ትግርኛ

ክርስቶስ ተንሥኣ እሙታን--------------> በዓቢይ ኃይል ወሥልጣን
ኣሰሮ ለሰይጣን------------------------> ኣግዓዞ ለኣዳም
ሰላም---------------------------------> እምይእዜሰ
ይኩን---------------------------------> ፍስሓ ወሰላም።

በስመ ኣብ ወወልድ ወመንፈስ ቅዱስ ኣሓዱ ኣምላክ። ኣሜን።

ክቡራንን ክቡራትን ምእመናን ኣብ ውሽጥን ወጻእን። እንቋዕ ናብዚ ቅዱስ በዓል ትንሣኤ ጐይታናን መድኃኒናን ኢየሱስ ክርስቶስ ኣብጽሓና።

ሱባኤና ብሰላም ኣፈጺሙ፡ ናብዚ ዝተቐደሰን ዝተባረኸን፡ በዓለ ትንሣኤ፡ ዘብጽሓና ኣምላኽ

ክብርን ምስጋናን ይኹኖ። ኣብዚ ዝሓለፈ ሱባኤ፡ ዝተገብረ ጾምን ጸሎትን፡ ዝበጽሐ ወዳሴን ቅዳሴን እግዚኣብሔር ይቀበሎ። ኣሜን።

ወይእዜኒ ክርስቶስ ቀደመ ተንሥኦ፡ እምኵሎሙ ሰብእ እሙታን። ሕጂ ግና፡ ክርስቶስ ካብ ምዉታት ተንሥA፡ በዚ ከኣ ናይቶም ዝሞቱ በኹሪ ትንሣኤ ኮነ።” ፩ ቈረንቶስ ፲፭፡፳።

መድኃኒ ዓለም ክርስቶስ ንድኅነት ደቂ ኣዳም ሥጋ ለቢሱ፡ ኣብ እፀ መስቀል ምስ ሞተን ምስ ተቐብረን፡ ኣብ ሣልሳይ መዓልቱ፡ መግነዝ ፍትሑለይ፡ መቓብር ክፈቱለይ ከይበለ ብኃይሊ ኣምላኽነቱ፡ ብገዛእ ርእሱ፡ ተንሥA። እዚ ትንሣኤ እዚ ናይቲ ኣብ መወዳእታ ዓለም ዚኸውን ትንሣኤ ዘጉባኤ፡(ናይ ኃባር ትንሣኤ) በኹሪ እዩ። ጐይታናን ኣምላኽናን ኢየሱስ ክርስቶስ ካልኣይ ሞት ዘይብሉ፡ ሓንሳእን ንሓዋሩን እዩ ተንሢኡ። በዚ ድማ፡ ነዞም ኣብ ዳግማይ ምጽኣተ ክርስቶስ ሓንሳብን ንሓዋሩን፡ እንትንሥእ፡ በኹሪ ትንሣኤ ኮነና። “ወበከመ በእንተ ኣዳም ኩልነ ንመውት፡ ከማሁ በክርስቶስ ኩልነ ንሓዩ። ወኩሉ ሰብእ በበሥርዓቱ፡ ቀዳሚ ክርስቶስ ውእቱ ዘተንሥኣ እሙታን ወእምዝ እለ በክርስቶስ በምጽኣቱ።” “ከምቲ ኩላቶም ብኣዳም ዝሞቱ፡ ከምኡ ድማ ኩላቶም ብክርስቶስ ሕያዋን ክኾኑ እዮም፡ ግናኸ ነፍሲ ወከፍ፡ በብመስርዑ እዩ። ቅድም ክርስቶስ፡ ከም በኹሪ፡ ደሓር ኣብ ዳግማይ ምጽኣት እቶም ናይ ክርስቶስ ዘበሉ።” ፩ ቈረን.፲፭፡ ፳፪- ፳፫።

ኣብ ትንሣኤ ዘጉባኤ (ናይ ሓባር ትንሣኤ) ጻድቃንን ኃጥኣንን ኩሎም፡ ምውታት ኪትንሥኡ እዮም። እንተ ኾነ ከምቲ ቅዱስ ወንጌል “ ወበእንተ ዝንቱሰ፡ ኢታንክሩ እስመ ትመጽእ፡ ሰዓት ዘይሰምእዎ ቃሎ ኵሎሙ እለ ውስተ መቃብር፡ ወይወጽኡ፡ እለ ሠናይ ገብሩ ውስተ ትንሣኤ ዘለሕይወት፡ ወእለሰ፡ እኩየ ገብሩ፡ ውስተ ትንሣኤ፡ ዘለደይን” “ ኣብ መቓብር፡ ዘለው ኩሎም፡ ድምጹ ዚሰምዑላ ሰዓት ክትመጽእ እያ፡ ጽቡቕ ዝገበሩ፡ ናብ ትንሣኤ ሕይወት፡ ክፉእ ዝገበሩ ናብ ትንሣኤ ፍርዲ፡ ክወጹ እዮም እሞ፡ በዚ ኣይትደነቑ።” ዝበሎ እዩ። ዮሓ. ፭- ፳፰- ፳፱።

እምበኣር ናብ ትንሣኤ ሕይወት፡ ክንትንሥእ በቲ ጐይታና ኢየሱስ ክርስቶስ ምስ ተሰቕለ ካብ የማናይ ጎድኑ ዝፈሰሰ፡ “ማየ ጎቦ” ዮሓ. ፲፱፡ ፴፬ ተጠሚቕና ተኻፈልቲ ሞቱን ትንሣኤኡን ክንከውን ይግብኣና።

“ወዘንተ ባህቱ፡ ኣእምሩ ኵልክሙ፡ ከመ እለ ተጠመቅነ፡ በእግዚእነ ኢየሱስ ክርስቶስ፡ ውስተ ሞቱ ተጠመቅነ፡ ወተቀበርነ፡ ምስሌሁ፡ ውስተ ጥምቀት፡ በሞቱ ከመ በከመ ውእቱ ክርስቶስ ዘተንሥኣ፡ እሙታን በስብሓተ ኣቡሁ ከማሁ፡ ንሕነኒ ናንሶሱ ውስተ ሓዳስ ሕይወት።” “ እቶም ብክርስቶስ ዝተጠመቕና፡ ዘበልና ኩላትና፡ ብሞቱ፡ ከም ዝተጠመቕናዶ ኣይትፈልጡን ኢኹም። እምበኣር ከምቲ ክርስቶስ ብኽብሪ ኣቦ ካብ ምውታት ዝተንሥA፡ ከምኡ ከኣ ንሕና፡ ብሓዳስ ሕይወት፡ ምእንቲ ክንነብር፡ ብጥምቀት ምስኡ ሞትናን ተቐበርናን።” ሮሜ. ፮ ፡ ፫- ፬።

ከምኡውን “ ዘበልዓ ሥጋየ፡ ወሰትየ ደምየ፡ ቦ ሕይወት ዘለዓለም ወኣነ ኣነሥኦ በደሓሪት እለት” “ ሥጋይ ዚበልዕ ደመይውን ዚሰቲ ናይ ዘለዓለም ሕይወት ኣላቶ፡ ኣነውን በታ ዳሕረይቲ መዓልቲ ከተንሥኦ እየ።” ዮሓ. ፮፡ ፶፬። ዝበለና ቅዱስ መጽሓፍ፡ ተቐቢልና፡ ናይ ሕይወት ትንሣኤ ንኽንትንሥእን፡ ዘለዓለማዊ ሕይወት ንኽንረክብን፡ ትእዛዝ ኣምላኽ የፈጽመና።

ቅዱስ በዓል ትንሣኤ፡ ርሑስ ዓውደ ዓመት ይግበረልና።

ከምዚ ንዓመታ፡ ብሓጎስ ብጥዕና የብጽሓና።

እንበለ ደውየ ወሕማም፡ እንበለ ጻዕር ወድካም፡ በፍስሓ ወበሰላም ኣመ ከመ ዮም ያብጽሓነ፡ ያብጽሕክሙ እግዚኣብሔር።

ሃገርና ክልልት በግርማ፡ ሕጽርት በመንፈስ ቅዱስ ትኩን ኣሜን።

ጸጋሁ፡ ለእግዚእነ ኢየሱስ ክርስቶስ ምስሌክሙ፡ ወፍቅረ ዚኣየ ምስለ ኩልክሙ፡ በክርስቶስ ኢየሱስ ኣሜን ፩ ቈረ. ፲፮፡ ፳፫- ፳፬

ኣኃዊነ ጸልዩ ለነ። ፩ ተሰሎ. ፭ ፡ ፳፭

ቅዱስ እንጦንዮስ ቀዳማዊ ፓትርያርክ ወርእሰ ሊቃነ ጳጳሳት ሃገረ ኤርትራ

እዚ፣ አቡነ እንጦንዮስ ፓትርያርክ ቤተ ክርስትያን ተዋህዶ ብ2005 ዓ.ም.ዝለኣኽዎ ቃል ቡራኬ እዩ። ንምሉእ ትሕዝቶ'ቲ ጽሑፍ ኣብዚ ተወከስ።