ንቅዱስ እንጦንዮስ ፓትርያርክ ዘሃገረ ኤርትራ ዝድግፍ ሰልፊ ኣብ ከተማ ስቶኮልም ሃገረ ሽወደን ተኻይዱ። እቲ “ንሕና ምስ ኣቦና” ኣብ ትሕቲ ዝብል ቴማ ብቀዳም 3 ነሓሰ 2019 ዝተኻየደ ሰልፊ፣ ውሉደክህነት ናይ ዝተፈላለያ ከተማታትን ምእመናን ዝተሳተፍዎ እዩ ኔሩ። ብተወሳኺ፥ ኣመንትን ወከልትን ካልእ እምነታትን'ውን ተረኸቢቦም ኔሮም። እቲ ሰልፊ ብስም ቅዱስ እንጦንዮስ እኳ እንተተኻየደ፣ ንኹሎም እቶም ኣብ ኤርትራ ስለ እምነቶም ተኣሲሮም ዘለዉ ወገናት ዝውክል’ዩ ክብሉ እቶም ኣዳለውቲ ገሊጾም።

ከምዝዝኸር፥ ብዕለት 17 ሓምለ 2019, እቲ ብፖለቲከኛታት ዝምራሕ "ሲኖዶስ?" ኣብ ዘውጽኦ መግለጺ፣ ንፓትርያርክ ቅዱስ እንጦንዮስ ካብ ቤተ ክርስቲያን ተዋህዶ "ብውግዘት" ፈሊናዮም ኣለና ክብል ዘስደምም መግለጺ ኣውጺኡ እዩ። እቲ ዘይሕጋዊ "ሲኖዶስ?" ዝሃቦ ውግዘት፣ ንሕጊ ቤተ ክርስቲያን ዝገሃሰ፣ ተወሳኺ ታሪኻዊ በደል ኣብ ልዕሊ ቤተ ክርስትያንን ቅዱስ እንጦንዮስን ፈጺሙ ኣሎ።

ይኹን እምበር፥ ኣብ ውሽጢ ኤርትራ ይኹን ኣብ ደገ ሓያል ተቓውሞ ኣጋጢምዎ ኣሎ። ብዘይካ እቲ ብውልቂ ዝግበር ተቓውሞ፥ ገዳማት ኤርትራ ብትሪ ኮኒነንኦ ኣለዋ። ኣብ ስደት ድማ እቲ ዝበዝሐ ክፋል ህዝቢ ኤርትራ ይኹን ኣሓት ኣብያተ ክርስቲያን ኦርቶዶክስ ምሉእ ብምሉእ ናይ ኩነኔ መግለጺ ኣውጺአን ኣለዋ። ቤተ ክርስቲያን ተዋህዶ ሓደ ሕጋዊ ፓትርያርክ ጥራይ ኣለዋ፥ ንሶም ድማ ቅዱስ እንጦንዮስ ፓትርያርክ ዘሃገረ ኤርትራ ጥራይ ምዃኖም መንበረ ጵጵስና ኣህጉራዊ ስብከታት ኣቐድም ኣቢሉ ንህዝቢ ሓቢሩ እዩ። ሕጂውን ህዝቢ ኤርትራ ካልእ ፓትርያርክ ከምዘይቅበል እቲ ብፖለቲከኛታት ዝምራሕ ዘይሕጋዊ "ሲኖዶስ?" ክሓስበሉን ናብ ልቡ ክምለስን በዚ ኣጋጣሚ ነዘኻኽር።

እግዚኣብሔር ንቤተ ክርስቲያን ጽድቂ፥ ፍትሕን ሰላምን ይሃባ። 

ንቅዱስ ኣቡነ እንጦንዮስ 3ይ ፓትርያርክ ዕድመን ጥዕናን ይሃብ፥ ንሃገርና ይባርኽ። ኣሜን።