ትግርኛ

ክርስቶስ ተንሥኣ እሙታን------------በዓቢይ ኃይል ወሥልጣን፡
ኣሰሮ ለሰይጣን-----------------------------ኣግዓዞ ለኣዳም
ሰላም------------------------------------------እምይእዜሰ
ይኩን-----------------------------------------ፍስሓ ወሰላም

   በስመ ኣብ ወወ ልድ ወመንፈ ስቅደስ ኣሓደ ኣምላክ ኣሜን።

ኣብ ፈቐዶ ስደት ኮነ ኣብ ኤርትራ ዘለኹም ክቡራት ምእመናን፣

ጎይታናን መድኃኒናን ኢየሱስ ክርስቶስ ካብ ሙታን ምስ ተንሥኤ ንደቀመዛሙርቱ ዘበሰሮም ቀዳመይቲ ቃል “ሰላም ንኣኻትኩም ይኹን” እትብል እያ። ሰላም ኩሉ ሰብ ይናፍቓን ይምነያን እዩ። ዝያዳ ኩሉ ድማ ንሕና ኤርትራውያን ዝያዳ ንምነያን ንናፍቓን። ምእንቲ ሰላም ተባሂሉ ዘይተኸፍለ ነገር ኣሎ ክበሃል ኣይከኣልን። ጎይታ ግና “ሰላመይ እህበኩም ሰላመይ እሓድገልኩም: እቲ ኣነ ዚህበኩም ሰላም ከምቲ ዓለም እትህበኩም ሰላም ኣይኮነን” ክብል ብዘይሕሶ ቅዱስ ቃሉ ቃል ኣትዩልና እዩ እሞ፡ ኩላትና ኣምላኽ ብሰላሙ ክበጽሓና "ሰላመከ ኀበነ ኣምላክነ” እናበልና ብትግሃት ክንጽልን ናብ ኣምላኽ ክንቀርብን ይግባእ።

ብፍላይ ድማ እዛ ብደሙ ዝዓደጋ ሓዋርያዊት ቅድስት ቤተ ክርስትያን፡ ዋላ እኳ ሰይጣን ኣብ ርእሲኣ ክዕወት ከም ዘይክእል ምሉእ ምትእምማን ኣብ ኣምላኽ እንተ ሃለወና፡ ኣብዚ ጊዜ እዚ እዛ ቅድስት ቤተ ክርስቲያን፡ ሰይጣን ብዘምጽኦ ፈተና፡ ኣብ ከቢድ ፈተና ወዲቓ፡ ርእሲ ቤተ ክርስቲያን ዝኾኑ ቅዱስ ኣቡነ እንጦንዮስ፡ ኣብ ከቢድ ፈተና ይርከቡ ከም ዘለዉ፡ ኩሉ ዝፈልጦ ሓቂ እዩ። መዓርግ ሃይማኖትና ድማ ተደፊሩ።

ኣብዚ ዘመን እዚ ንሓቀኛ እምነቶም ደው ኢሎም ሓዋርያዊ መስዋእቲ ንምዃን ዝተዳለዉ ኣቦ ምህላውና ድማ ሓበን ይስምዓና። ኩሉ ኣማኒ እዚ ሓቂ እዚ ተገንዚቡ፡ ኣብዚ ሰላም ክርስቶስ ዘበሰረሉ እዋን፡ እቲ ዘይድቅስ ጸላኢና ሰይጣን፡ ኣብ ደምበ ቤተ ክርስቲያን፡ ኣብ ክንዲ ሓጎስ ሓዘን ንምእታው ዘይድቅስ ስለ ዝኾነ ኩላትና ብጸሎት ክንነቅሕ ንኡስ ሃገረ ስብከት ሰሜን ኣሜሪካ ለበዋኡ የመሓላልፍ።

እግዚኣብሔር ንሃገርናን ሕዝብናን ሰላምን ቅሳነትን ይሃብ።
ንመላእ ዓለም ሰላም የውርድ።
ቅዱስ ኣቦና፡ ብጥዕናን ሕይወትን ይሓልወልና።

ሃገረ ስብከት ሰሜን ኣሜሪካ,
ኦርቶዶክሳዊት ተዋህዶ ቤተ ክርስትያን-ኤርትራ