ካብ ዕለት 1/30/2015 ክሳብ 2/12015 ክብረ በዓል ኦርቶዶክሳዊት ቤክ ቅድስት ድንግል ማርያም ኣብ በይ ኤርያ ብድምቀት ተኸቢሩ። 

ካብ ዝተፈላለየ ክፍልታት ኣመሪካ ተዓዲሞም ንኽብረ በዓል ዝመጹ ሊቃውንትን ከምኡውን ኣብ በይ ኤርያን ከባቢኣን ዝነብሩ ምእመናን ብዘሐጉስ መንፈስ ተኸቢሩ። በዓል ቅድስት ደንግል ማርያም በይ ኤርያ: ብምእመናን ዝተገብረ ናይ ኣቀባብላ ወህደት ኣብ ገጽ ዕዱማት ይንበብ ኔሩ ከምኡውን ኣባላት ኣጋይሾም ንምእንጋድ ዝነበሮም ታሕጓስ ወሰን ኣይነበሮን።

ብሕጽር ዝበለ፥ ዓርቢ ምሸት ብዋዜማ ተኸፊቱ፡ ቀዳም ካብ ወጋሕታ ከኣ ብስብሓታት ዝተጀመረ ከብረ በዓል ቅደስቲ ማርያም ብቅዳሴ ተዛዚሙ። ድሕሪ ቅዳሴ ድማ ብኣቦና ቆመስ ተኽስተ ሰፊሕ ተምህርቲ ብዛዕባ ክብሪ በዓል ኣዴና ድንግል ማርያም ሂቦም። ቀጺሉ፥ ታቦት ብሊቃውንቲ  ተመሪሑ ብምእመናንን ተመሃሮን ተሰንዩ ብሓጎስን ዕልልታን ተሰንዮም ዕደት ኣብቲ ቅጽሪ ቤተክርስትያን ተኻይዱ።

ካብኡ ቀጺሉ ነጋድያን ብሓበራ ኣብ ኣደራሽ ኣትዩም ነቲ ብውሕልነት ኣዴታት ዝተዳለወ ምቁር ምሳሕ ተኻፊሎሞ። ድሕሪ ምሳሕ፥  ብዲያቆን ዶ/ር ብርሃነ ዝተዳለወ ትምህርቲ ብዛዕባ ሽኮርያ (ብዝሒ/ዋሕዲ) ደምን ሳዕቤናቱን ንምእመናን ኣስፍሕ ኣቢሉ ገሊጹ። ካብ ምእመናን ንዝቐረበሉ ሕቶታን ድማ ንኹሉ ዘዕግብ መብሪሂ ሂቡ።  ምእመናን፥ ስለቲ ዝረኸብዎ ጸጋን ዕድልን "ዓመት ንዓመት ይድገመና" እናበሉ ንኣምላኽ ብታሕጓስ ኣመስጊኖም።

እዚ ንራብዓይ ዓመቱ ዝኽበር ዘሎ ክብረ በዓል ኦርቶዶክሳዊት ቤክ ቅድስት ድንግል ማርያም ካብቲ ዝሓለፈ ዓመታት እናዓበየን ኣብ ዝተፈላለየ መንፈሳዊ መደባት እናሰፍሐን ዝኸይድ ዘሎ፥ ሎሚውን ብሕጻናትን ቤትምህርቲ ሰንበትን ዝተዳለወ መዛሙር ንምእመናን ዝመጸጠ እዩ ኔሩ። ሓደ ካብቲ እታ ቤተክርስትያን መደብ ኣውጺኣ እትሰርሓሉ ዘላ ዓቢ መደብ ድማ መደብ ሕጻናት ኮይኑ ዛጊት እቲ መደብ ብዘሕጉስ ጽፈት እንዳሰፍሐ ይቕጽል ኣሎ። እዚ መደብዚ: ሕጻናት ብእምነት ኦርቶዶክሳዊት ቤተክርስትያን ተመልሚሎም እምነት ኣቦታቶም ንኽስዕቡ ብትግርኛን እንግሊዘኛን መጽሓፍ ቅዱስ ዝመሃርሉ መንፈሳዊ መኣዲ እዩ።

ክብሪ ነቲ ሰማይን ምድርን ዝፈጠረ ኣምላኽ ይኹን። ኣሜን።

ኦርቶዶክሳዊት ቤተ ክርስቲያን ቅድስት ማርያም በይ ኤርያ: ካሊፎርንያ፣
ሕ.መ.ኣ 

ስእላዊ መግለጺ ንምርኣይ ኣብዚ ተወከሱ