“ቦ ጊዜ ለኩሉ” ከም-ዝበሎ ሰሎሞን ወዲ-ዳዊት፣ እቲ እግዚኣብሔር ዝመደቦ ግዜ ስለ-ዝኣኸለ፣ እንሆ ኣብታ ርእሰ-ከተማ ናይ ሃገረ-ስዊድን ዝኾነት ስቶኮልም`ውን፣ ኣብቲ ሓዋርያዊ-ሰንሰለት ጸኒዑ ዝቖመ፣ “ደብረ-ኣማኑኤል” ተባሂሉ ዝተሰምየ ሓዲሽ ቤተ-ቤተ-ክርስቲያን፣ ንኣገልግሎት ክፉት ኮይኑ ክርከብ፣ ናይቲ ገባር ተኣምራት ዝኾነ ሕያው ኣምላኽ፣ ቅዱስ-ፍቓድ ኮይኑ ተረኺቡ ኣሎ። ስለ`ዚ ከኣ`ዮም እቶም ነዚ ቅዱስ ራእይ`ዚ ተግባራዊ ንምግባር፣ ካብ ነዊሕ እዋን ክደኽሙን ክጽዕሩን ዝጸንሑ ማኅበረ-ምእመናን፣ ንሓጎሶም ወሰን ዘይረኽቡሉ።

እዚ ቤተ-ክርስቲያን`ዚ፣ ካብቲ ካልእ ፍሉይ ዝገብሮ እንታይ’ዩ-? ዝብል ሕቶ ክለዓል ይኽእል እዩ። እዚ ሕቶ’ዚ ብግርህና ንዝጥምቶ`ውን ቀሊል ክመስል ይኽእል’ዩ፣ ቀሊል ግና ኣይኮነን። ከመይሲ እቲ ፍሉይ ዝገብሮ፣ ኣብቲ ናይ ቅዱስ-ማርቆስ መንበር ሓዋርያዊ-ሰንሰለት፣ ጸኒዑ ዝርከብ ብምዃኑ እዩ። ነዚ ሓዋርያዊ ሰንሰለት’ዚ ዋንኡ ከኣ፣ እቶም ን 15-ዓመት መመላእታ፣ ኣብ መቚሕ ተታሒዞም ዝርከቡ ዘለዉ ፓትርያርክ-እንጦንዮስ ክኾኑ ከለዉ፣ ናይ’ዚ መስመር’ዚ ዓቃቤ-መንበር ኮይኖም ዝርከቡ ዘለዉ ድማ፣ ብፁዕ ኣቦና ኣቡነ-መቃርዮስ እዮም።

ካብዚ መሥመር’ዚ ወጻኢ ኴንካ እናሃሎኻ፣ ቤተ-ክርስቲያን ኣሎ ምባል ግና፣ እቲ ናይ ኦርቶዶሳዊ  እምነትና ሕጋውን ቀኖናውን መስመር ዝቕበሎ ኣይኮነን። እቲ ሕያዋይ ሕዝብና ነዚ ኣብ ሓዋርያዊ-ሰንሰለት ዝተሠረተ፣ ናይ መሥመር ፍልልይ’ዚ ብግቡእ ክርድኦ ይጽገም ስለ ዘሎ ግና፣ ምስቶም ካብዚ ቅዱስ-መሥመር`ዚ ወጻኢ ኮይኖም፣ ኣፍራሲ ተልእኮ ኣብ ምፍጻም ዝርከቡ ዘለዉ ወገናት፣ ኃቢሩ ክጎዓዝ ከም ቅቡል ወሲዱዎ’ዩ ዝርከብ ዘሎ። እዚ ከኣ`ዩ ኣብዚ እዋን`ዚ፣ ነታ ብቅድስና ዝፍለጥ ታሪኽ ዘለዋ ኦርቶዶክሳዊት ቤተ-ክርስቲያንና፣ ከቢድ ፈተና ኮይኑዋ ዝርከብ ዘሎ።

ኣብዚ እዋን`ዚ ካብ ጽላል`ዚ ቅዱስ-መንበር`ዚ፣ ሪሒቆም ክኸዱ ምርጫኦም ዝኾነ ውሉደ-ክህነት ምህላዎም ዝፍለጥ`ዩ። እዚ ከኣ`ዩ ነታ ዘይተዓደለት ቤተ-ክርስቲያንና፣ ናይ እግሪ ረመጽ ኮይኑ ክሳቕያ ዝርከብ ዘሎ። ግዳስ ብጀካ`ቲ ኣብ ሓዋርያዊ-ሰንሰለት ጸኒዑ ዝርከብ፣ ብብፁዕ ኣቦና ኣቡነ-መቃርዮስ ዝምራሕ መንበር። ካልእ መንበር ኣሎ ዝበሃል ኣይኮነን። ይኹን እምበር ነቲ ዘሎ ናይ ሕንፍሽፍሽ ግዜ ተጠቒሞም፣ ነቲ ደምበ-ተዋሕዶና ሰላም ከም-ዘይህልዎ ንምግባር፣ ተዓጢቖም ዝሠርሑ ዘለዉ ውሑዳት ኣይኮኑን።

ስለ’ዚ ምስ’ዞም ካብቲ ሓዋርያዊ ሰንሰለት ተፈልዮም ወይ ተነጺሎም፣ ንቅድስቲ ኦርቶዶክሳዊት ተዋሕዶ ቤተ-ክርስቲያን፣ ኣብ ከቢድ ፈተና ከም-እትኣቱ ገይሮማ ዝርከቡ ዘለዉ ወገናት። ካብኣቶም ተፈንቲትና ብምኻድ፣ መሥመርና ኣነጺርና ክንፍለ፣ ኣማራጺ ዘይብሉ ሕቶ ምዃኑ’ዩ በቲ ቅዱስ-ጽሑፍ ዝንገረና ዘሎ። ከመይሲ “-ንሕና ቤት-መቕደስ ሕያው ኣምላኽ ኢና። ስለ’ዚ ካብ ማእከሎም ውፁ፣ ከምኡ’ውን ተፈለዩ-” ብምባል’ዩ እቲ ቅዱስ-ጽሑፍ ዘጠንቅቕ ዘሎ። እቶም ኣብቲ ሓዋርያዊ-ሰንሰለት ኣለና እንብል ኩልና ከኣ፣ ነዚ ደረት’ዚ ጥሒስና ብምኻድ፣ ኣብቲ መኣዶም ኢድና ሓዊስና ከይንርከብ፣ ኣዚና ጥንቁቓት ክንከውን`ዩ ዝንገረና ዘሎ። (2ቆሮ-6/16-17)

ሕጂ ግና እቲ እግዚኣብሔር ዝመደቦ ግዜን ሰዓትን ስለ-ዝበጽሐ።  እቲ ኣብ ሓዋርያዊ-ሰንሰለት ዝቖመት ቤተ-ክርስቲያን ንኸይትቐውም ክግበር ዝጸንሐ ሕልኽላኻት። ደጊምሲ ከም ሕንፃ-ኢያሪኮ ሃደሽደሽ ኢሉ ኣብ ዝፈርሰሉ ደረጃ በጺሑ`ዩ ዝርከብ ዘሎ። እዚ ኩሉ’ዚ ከኣ ብኃይሊ’ቲ ኩሉ ዝኽእል እግዚኣብሔር ኣምላኽ ስለ-ዝኾነ፣ ክብሪ ንዕኡ ንኣምላኽና ይኹን ካብ ምባል ሓሊፍና፣ ንሕና ከም-ዝገበርናዮ ኴንና ክንምካሕ እንደልየሉ ምኽንያት የልቦን። ስለዚ እቲ ክግበር ዝጸንሐ ናይ ዓመፃ ጽዋዕ ስለ-ዝመልአ፣ ካብዚ ሓሊፉ ክቕጽል ፍቓድ እግዚኣብሔር ኣይኮነን። ከመይሲ እቲ መጀመርታ ዘለዎ ኩሉ፣ መወዳእታ ክህልዎ ከኣ ግድን ስለዝኾነ እዩ።

ስለ’ዚ ከኣ’ዩ ሕጂ እቲ “ደብረ-ኣማኑኤል” ዝተሰምየ ሓዲሽ ቤተ-ክርስቲያን፣ ኣብ ከተማ ስቶኮልም ንኣገልግሎት ክፉት ኮይኑ ዝርከብ ዘሎ ። በዚ መሠረት`ዚ እውን ኣብ ዕለት 30/10/2020 ብኅብረት ውሉደ-ክህነትን ማኅበረ-ምዕመናን፣ ንሴብሆ ለእግዚኣብሔር-!! እናተባህለ፣ ብዓቢይ ክብርን ዓጀብን ክጽምበል ክኢሉ ዘሎ። ናይ’ዚ ቤተ-ክርስቲያን`ዚ ርእሰ-ደብር፣ ቀሲስ ተስፋ-ሚካኤል ተስፋይ ዝተባህሉ በዓል-ሞያ ካህን ክኾኑ ከለዉ። ብዛዕባ’ቲ ኣብ ልዕሊ ቤተ-ክስቲያን፣ እናተፈጸመ ዝርከብ ዘሎ ሕጋዊ ጥሕሰት’ውን፣ እኩል ኣፍልጦን ንቕሓትን ዘለዎም ማኅበረ-ምእመናን ዘለዉዎ ቤተ-ክርስቲያን እዩ።

ነቲ መዓልቲ ጽምብል ምኽንያት ብምግባር’ውን። ንብፁዕ ኣቦና ኣቡነ-መቃርዮስ ብምውካል፣ ካህን ተክለ-ማርያም ምርካ-ጽዮን ካብ ጀርመን፣ ከምኡ’ውን ካብ ኡምዮ ቀሲስ ዮናስ ወልደ-ሩፋኤል ተሳተፍቲ ኮይኖም ውዒሎም። ነቲ ምምራቕ እቲ ቤተ-ክርስቲያን ብዝምልከት’ውን፣ ክልቲኦም ካህናት በብወገኖም መልእኽቲ ኣመሓላሊፎም። ከመይሲ ናይቲ ኣብ ልዕሊ ቤተ-ክርስቲያን ተዋሕዶ፣ ብቐጻሊ ክካየድ ዝጸንሐን  ገና’ውን ዝካየድ ዘሎን ኣሉታዊ ጸለመ። እቲ ምረቱ ክልቲኦም ብማዕረ ከስተማቕሩዎ ካብ ዝጸንሑ ወገናት ስለ-ዝነበሩ። እቲ ኣብ ስቶኮልም ቤተ-ክርስቲያን ንምምሥራት ዝተበጽሐ ዓወት፣ እቲ ፍጻሜ ንዓታቶም`ውን ፍሉይ ትርጉም ዝነበሮ`ዩ ነይሩ ክበሃል ይከኣል።

ብዝተረፈ እዚ ኣብ ሓዋርያዊ-ሰንሰለት ዝጸንዐ መስመር ንምኽታል፣ ክግበር ዝጸንሐ ጻዕርን ድኻምን ብውሑዳት ቃላት ገሊጽካ ዝውዳእ ኣይነበረን። እቶም ማኅበረ-ምእመናን “ደብረ-ኣማኑኤል” ስቶኮልም ግና፣ ብጽንዓት መኪቶም ብዝገበሩዎ ዘይሕለል ጻዕሪ። ነቲ ኩሉ ፈተናን መሰናኽልን ሓሊፎም፣ ኣብ ከምዚ ዝበለ ዓወት ክበጽሑ ምኽኣሎም። ዋጋ’ቲ ኩሉ ዘካየዱዎ ነዊሕ ጻዕሪ ዝተበጽሐ ዓወት ስለ-ዝኾነ፣ እንቋዕ እግዚኣብሔር ሞጎስ ሃበኩም-!! ክብሃሉ፣ ክንደይ`ኳ ዝግብኦም`ዩ።

ብዝተረፈ እቲ ኣብዚ እዋን`ዚ፣ ኣብ ቤተ-ክርስቲያን ተዋሕዶ ከጋጥም ዝርከብ ዘሎ ፈተና። እቲ ሓደ ክፋል ምስ ፖለቲካ ዝተተሓሓዘ ክኸውን ከሎ፣ እቲ ዝተረፈ ድማ ምስ ሥጋዊ-ረብሓ ዝተኣሳሰር ምዃኑ። እቲ ኣብ ባይታ ዘሎ ህልው ኩነታት ባዕሉ የረጋግጾ እዩ። ከመይሲ ኣብቲ ክበልዕ`የ ምባል ኩሉ ግዜ ጸገም ምህላዉ ግልጺ`ዩ። ከም-ዝፍለጥ ዓሳታት`ውን ክበልዑ ክብሉ`ዮም፣ ኣብ መጻወድያ ዝወድቁ። ኣብዚ ግዜ`ዚ እውን፣ ብተመሳሳሊ መንገዲ ሥጋዊ-ረብሓ ዝደልዩ`ዮም፣ ነቲ ደምበ-ተዋሕዶና መወዳእታ ኣብ ዘይብሉ ሕንፍሽፍሽ ከእትዉዎ ዝርከቡ ዘለዉ። እቲ ቅዱስ-ጽሑፍ ግና “-ኣብ መንጎ`ቶም ሓቂ ዘይብሎምን፣ ኣእምሮኦም ብኃጢኣት ዝተበላሸዉን ሰባት፣ ዘየቋርጽ ምግርጫው`ዩ ዝፍጠር። እዚኣቶም ከኣ ሃይማኖት፣ ናይ ምድራዊ-ረብሓ መጋበሪ`ዩ ዝመስሎም-” ብምባልዩ ዝገልጾ። (1ጢሞ-6/5)

ዝኾነ ኮይኑ ማኅበረ-ምእመናን ስቶኮልም፣ ብዘካየዱዎ ነዊሕን ኣድካምን ጻዕሪ፣ ነቲ ፈተና ሰጊሮም ሓደ ቤተ-ክርስቲያን ከቋቑሙ ምኽኣሎም ክንደይ`ኳ ዘሐጉስ እዩ። እቲ ሕዝቢ“-ብኮሮና-” ከይተዓናቐፈ ብብዝሒ ክመጽእ ዝኸኣለ`ውን፣ መርኣያ ናይዚ ኩሉዚ`ዩ። ከምዚ`ሉ እቲ ቅዳሴ ምስ ተኻየደ ድማ፣ ክልተ ሕፃናት ሥርዓተ-ጥምቀት ተፈጺሙሎም። ብዙኃት ሕፃናትን ዓበይቲ ወለድን`ውን ተሳተፍቲ ቅዱስ-ቁርባን ክኾኑ ክኢሎም። ከምዚ`ሉ ድማ እቲ ናይ “ደብረ-ኣማኑኤል-” ናይ ጽምብል ሥነ-ሥርዓት፣ ብተሳትፎ ማኅበረ-ምእመናን ስቶኮልም ደሚቑን ማዕሪጉን ክፍጸም ክኢሉ።

(ክብሪ ንኣምላኽ፣ ሰላም ንደቂ-ሰብ ይኹን)

ዘኣንበሳ-ማርቆስ