ ምስ ካህናት ይኹን ዲያቆናት ብስምምዕን ፍርሓት ኣምላኽን እናተመላለሰ ወትሩ ኣብ መንፈሳዊ ይኹን ማሕበራዊ ጉዳይ ቤተ ክርስቲያኑ፥ ህዝቡን ሃገሩን ብፍቕርን ንጥፈትን ብሕጉስ መንፈስን ከገልግል ዝጸንሐ ኣብነታዊ ኣቦን ሓውን እዩ ነይሩ። እንተ ኾነ ግና ሞት ንዝዓበየ ይኹን ንዝነኣሰ፥ ንዝተሾመ ይኹን ንዝነገሠ፥ ንዝመነነ ይኹን ንዝጰጰሰ፥ ብዘይ ኣፈላላይ ተጸዊዕና ንኸዶ መወዳእታ ናይ ምድራዊ ሕይወትናን መጀመርታ ናይ ሰማያዊ ሕይወትናን ብምዃኑ ትጉህ ዓንደማርያም ኃውና ድማ ብሃንደበታዊ መጸዋዕታ ሞት ናብ ዓዲ ኵልና ሓሊፉ ኣሎ።

ንሕና ንኹን ፍቁር ሓውና ዓንደማርያም ከኣ ‘’እንተሎና ንክርስቶስ እንተ ሞትናውን ናብ ክርስቶስ ምዃንና ስለ ንፈልጥ’’ ብጽኑዕ እምነትን ኣሰር ፍቕርን ሰላምን ሒዝና ክነብር ዓቢይ ጸጋ እዩ። ናይ ነፍሲ ወከፍና መዓልቲ ሞት ከኣ ከም ሰራቒ ስለ ትመጸና፡ ሓውናውን ኣብታ ናይ መወዳእታ ፈነዋኡ ‘’ሠናይ ገድሊ ተጋዲለ እየ፥ ጕያይ ወዲአ እየ፥ ነታ እምነት እውን ሓልየያ እየ’’ ዝብል ጥቕሲ ሒዙ ንዓና ከቢድ ሕድርን ሓላፍነትን ገዲፉልና ካብዛ ናይ ቃንዛ ዓለም ናብ ሰማያዊት ቤትና ሓሊፉ ኣሎ። 2ጢሞ 4፡7።

ልዑል እግዚኣብሔር ንዓንደማርያም ሓውና ዘለዓለማዊ ሕይወት ንስድራ-ቤትን ምእመናንን ድማ እግዚኣብሔር ጽንዓት ይሃበልና እናበልና ብጸሎት ንጎይታ ንልምን። 

“ንዓይ ሕይወት ማለት ክርስቶስ እዩ።”

***********************************************************

ነፍስሄር ዓንደማርያም ካብ ኣቡኡ ኣቶ ብርሃነ ተስፋሚካኤልን ካብ ኣዲኡ ወ/ሮ ኣመተ ገብሩን፡ ብ21 መጋቢት 1946 ኣብ መራጉዝ ተወሊዱ። ናይ ትምህርቲ ዕድሚኡ ምስ ኣኸለ ድማ፡ ኣብ ከተማ ተሰነይ ቀዳማይ ደረጃ: ማእከላይን ደረጃ ድማ ኣብ ኣስመራ ተማሂሩ  ብፋይናንስ ፖሊስ ስራሕ ጀመረ። ዓንደማርያም፣ ብዝነበሮ ትግሃትን ተወፋይነትን ኣብ ስራሑ ዕዉትን ምስጉንን ነበረ። ካብ መጀመርያ ሰብዓታት ኣቢሉ ኣብ ኤርትራ ክሰርሕ ድሕሪ ምጽናሕ ኣብ 1976 ብስራሕ ንኣዲስ ኣበባ ተቐይሩ። 

 ኣብ 1981  ምስ ወ/ሮ ትብለጽ ሃብተ ምዉቕ ሓዳር መስሪቱ፣ ኣብ ኣዲስ ኣበባ ክሳብ 1991 ክሰርሕ ጸኒሑ፡ ድሕሪ ናጽነት ኤርትራ ጊዜ ከይወሰደ ብቁልጢፍ ናብ ኣስመራ ብ1991 ተመሊሱ፣ ኣብቲ ዝፈልጦ ሞያ ናይ ፍናንሳ ብሞያ ክሰርሕ ድሕሪ ምጽናሕ ብ1995 ናብ ኣሜርካ ስደት ኣምርሐ። 

ኣብ ካንሳስ ሲቲ(Kansas city) ዝበሃል ከተማ ኣሜርካ ንሓደ ዓመት ድሕሪ ምጽናሕ፣ ብ1996 ናብ ከተማ ኣትላንታ መጺኡ ክሳብ ግዜ ዕረፍቱ ተቀመጠ። 

ዓንደማርያም ካብ መጀመርታ ክሳብ'ታ ዝዓረፈላ ዕለት ኣብ ኣገልግሎት ይርከብ ነይሩ። ናይ ዓንደማርያም ኣገልግሎት ዓይነታዊ ኣብነት እዩ። ንህዝቢ ኤርትራ ይኹን ንኻልኦት ሕብረተ ሰብ ዘርኣዮ ልዑል ሓልዮትን ተገዳስነትን በብሓደ ኽትገልጾ ዝከኣል ኣይኮነን። 

ካብ ኩሉ ሰብ ፍሉይ ዝገብሮ ኣዝዩ ብዙሕ ጽቡቕ ባህርያት ዝነበሮ ኣዝዩ ፍትውን ህቡብን ሰብ እዩ ነይሩ። ትሑት፡ ለዋህ፡ ፈቃር፡ ንህጻናት ብዘይኣፋላላይ ከም ደቁ፡ ንፈተውቱ፣ ከም ኣሕዋቱ፡ ንዓበይቲ ከም ኣያታቱ፡ ከም ኣቦታቱን ኣዴታቱን ዘኽብር፣ ኣዝዩ ፈታው ሰብ ነይሩ። ዓንደማርያም፡ ክህብ እምበር ክቕበል ዘይሓስብ፡ ዝነብዐ ዓይኒ ዝደርዝ፡ ዝፈረሰ ናብራ ዘዕሪ፡ ተስፋ ንዝቐበጹ ሞራልን ሓቦን ዘስንቕ፡ ኣቦ ኹሉን ኣያ ኹሉን ነይሩ። ንቒምን ጽልእን ባእስን ዝኸውን ስፍራ ዘይብሉ፡ ሕራይ እምበር እምቢ ዘይፈልጥ ሓው ኩሉ እዩ ነይሩ።