ትግርኛ

በስመ ኣብ ወወልድ ወመንፈስ ቅዱስ ኣሓዱ ኣምላክ ኣሜን።

‘ንሓድሕዳ እተፈላለየት… ቤት ትዓኑ።’ ማቴ 12:25።

መግለጺ ቀኖናዊ ኣኅጉረ ስብከታት ተዋሕዶ ቤተ ክርስቲያን ኤርትራ

ከም ዝፍለጥ፥ ኣብ 2005 ኣብ ልዕሊ "ሰማዕት እንበለ ደም" ቅዱስ እንጦንዮስ 3ይ ፓትርያርክ ኦርቶዶክስ ተዋሕዶ ቤተ ክርስቲያን ኤርትራ፥ ዝወረደ ቀኖና ቅድስት ቤተ ክርስቲያን ዝገሃሰ ዓመጽ፡ ዘስዓቦ ጸገም፥ እታ ሓንቲ ዝነበረት ቤተ ክርስቲያን ተኸፋፊላ፥ ኣብ ቃልዕ ብምውጻእ ንሓድሕዳ ክትወጋገዝን ክትወናጀልን ጸኒሓን ኣላን። ቤተ ክርስቲያን ኣብዚ ከቢድ ናይ ምፍልላይ እዋን እንከላ ድማ ኣቡነ ዲዮስቆሮስ ቀዲሞም፥ ሎሚውን ኣቡነ ቄርሎስ፡ ይቕረ ይፍታሕ ከይተበሃሃሉ ብሞት ምፍላዮም ኣዝዩ መሪር ሓዘን ይስምዓና። ኣምላኽ ነፍሶም ይምሓር። ዘሎናሉ እዋን ይትረፍ ተፈላሊኻ፥ ሓቢርካ ንምጉዓዝ'ውን ኣጸጋሚ ዝኾነሉ ዘመን፥ ቤተ ክርስቲያን፡ ነቲ ኣደዳ ስደት፥ ፍልሰትን፥ ኲናትን ኮይኑ ዝበርስ ዘሎ ሕዝብና መዕረፊት ልቡን ቤት-ሰላሙን ክትኮኖ ዘይምኽኣላ ኣዚና ንሓዝን። እዚ ጾር እዚ ድማ ኣብ ዝባን ኩላትና ተጻዒኑ ዘሎ ከቢድ ዕዳን ሓላፍነትን እዩ።

ስለዚ ምእንቲ ድኅነት ሕዝብናን ሓድነት ቤተክርስቲያንናን ክበሃል፥ እቲ ዝሓለፈ ጌጋታት ዳግም ከይድገም፥  ዝተገብረ ምክሳስን ምውንጃልን ምውግጋዝን ኣብቂዑ፥ ደምበ እግዚኣብሔር ኣብ ሓደ መጓሰ ክጥመር፥ ሰላም ኣብ ቤተ ክርስቲያንን ሃገርን ክሰፍን፥ ሥርዓትን ቀኖናን ቤተ ክርስቲያን ዝተኸተለ መንገዲ ናይ ሓድነትን ዕርቅን ሰላምን ጉባኤ ክካየድ፥ ብስም ቅድስት ቤተ ክርስቲያን መንፈሳዊ ጻውዒትና ነቕርብ።

እግዚኣብሔር ሰላሙ የብዝኃልና

ቀኖናዊ ኣኅጉረ ስብከታት ናይ ኤርትራ ኦርቶዶክስ ትዋሕዶ ቤተ ክርስቲያን ኤርትራ

ኅቡራት መንግሥታት ኣሜሪካ፥ ኤውሮጳን ማእከላይ ምብራቕን።

13 ታሕሳስ 2022 | ታሕሳስ ፬, ፳፻፲፭ ዓመተ ምሕረት።