ከም-ዝፍለጥ ንህብን ሃመማን ተመሳሰልቲ’ዮም። ምውዓሎም ግና ሓደ ኣይኮነን። ከመይሲ ሃመማ ዝርከበሉ ኣድራሻ፥ ኣብ ጎዱፍ ክኸውን ከሎ። ንህቢ ግና ኣብ ቖፎ መዓር’ዩ ዝርከብ። ምርጫ ሰባት’ውን ከምኡ ይፈላለ እዩ። ገሊኦም መንገዲ ዴማስ መሪጾም፥ ናብቲ ባሕሪ-ዓለም ዘሊሎም ብምእታው ክሕምብሱ ከለዉ። ገሊኦም ድማ ብኣንጻሩ መንገዲ ቤት-ኣምላኽ መሪጾም፥ ኣብ ቤተ-ክርስቲያን ምውዓሎም ምሕዳሮም ዝገብሩ ኣለዉ።

ስለዚ ድማ’ዩ ኣርእስቲ-ጽሑፍና “-ትኩላን እሙንቱ ውስተ ቤተ-እግዚኣብሔር-” ክኸውን ዝተመርጸ። እዚ ማለት ድማ “-ንሳቶምሲ ኣብ ቤተ-ክርስቲያን’ዮም ቆይሞም ዝርከቡ-” ከም-ምባል ዘስምዕ እዩ። ብርግጽ ድማ እዚ ኣርእስቲ’ዚ፥ ነዞም በዚ ዕለት’ዚ ብደረጃ ዩኒቬርስቲ ዝምረቑ ዘለዉ፥ ዲያቆናት ደቅና ዝሰማማዕ እዩ።

 ከመይሲ ንሕና’ኳ ከይተዛረብና ስቕ እንተበልና፥ እቲ  ኣገልግሎቶም ቀዲሙና ባዕሉ ክዛረብ ስለ-ዝኽእል። ብዛዕባ’ቲ ንኣገልግሎት ቤተ-ክርስቲያን ዘለዎም መዘና ዘይብሉ ተወፋይነት፥ ክንምስክርሲ ንግደድ ኢና። ከምቲ ኣብ ኣርእስትና ተባሂሉ ዘሎ። ካብ መነባብሮኦም ንላዕሊ፥ ንኣገልግሎት ቤተ-ክርስቲያን ቀዳምነት ብምሃብ፥ ኣብ ቤት-ኣምላኽ ተተኺሎም ዝርከቡ ዘለዉ እዮም፥ ተባሂሎም እንተ-ተገልጹ ዝበዝሖም ኣይኮነን። ንሳቶም ድማ፥

ዲያቆን ዮሓንስ ገብረ-ሕይወት

ዲያቆን ኣማኑኤል ተክለ-ሃይማኖት

እዮም። እዞም ክልተ-ዲያቆናት ኣብ ማንችስተር-ዩኒቨርስቲ፥ ንሓሙሽተ-ዓመት ትምህርቶም ክከታተሉ ድሕሪ ምጽናሕ፥ ኣካዳሚካል-ቲኦሎጂ ድሕሪ ምውዳእ፥ (ፖስት-ግራዱወሽን) ብደረጃ-ማስትረይት ክምረቑ ክኢሎም ኣለዉ። እዚ ዓወት’ዚ ድማ ምንም’ኳ ናታቶም መሲሉ ዝርአ እንተኾነ። ብዓቢኡ ግና ዓወት እታ ውጽዕቲ ቤተ-ክርስቲያንና እዩ። ከመይሲ ብሰንኪ ምሁራን ዘይምህላው፥ እቲ ደምበ-ተዋሕዶና ንከቢድ ሓደጋ ተጋሊጹ ዝርከብ ዘሎ ስለዚ’ዩ።

በቲ ሓደ ሸነኹ እዚ ዓወት’ዚ ክርአ ከሎ። ናይ ማኅበረ-ምእመናን ቤተ-ክርስቲያን መድኃኔ-ዓለም ማንችስተር እዩ ክበሃል’ውን ይከኣል። ከመይሲ እቶም ኣብዚ ቤተ-ክርስቲያን’ዚ ዘለዉ ሕዝቢ። ነዞም ዲያቆናት ከም ወለዲ ኮይኖም፥ ካብ ጎኖም ከይተፈልዩ ሓቝፉሞምን ሓብሒቦሞምን እዮም። ስለዚ ከኣ’ዮም ነቲ ኩሉ ዝሓለፈ ጽንኩር ፈተና ተሳጊሮም፥ ኣብዚ ሕጂ እታ ቤተ-ክርስቲያን በጺሓቶ ትርከብ ዘላ፥ ናይ ዓወትን ሰላምን መድረኽ ክበጽሑ ዝኸኣሉ።  እቶም ኣብዛ ቤተ-ክርስቲያን እዚኣ ዝርከቡ ዲያቆናትን ምእመናንን ብዝገበሩዎ ናይ ሓባር ጻዕሪ ከኣ’ዩ፥ እቲ ሕጂ ተበጺሑ ዘሎ ሰላምን ምርግጋእን ክርከብ ዝኸኣለ።

እምበኣር ማኅበረ-ምእመናን መድኃኔ-ዓለም ማንችስተር፥ ነቶም ዲያቆናት ደቆም ዘለዎም ፍቕርን ኣኽብሮትን ንምግላጽ’ዮም። ሰፊሕ ውራይ ብምግባር፥ ተቐበልቲ ኣጋይሽ ኮይኖም ተዓጢቖም ዝወዓሉ። እቲ ኣብ መንጎ’ቶም ማኅበረ-ምእመናንን፥ እቶም ዲያቆናትን ዘሎ ስጡም ፍቕሪ ከኣ’ዩ፥ ነታ ብኽንደይ ጽንኩር ፈተናታት ዝሓለፈት ቤተ-ክርስቲያን ማንችስተር ፥ ኣብ ዓወትን ሰላምን ከብጽሓ ክኢሉ ዘሎ።

ብዝተረፈ እዞም ክልተ በዚ መዓልቲ’ዚ፥ ብመዓርግ ዝምረቑ ዘለዉ ዲያቆናት ደቅና። እቲ ዝተቐበሉዎ መዓርግ፥ መዓርግ ቅድስናን ዓወትን ክኾነሎም፥ ናይ ኩሉ ኦርቶዶክሳዊ ጸሎትን ትምኒትን እዩ። እግዚኣብሔር ዝኸብረሉን ንሳቶም ዝባረኹሉን ክኸውን ድማ ጸሎት ቤተ-ክርስቲያን እዩ።

ካህን ተክለ-ማርያም ምርካ-ጽዮን 

ሃገረ-ስብከት ኤውሮጳ

More Photos