“ጸዊዖም ድማ፡ ብስም ኢየሱስ ንሓደ’ኳ (ወንጌል) ከይነግሩ ወይ ከይምህሩ ኣዘዝዎም። ጴጥሮስን ዮሃንስን ግና፡ ‘ንሕናስ ነቲ ዝረኣናዮን ዝሰማዕናዮን ምዝራቡ ኽንሓድግ ኣይኰነልናን’ዩ’ሞ፡ ካብ ንኣምላኽ ንኣኻትኩም ምእዛዝ ኣብ ቅድሚ ኣምላኽ ቅኑዕ እንተ ዀይኑስ፡ እስኪ ባዕላትኩም ፍረዱ’ በልዎም።” ግብ 4፡18-20

እዚ ሰንበት’ዚ ራብዓይ ሰንበት ናይ’ዚ ዘለናዮ ዘመነ-ጽጌ’ዩ። ነዚ ዕለት’ዚ ተሰሪዑ ዘሎ መዝሙር-ሰንበት ድማ “በጊዜሁ ኀለፈ ክረምት” (ክረምቲ ብግዚኡ ሓለፈ) ዘርእስቱ’ዩ። ነዚ መዝሙር’ዚ መሰረት ብምግባር ዝተሰርዑ ንባባት ሓድሽ ኪዳን ሓደ ኸኣ፡ ናይ ግብ 4፡3-ፍጻመ ንባብ’ዩ። ክረምቲ፡ ንዘራእቲ ናብ ፍረ ኣብጺሕዎ’ዩ ዚኸይድ። ሰብን ዘራእትን ድማ ዓብይ ምምስሳል ኣለዎም። ጐይታና ኣዘውቲሩ ብዛዕባ ኣእዋምን ዘራእትን ዚገልጹ ምስላታትን ኣስተምህሮታትን ዚጥቀመሉ ዝነበረ ምኽንያት ከኣ ንሱ’ዩ (ማቴ 13:3-9፣ ሉቃ 3:9) ። ንርእሱ’ቲ ናይ’ዚ ዕለት’ዚ ንባብ ቅዱስ ወንጌል (ዮሃ 4፡34-49)፡ ብዛዕባ ቀውዕን ፍርያቱን ዚዛረብ’ዩ። ኣብ’ዚ ንባብ’ዚ ጐይታና ከም ምግቡ ዚቘጽሮ፡ እቲ ንጊዚኡ ኣገልጊሉ ንደገ ዚኸይድ ምግቢ-ስጋ ዘይኰነስ፡ ንፍቓድ ኣቦኡ ምእዛዝ ምዃኑ ገሊጹልና ኣሎ። ንሕና ግን ምእዛዝ ከም መሰረታዊ ድልየትና፡ ከም ምግብና ዘይኰነስ፡ ሓሞት ኪሰትይ ከም ዝተኣዘዘ ሰብ ዓቕልና’ዩ ዜጽብበልና። እቲ ናይ’ዚ ዕለት’ዚ ናይ መዝሙረ ዳዊት ምስባክ’ውን፡ ናይ ሓደ ጻድቕ ሰብ ህይወት ከም ናይ ስየ ልምላመ፡ ከም ናይ ጽሕዲ ሊባኖስ ዕብየት ከም ዜርእይ ዚገልጽ’ዩ። ኣትክልቲ፡ በቝጽልቶምን ብፍሪኦምን’ዮም ልምላመኦምን ህያውነቶምን ዜርእዩ። ሓደ ሰብ ከም ዝጸደቐ ዚረጋገጽ ድማ ንፍቓድ ርእሱ ገዲፉ ንፍቓድ ኣምላኽ ኪግዛእን፡ በቲ ናይ ምእዛዝ ባህርዩ ድማ እናዓበየ ኪኸይድ ከሎን’ዩ። እቶም ነዚ ዘስተውዓሉ ኣቦታትና ቅዱሳን ሃዋርያት ድማ፡ ኣብ መጋባእያ ናይ’ቶም ጨካናት ዋዕላ ኣይሁድ ደው ኢሎም፡ ነዚ ሓቂ’ዚ ተኣሚኖም’ዮም። መሪሕ ጥቕስና ኣመልኪቱና ኸም ዘሎ፡ ንኣምላኽ ምእዛዝ ኪሓድግዎን ኪበዅሩሉን ዘይክእሉ ተልእኾ ህይወቶም ምዃኑ ብትብዓት ገሊጾም ኣለዉ። ዝዀነ ዓይነት ምፍርራህ ኰነ ስጕምቲ ንኣምላኽ ካብ ምእዛዝ ኪዓግቶም ከም ዘይክእል ብምግላጽ ዘይሃስስ ኣርኣያ ሓደጉልና። እዚ ኣገላልጻ’ዚ ምስ’ቲ ልዕል ኢልና ዝረኣናዮ ናይ ጐይታ ኣገላልጻ ምሉእ ስኒት ዘለዎ’ዩ። እምበኣር ቅኑዕ ተኣዝዞ፡ ትእምርቲ (ምልክት) ናይ መንፈሳዊ ልምላመናን ዕብየትናን፡ ከምኡ’ውን መንፈሳዊ ምግብናን ናይ ህይወት ተልእኾናን ምዃኑ ምእንቲ ኸነስተውዕሎን ከነተግብሮን፡ እዚ ናይ’ዚ ዕለት’ዚ ኣርእስቲ ተሰሪዑልና ኣሎ።

ቅኑዕ ተኣዝዞ እንታይ ማለት’ዩ፧ ዘይቅኑዕ ተኣዝዞኸ ኣሎ ማለት ድዩ፧ ብርግጽ ኣሎ። ቅዱሳን ሃዋርያት ነቲ ቕኑዕን ዘይቅኑዕን ተኣዝዞ ንምንጻር’ዮም ነዚ ኣብ መሪሕ ጥቕስና ዘሎ ቓል ዝተዛረቡ። ነዞም ኣቦታትና ሃዋርያት ክልተ ዓይነት ትእዛዝ’ዩ ዝተዋህቦም። ክልተ ንሓድሕዶም ዚገራጨዉ ትእዛዛት ከኣ’ዮም። እቲ ዝዓበየን ቀዳማይን ትእዛዝ፡ እቲ ብጐይታናን መድሓኒናን ኢየሱስ ክርስቶስ ዝተዋህቦም፡ ወንጌል ንዅሉ ሰብ ናይ ምስባኽን መሰኻኽሩ ናይ ምዃንን ትእዛዝ’ዩ። እቲ ኻልኣይ ትእዛዝ ድማ በቶም ኣብ’ታ ሃገር ዓብዪ ስልጣን ዝነበሮም ዋዕላ ወይ ባይቶ ኣይሁድ ዝተዋህበ ናይ ሰብ ትእዛዝ’ዩ። ነዞም ቅዱሳት ሃዋርያት ዝገጠሞም ከቢድ ፈተና፡ እቲ ብኣምላኽን ብሰብን ዝተዋህቦም ትእዛዛት ንሓድሕዱ ዚጋጨው ተጻራሪ ትእዛዛት ምዃኑ’ዩ። ትእዛዝ ጐይታ “ኪዱ ንገሩ፡ ኪዱ መስክሩ” ዚብል ኪኸውን ከሎ፡ ትእዛዝ ዋዕላ ኣይሁድ ድማ፡ “ንሓደ’ኳ ኸይትነግሩን ከይትምህሩን” ዚብል’ዩ። ልቦናን መንፈሳውነትን ናይ’ቲ ትእዛዝ ዝተቐበለ ሰብ፡ ኣብ ከም’ዚ ዝበለ ፈታንን ኣዋጣርን ህሞት’ዩ ዚገሃድ። ጐይታና ንኸም’ዚ ዘመሰለ ፈታኒ ዅነታት ዚምልከት ግሩም ቃል ነጊሩና ኣሎ።

“ንኽልተ ጐይተት ኪግዛእ ዚኽእል የልቦን። ወይ ነቲ ሓደ ጸሊኡ፡ ነቲ ሓደ ይፈትው፡ ወይ ከኣ ነቲ ሓደ ተኣዚዙ ነቲ ሓደ ይንዕቕ። ንኣምላኽን ንገንዘብን ክትግዝኡ ኣይኰነልኩምን’ዩ።” ማቴ 6፡24 (ሉቃ 16፡13)

ኣብ’ዚ ደኣ ብዛዕባ ኣምላኽን ገንዘብን ተዛሪቡ’ምበር፡ ነቲ “ገንዘብ” ዚብል ቃል፡ “ሰብ” ወይ’ውን “ሰይጣን” ኢልካ ኽትሓስበሉ ይከኣል’ዩ። ንኣብነት፡ ኣብ’ዛ ነቦታትና ሃዋርያት ገጢማቶም ዝነበረት ፈተና፡ ናይ ገንዘብ ጕዳይ የብላን። ናይ ሰብን ናይ ሃይማኖትን ጕዳይ ጥራሕ’ዩ ዘለዋ። ስለ’ዚ ንትእዛዝ ናይ’ቲ ዋዕላ ኣይሁድ ኪእዘዙ እንተ መሪጾም፡ ንሰብ ፈትዮም ንኣምላኽ ጸሊኦም፡ ወይ ከኣ ንሰብ ፈሪሆም ንኣምላኽ ንዒቖም ኣለዉ ማለት’ዩ። ስለ’ዚ ናይ ምእዛዝን ዘይምእዛዝን ጕዳይ ጥራሕ ዘይኰነስ፡ ካልእ ዝዓበየን ዝኸበደን መልእኽቲ ዘለዋ ጕዳይ’ውን ትኸውን ኣላ። ነቲ ጕዳይ ብኸም’ዚ ኣስፊሕካን ኣዕሚቝካን እንተ ዘይርኢኻዮ፡ ናብ ግጉይ መደምደምታን ስጕምትን ገጹ ኼጽድፈካ ይኽእል’ዩ። ንሰባት ፈሪህካ ነቲ ብኣምላኽ ዝተዋህበካ ትእዛዝ እንተ ኣፍሪስካዮ’ሞ፡ ነቲ ወንጌል ናይ ምስባኽ ተልእኾኻ እንተ ገዲፍካዮ፡ ጽባሕ ኣብ ቅድሚ መንበር ፍርዲ ክርስቶስ እትፍረደሉ ገበን፡ “ንኣምላኽ ምጽላእን ምንዓቕን” ድማ’ምበር፡ ምእዛዝ ወይ ዘይምእዛዝ ጥራሕ ኣይከውንን’ዩ። እምበኣር፡ እቲ “ቕኑዕ ተኣዝዞ” ዚበሃል፡ ንሰብ ዘይኰነ ንኣምላኽ ምእዛዝ’ዩ። “ዘይቅኑዕ ተኣዝዞ” ዚበሃል ድማ፡ ንኣምላኽ ገዲፍካ ንሰብ ምእዛዝ’ዩ።

ንምንታይ ኢና ንሰብ ዘይኰነ ንኣምላኽ ክንእዘዝ ዚግብኣና፧ እዚ ሕቶ’ዚ፡ ብደጋዊ ትርኢቱ፡ እምብዛ መባእታዊ ኺመስል ይኽእል’ዩ። ብግብሪ ግን እምብዛ ዓብይን ከቢድን ሕቶ’ዩ። ምኽንያቱ ነዛ ሕቶ’ዚኣ ዚኸውን ብቑዕ መልሲ ስለ ዘይብልና ኢና፡ ባሮት ሰብን ጸላእቲ ኣምላኽን ኴንና ኽንነብር ዚገብረና ዘሎ። ኣብ’ቲ መልሓስና’ኳ ኣምላኽ ካብ ሰብ ከም ዚዓብይ እንተ ተኣመንና፡ ኣብ’ቲ ናብራና ግን “ሰብ ካብ ኣምላኽ ይዓብይ” ብዚብል መርገጺ ኢና ንነብር። ዝዀነ ነገር ክንውስንን ክንገብርን ከለና፡ “ሰብ እንታይ ኰን ይብለኒ፧” እምበር፡ “ኣምላኽ እንታይ ኰን ይብለኒ” ዚብል ሓሳብ ኣይቅልቀለናን’ዩ። ስለ’ዚ ክንዝምው፡ ክንሰርቕ፡ ክንቀትል፡ ሰባት ከነካፍእ ከለና፡ ካብ ዓይኒ ሰብ ክንሕባእ ዚከኣለና ዅሉ ጻዕሪ ንገብር። እቲ ንሕና ዘይንርእዮ ኣምላኽ፡ ኣዒንቱ ኣፍጢጡ ይርእየናን ይሰምዓናን ከም ዘሎ ግና፡ ፈቲና ንርስዖ ወይ ፈቲና ንኽሕዶ ማለት’ዩ። ሰብ እንተ ረኣየና’ኳ፡ ኣብ ልዕሌና ኺገብሮ ዚኽእል ኣዝዩ ንእሽቶን ጊዝያውን’ዩ። እምብዛ እንተ ተጠንቂቕናስ፡ ዋላ ዕድመና ምሉእ ከይተረኣናን ከይተፈለጥናን ክንነብር ንኽእል ኢና። እግዚአብሔር ግና ኵሉ ዚፈልጥ፡ ኣብ ኵሉ ዚርከብ፡ ኵሉ ዚኽእል ኣምላኽ’ዩ። ዝገበርና እንተ ገበርና’ኳ ካብኡ ኽንሕባእ፡ ከነምልጥ፡ ከነታልሎ፡ ክንጥብሮ ኣይከኣልን’ዩ። ልዕሊ ዅሉ ድማ ዘለኣለማዊ ኣምላኽ ምዃኑ ኺርሳዕ ኣይግብኦን’ዩ። ስለ’ዚ ብዛዕባ ሓጢኣትካ፡ ብዅሉ ከኣልነቱን ብዘለኣለማውነቱን፡ ዝኸበደን ናይ ዘለኣለምን ፍርዲ ኼውርደልካ ይኽእል’ዩ። ስለ’ዚ ኽልተ ተጻራሪ ትእዛዛት ካብ ክልተ ተጻረርቲ ኣካላት ኪመጻካ ኸሎ፡ ነየናይ ክትእዘዝ ከም ዚግብኣካ ርዱእ’ዩ። ጐይታና ነዚ ሓቂ’ዚ ምእንቲ ኼብርሃልና፡

“ነቲ ንነፍስን ስጋን ኣብ ገሃንም ኬጥፍእ ዚከኣሎ (ኣምላኽ) ደኣ ኣዚኹም ፍርህዎ’ምበር፡ ነቶም ንስጋ (ጥራሕ) ዚቐትሉ፡ ንነፍሲ ግና ምቕታላ ዘይከኣሎም (ሰባት) ኣይትፍርህዎም።”

ኢሉ መሃረና (ማቴ 10፡28)። እዚ ኣበሃህላ’ዚ ንተኣዝዞና ብዚምልከት፡ ንሰልጣንን ሓይልን ናይ’ቲ ዝኣዘዘ ኣካል ኣብ ግምት ዘእተወ ውሳነ ኽንውስን ከም ዚግብኣና ዜመልክተና’ዩ። ሰብ እንተ ሓሰመ  ኣብ ሰብነትና ጥራሕ’ዩ ኺስልጥን ዚኽእል። ንሳ’ውን መስፈር ሓጢኣቱ ምእንቲ ኺመልእ እግዚአብሔር እንተ ፈቒዱሉ ጥራሕ’ዩ’ምበር፡ ካብ ጸጕሪ ርእስና ሓንቲ ኼውድቕ’ኳ ስልጣንን ዓቕምን የብሉን። እግዚአብሔር ግን ኣብ ስጋና ጥራሕ ዘይኰነ ኣብ ነፍስና’ውን፡ ኣብ’ዛ ዓለም’ዚኣ ጥራሕ ዘይኰነ ኣብ’ታ እትመጽእ ዓለም ኣብ ገሃነም’ውን፡ ንሕጂ ጥራሕ ዘይኰነ ንዘለኣለም’ውን፡ ምሉእ ስልጣን ዘለዎ ኣምላኽ ምዃኑ፡ መባእታዊ ፍልጠት ጥራሕ ዘይኰነ፡ ኣጸቢቕና እንኣምነሉ ምሉእ ርድኢት ኪህልወና ይግባእ። ቅዱሳን ነብያትን ሃዋርያትን፡ ነቲ ኸነልዕሎ ዚግብኣና ዜርብሓና ምርጫ ኣመልኪቶምና’ዮም።

“ስለ’ዚ ተቢዕና፡ ‘እግዚአብሔር ረዳእየይ’ዩ፡ ኣይክፈርህን’የ፡ ሰብከ እንታይ ከይገብረኒ’ ንበል።” እብ 13፡6 (መዝ 118፡6,8,9)

“ኣነ፡ ኣነ’የ ዘጸናንዓኩም፡ ንስኻኸ ካብ’ዚ መዋቲ ሰብ ካብ’ዚ ኸም ሳዕሪ ዚሓልፍ ወዲ ሰብ እትፈርህሲ መን ኢኻ፧ ነቲ ንሰማያት ዝገተረ፡ ንምድሪ ኸኣ ዝሰረተ፡ ነቲ ዝፈጠረካ እግዚአብሔር ረሳዕካዮ። ኵሉ ጊዜ፡ ኵሉ መዓልቲ ኻብ ነድሪ ናይ’ቲ ንምጥፋእ እተዳለወ ገፋዒ (ሰብ) ትፈርህ ኣለኻ፡ ነድሪ ናይ’ቲ ገፋዒ ደኣ ኣበይ ኣሎ፧”  ኢሳ 51፡12,13

“በቲ ዝፈርሃሉ ጊዜ ኣባኻ እውከል።...ኣብ ኣምላኽ ተወኪለ ኣይፈርህን፡ ሰባትከ እንታይ ከይገብሩኒ።” መዝ 56፡3,4,11

“እግዚአብሔር ብርሃነይን ምድሓነይን’ዩ፡ ካብ መን ደኣ’የ ዝፈርህ፧ እግዚአብሔር ሓይሊ ሓይሊ ህይወተይ’ዩ፡ ካብ መንከ’የ ዝስምብድ፧ ......... ኪቃወመኒ ኢሉ’ኳ ሰራዊት እንተ ዚሰፍር ልበይ ኣይፈርህን’ዩ። ኲናት’ውን እንተ ዚለዓለኒ፡ እምነት ኣሎኒ።” 27፡1,3

ስለ’ዚ ንኣምላኽ ጥራሕ’ምበር ንሰብ ፈጺምና ኽንእዘዝ ኣይግብኣናን ማለት ድዩ፧ ኣይፋልናን። ንሰብ ክንእዘዝ ግቡእናን ሓላፍነትናን’ዩ። እቲ ንኣምላኽ ምእዛዝ፡ ኣብ’ቲ ንሰብ ምእዛዝ ኢና እንረኽቦን እንዕወተሉን። ስለ’ዚ ኸኣ፡ “ብፍርሃት ክርስቶስ ንሓድሕድኩም እዙዛት ኩኑ” ዚብል ሃዋርያዊ ትእዛዝ ተዋህበና (ኤፌ 5፡2 ካ.ት)። ንሓድሕድና ዘይንተኣዛዘዝ እንተ ዄንና’ሞ፡ እቲ ህይወትና ምስ ናብራ ዘይቍጸር፡ ኣቦኡ ዘፍለጠ ውግእ’ዩ ኪኸውን።

እቲ ሓቂ እዚ ኻብ ኰነ፡ ክንእዘዞ ዚግብኣናን ክንእዘዞ ዘይግብኣናን፡ ናይ ሰብ ትእዛዛት ኣሎ ማለት’ዩ። ብዝሒ ትእዛዛትና ኽንዲ ብዝሒ ሰብና ስለ ዝዀነ፡ ነቲ ሰብ ኪህቦ ዚኽእል ዓይነት ናይ ትእዛዛት ንዅሉ ኽንዝርዝሮ ኣይንኽእልን ኢና። ስለ’ዚ ነቲ ምስ ትእዛዛት ኣምላኽ ዘይጋጨው ዝዀነ ዅሉ ትእዛዛት ሰብ ክንእዘዞ ይግብኣና ጥራሕ ዘይኰነስ፡ ግዴታና’ዩ። ልዕል ኢልና ኣብ ዘንበብናዮ ጥቕሲ ከም ዝረኣናዮ፡ ንሓድሕድና ኽንተኣዛዘዝ ከለና፡ ብፍርሃት ሰብ ተደሪኽና ዘይኰነስ፡ ብፍርሃት ኣምላኽ ተደሪኽና ኽንገብሮ’ዩ ዚግባእ። ንሰብ ክንእዘዝ እግዚአብሔር ዘይደልይ እንተ ዚኸውን፡ ብናቱ ፍርሃት ተደሪኽና ኽንገብሮ ኣይምኣዘዘናን ነይሩ። ስለ’ዚ ብቕኑዕ ተኣዝዞ ኽንመላለስ እንተ ዄንና፡ ነቲ ብሰብ ዝተዋህበና ትእዛዝ ቅድሚ ምፍጻምና፡ መጀመርታ ብዓይኒ ትእዛዝ ኣምላኽ ክንጥምቶን ክንምርምሮን ይግብኣና። ምስ ትእዛዝ ኣምላኽ ዚሰማማዕ ምስ ዚኸውን፡ ከይተማታእናን ከየመሳመስናን ንምፍጻሙ ኽንፈጥን ይግባእ። ምስ ትእዛዝ ኣምላኽ ዚቃረን ምስ ዚኸውን ግና፡ ብድርቅናን ብድፍረትን ዘይኰነ ብፍርሃት ኣምላኽ ተደሪኽና፡ ንኽብሪ ናይ’ቲ ዚእዝዝ ዘሎ ሰብ ከይገሃስና፡ ብትሕትና፡ “ምስ ትእዛዝ ኣምላኽ ዚቃረን ስለ ዝዀነ ኽገብሮ ፍቓደኛ ኣይኰንኩን፡” ዚብል ምቕሉልን መንፈሳውነት ዝመልኦን መልሲ ብምሃብ ክንነጽጎ ይግባእ። መሪሕ ጥቕስና ኣመልኪቱና ኸም ዘሎ፡ ኣቦታትና ሃዋርያት ነቶም ዘይግባእ ትእዛዝ ዝሃብዎም ሰባት ኣይደፈርዎምን። ብኣንጻሩ ነቲ ዝደንዘዘ ሕልናኦም ዜበራብር ውርዙይን መሃርን መልሲ ደኣ ሃብዎም። እቲ ዚእዝዝ ዘሎ ሰብ ወላዲኻ፡ መዋስብትኻ፡ ሓላፊኻ፡ መሳርሕትኻ፡ መራሕ ሃገር፡ መራሕ ሃይማኖትካ ኪኸውን ይኽእል’ዩ። ዝዀነ ዓይነት ሰብ እንተ ዀነ ብዘየገድስ፡ ካብ’ቲ ዝፈጠረካ ኣምላኽ ኣይዓብይን’ዩ። ንትእዛዙ እነኽብሮ፡ ምስ ትእዛዝ ኣምላኽ ዚቃደው ክሳዕ ዝዀነ ጥራሕ’ዩ።

ኣዳም ናብ ሓጢኣት ዝወደቐ፡ ነቲ ምስ ትእዛዝ ኣምላኽ ዚቃረን ትእዛዝ ሄዋን ስለ ዘኽበረ’ዩ። እግዚአብሔር ድማ በዚ ተግባሩ’ዚ’ዩ ዝነቐፎን ዝረገሞን (ዘፍ 3፡17)። ያእቆብ፡ ነቲ ናይ ኣዲኡ ርብቃ፡ ነቦኡ ብምትላል ምርቓ ናይ ሓዉ ኺሰርቕ ዝሃበቶ ሕማቕ ምኽሪ ብምፍጻሙ ንእግዚአብሔር ስለ ዝበደለ፡ ጓሳ ዓሰባ ዀይኑ ንልዕሊ ዕስራ ዓመታት ብውርደትን ጸበባን ሓለፈ (ዘፍ 27፡1-45)። ኣቦና ኣብርሃም፡ ንትእዛዝ ሰበይቱ ሳራ ሰሚዑ ምስ ትእዛዝ ኣምላኽ ዚቃረን ምስ ኣጋር ዝሙት ፈጺሙ ድቓላ ወዲ ወለደ። እቲ በዚ ዝጐሃየ እግዚአብሔር ከኣ ንዓሰርተው ሰለስተ ዓመታት ዚኣክል ኣይተዛረቦን፡ ኣይተገልጸሉን ከኣ። ዘርኢ ናይ’ቲ ዝተወልደ ድቓላ ውሉድ ድማ ነቲ ዘርኢ ተስፋ ዝዀነ ወዱን ዓሌቱን ክሳዕ ሕጂ ጸላእቱ ዀይኖም ይነብሩ ኣለዉ (ዘፍ 16፡1-6,16 ፣ 17፡1)። እቲ ናብ ንጉስ የሮብዓም ዝተላእከ ናይ ኣምላኽ ሰብ ትእዛዝ ኣምላኽ ኣፍሪሱ፡ ትእዛዝ ሰብ ስለ ዘኽበረ ዝረኸቦ መዓት ኣብ 1ነገ 13፡1-30 ተተሪኹልና ኣሎ።

ብኣንጻሩ፡ እቶም እሙናትን ብቑዓትን ሹማምንቲ መንግስቲ ባቢሎን ዝነበሩ ኣርባዕተ ኣይሁዳውያን መንእሰያት፡ በቶም ጨካናት ነገስታት ባቢሎንን ሜዶ-ፋርስን ንጣኦታዊ ሓወልቲ ኺሰግዱ ጽኑዕ ትእዛዝ ምስ ተዋህቦም፡ ምስ ትእዛዝ ኣምላኾም ዚጋጨው ትእዛዝ ስለ ዝነበረ፡ ነቶም ብዅሉ ዚእዘዝዎም ዝነበሩ ነገስታት “ኣይንእዘዝን፡ ኣይንሰግድን” ኢሎም ኣቕበጽዎም። ናብ ሓውን ናብ ጕድጓድ ኣናብስን ድማ ተደርበዩ። እንተ ዀነ፡ እግዚአብሔር ካብ ሃልሃልታ ሓውን ኣፍ ኣናብስን ኣድሒኑ፡ ኣብ ማእከል ኣረማውያን ኣህዛብ ንስሙ ኣኽበረ (ዳን 3፡1-27 ፣ 6፡1-28)። ንጉስ ነቡካድነጻር፡ ትብዓት ናይ’ቶም ሰለስተ መንእሰያትን፡ ናይ’ቲ ልዑል ኣምላኽ ግብሪ ምድሓንን ምስ ረኣየ፡ ብኸም’ዚ ዚስዕብ መስተንክር ምስክርነት ሃበ።

“እቲ ነቶም ባሮቱ መልኣኹ ሰዲዱ ዘናገፎም ኣምላኽ ሲድራቅን ሚሳቅን ዓብድ-ኔጎን ይባረኽ። ንሳቶም ኣብኡ ተወኪሎም (ንእኡ ተኣዚዞም) ትእዛዝ ንጉስ (ምፍጻም) ኣበዩ። ብዘይ ንኣምላኾም ንኻልኦት ኣማልኽቲ ኸየምልኹን ከይሰግዱንሲ ስጋኦም ወፈዩ።” ዳን 3፡28

ስለ’ዚ ህይወትካ መስዋእቲ ኽሳዕ ምግባር፡ ንትእዛዝ ኣምላኽ ክትውፍየሉ ኸም ዚግባእ እዞም ቅዱሳን መንእሰያት ዘይሃስስ ኣርኣያ ሂቦምና ኣለዉ።

ኣብ ዘመን ናይ’ቲ ዓለወኛ ንጉስ፡ ሳኦል፡ ካልእ ድሙቕ ኣርኣያ ዝገደፉልና፡ ዓቀይቶት ናይ’ቲ ንጉስ’ውን ኣለዉ። “ንዳዊት ተሓባቢርኩምዎ” ብምባል ንሰማንያ ኤፎድ ዝተዓጥቁ ካህናት ኪቐትልዎም ንወተሃደራቱ ምስ ኣዘዞም፡ እቶም ወተሃደራት “ኣይንገብርን” ኢሎም። ነቲ ኪቐትሎም ስልጣን ዝነበሮ ንጉስ ኣቕበጽዎ። ነቲ ናይ ሰማይ ንጉስ ንኣምላኽ ስለ ዝፈርሁ’ዮም፡ ንትእዛዝ ንጉሶም ዝገሃስዎ። እቲ ነቶም ካህናት ዝሓሰወሎም ዘይእስራኤላዊ (ኤዶማዊ) ወተሃደር፡ ነቶም ካህናት ኪቐትሎም ሳኦል ምስ ኣዘዞ ግን፡ ፍርሃት ኣምላኽ ዘይብሉ ኣረማዊ ስለ ዝነበረ፡ ንሰማንያ ካህናት ብሓንቲ ሴፍ ኣብ ሓደ እዋን ኣጽነቶም (1ሳሙ 22፡17,18)። ዜሕዝንን ዜሕፍርን ትዕድልትና ዀይኑ ድማ ኦርቶዶክስ ተዋህዶ ቤተ ክርስትያን ኤርትራ፡ ትእዛዝ ሰብን መንግስትን ምእንቲ ኬኽብሩ ንትእዛዝ ኣምላኽን ሕጊ ቤተ ክርስትያንን ኣፍሪሶም፡ ንገዛእ ፓትርያርኮምን ኣቦኦምን ብዜውግዙን ብዚቐትሉን ውጉዛት ጳጳሳትን ካህናትን ትምራሕ ኣላ። መዘዝ ናይ’ዚ ኣነዋሪ ዕልወትን ክሕደትን’ዚ ሕጂ’ውን ይድህከና’ኳ እንተ’ሎ፡ ንመጻኢ ዓመታትናን ወለዶታትናን ተዓቝሩ ዘሎ መዓት ድማ እግዚአብሔር ጥራሕ’ዩ ዚፈልጦ።

እቲ ንሰብ እንፍጽሞ ቅኑዕ ተኣዝዞ፡ ንኣምላኽ ከም ምእዛዝ ዚቝጸረልና፡ ብኸመይ ዝበለ ኣገባብ እንተ ተኣዘዝና’ዩ፧ ክብሪ ንኣምላኽ ይኹን፡ ነዚ ምስጢር’ዚ ቅዱሳን ሃዋርያት ብብሩህን ዘየወላውልን መገዲ ኣብሪሆምልና’ዮም። እዚ ናይ ተኣዝዞ ኣገባብ’ዚ ኣብ ኵሉ ዓይነት ዝምድናታት ዚሰርሕ ውጽኢታዊ ኣገባብ’ዩ። ቅዱስ ጳውሎስ ብኸም’ዚ ዚስዕብ ኣስፊርዎ ይርከብ።

“ኣትን ኣንስቲ፡ ከም ንጐይታ ጌርክን ንሰብኡትክን ተኣዘዛኦም።” ኤፌ 5፡22 (ቈሎ 3፡18)።

“ኣቱም ውሉድ፡ እዚ ቅኑዕ’ዩ’ሞ፡ ንወለድኹም ብጐይታ ተኣዘዝዎም።” ኤፌ 6፡1

“ኣቱም ውሉድ፡ ንጐይታ ባህ ዜብሎ ንሱ’ዩ’ሞ፡ ንወለድኹም ብዅሉ ተኣዘዝዎም።” ቈሎ 3፡20 ካ.ት

“ኣቱም ግዙኣት (ኣቱም ሰራሕተኛታት)፡ ነቶም ብስጋ ጐይተትኩምሲ . . .ከም ንክርስቶስ ጌርኩም ተኣዘዝዎም። ከም ግዙኣት ክርስቶስ ኴንኩም፡ ነቲ ፍቓድ ኣምላኽ ካብ ልቢ እትገብርዎ ደኣ’ምበር፡ ንሰብ ባህ ከም እተብሉ ብገጽርአ ኣይኰነን። ንሰብ ዘይኰነስ ከም ንጐይታ ጌርኩም፡ ብፍታው ተገዝእዎም። ባርያ ዀነ ጭዋ ዀነ ሰናይ ዝገበረ (ዝተኣዘዘ) ኻብ ጐይታ ኸም ዚቕበሎ ፍለጡ።” ኤፌ 6፡5-8

“ኣቱም ግዙኣት፡ ነቶም ብስጋ ጐይተትኩም ዝዀኑ፡ ብገጽርአ ንሰብ ባህ ከም እተብሉ ጌርኩም ዘይኰነስ፡ ብግሩህ ልቢ ንእግዚአብሔር እናፈራህኩም ተኣዘዝዎም። ነቲ ዓስቢ ርስቲ ኻብ ጐይታ ኸም እትቕበልዎ ፈሊጥኩም፡ እትገብርዎ ዘበለ ንሰብ ዘይኰነስ ንጐይታ ኸም እትገብርዎ ጌርኩም፡ ካብ ልቢ ግበርዎ፥ ንጐይታና ክርስቶስ ኢኹም እትግዝእዎ ዘለኹም።” ቈሎ 3፡22-24

ካብ’ዚ ሃዋርያውን ህያውን ቃል’ዚ ኸም እንርድኦ’ምበኣር፡ ዋላ’ቲ ንኸማና ሰብ እንእዘዞ ምእዛዝ፡ ልክዕ ከም’ቲ ንክርስቶስ ክንእዘዞ ኸለና እንገብሮ ጌርና ብፍርሃት ኣምላኽ ተደሪኽና ኽንገብሮ’ዩ ዚግባእ። በዚ ኣገባብ’ዚ እንተ ዘይፈጸምናዮ፡ እቲ ምእዛዝና ከም ዘይምእዛዝ’ዩ ዚቝጸረልና። ምኽንያቱ ምእንቲ ሰብ ኢልካ ዚግበር ናይ ገጽ-ርአ ተኣዝዞ፡ ጐደሎ ኣብ ርእሲ ምዃኑ፡ ክብሪ ዘይብሉ ፈኲስ ተግባር’ዩ። ምእንቲ ጐይታ ኢልናን ንጐይታ ኸም ዚበቅዕ ጌርናን ስለ ዘይንገብሮ፡ ካብ ኣምላኽ ዝዀነ ዓይነት ጻማ ኣይንረኽበሉን ኢና። እኳ ደኣ ብኣንጻሩ፡ ከም ሓጢኣት’ዩ ዚቝጸረልና። ምኽንያቱ ዅሉ ሰናይ ተግባር፡ ንእኡን ምእንትኡን ኢልካ ኺግበር እናተገብኦ፡ ንሰብ ኢልካ እንተ ገበርካዮ፡ “ካብ ኣምላኽ ሰብ ይዓብይ” ዝመልእኽቱ እኩይ ተግባር’ዩ ዚኸውን። ስለ’ዚ ንሓደ ተግባር “ቅኑዕ ተኣዝዞ” ዚገብሮ ብዓይነት ናይ’ቲ ተግባር ጥራሕ ዘይኰነ፡ ብድርኺቱን (ምእንቲ መን ኢልካ ትገብሮን)፡ ብብቕዓቱን (ንመን ከም ዚበቅዕ ጌርካ ትገብሮን) ድማ’ዩ። እቲ ምእንቲ ጐይታ ኢሉን ንጐይታ ኸም ዚበቅዕ ገይሩን ንሰብ ዚእዘዝ፡ ንሰብን ንጐይታን የሐጕሶም። እቲ ምእንቲ ሰብ ኢሉ ጥራሕ ዚገብር ግን፡ ምናልባት ነቲ ሰብ ኬሐጕሶ ይኽእል ይኸውን ነቲ ዝነዓቖ ጐይታ ግን ኬሐጕሶ ፈጺሙ ኣይክእልን’ዩ። ኵሉ ዓይነት ሰብኣዊ ዝምድናታትና ዚበላሸወናን ዚበታተኸናን ዘሎ፡ ካብ ኵሉ ተግባራትና ንኣምላኽ ስለ ዘግለልናዮ’ዩ። ኵሉ ተግባርና ንጐይታ ኢልና ንገብር እንተ ንኸውን፡ ሓዳርና ናይ ጽድቂ ሓዳር፡ ቤትና ድማ ኣምላኽ ዚኸብረላ ቤተ ክርስትያን ምዀነት። ስራሕና’ውን መንፈሳዊ ኣገልግሎት ምዀነልና ነይሩ። ንኣምላኽ ዘየማእከለ፡ ምእንቲ ኣምላኽ ኢልካ ዘይትነብሮ ናብራ፡ ስጋዊ ናብራ ጥራሕ ዘይኰነስ፡ ሰይጣናዊ ናብራ’ዩ ዚኸውን። እምበኣር ኣብ ኵሉ ተግባራትናን ዝምድናታትናን፡ ኵሉ ጊዜ ነዘን ዚስዕባ ሰለስተ ኣገዳስቲ ሕቶታት እናሓተትና ንዋሳእ።

1. እዚ ዝገብሮን ዝብሎን ዝዀኖን ዘለኹ ብርግጽ ኣምላኽ ዝኣዘዞ ድዩ፧

2. ምእንቲ ኣምላኽ ኢለ ድየ ዝገብሮ ዘለኹ፧

3. ንኣምላኽ ከም ዝበቅዕ ገይረዶኸ እገብሮ ኣለኹ፧

ነዘን ሕቶታት’ዚኣተን እወታዊ መልሲ ምስ ዚህልወና፡ ብርግጽ ኣብ’ቲ “ቅኑዕ” ዚበሃል ናይ ኣምላኽ መስመር ቌምና ኸም ዘለና ሚእቲ ሚእታዊት (100%) ርጉጽ ሓቂ’ዩ። ነዚ ዝዓይነቱ ህይወት ካብ’ዛ እዋን’ዚኣ ጀሚርና ንንበሮ። ከምኡ እንተ ገበርና ኣብ ማእከል’ዚ ንኣምላኽ ብዜሰክሕ ርኽሰት ዚመላለስ ዘሎ ዘማውን ቄናንን ዓለወኛን ወለዶ’ዚ ኣበር ዘይብሎም ናይ ኣምላኽ ቅዱሳን ክንከውን ኢና። እምበኣር ምርጫና ነጸብቕ። ቅኑዕ ናብራ ናይ ቅኑዕ ምርጫ ውጽኢት’ዩ። እግዚአብሔር ናይ ነጻ ምርጫ መሰል ብምሃብ ኣኽቢሩና’ዩ’ሞ፡ ነቲ ቕኑዕ ብምምራጽ ክብርና ንሓልው!!

ጸጋ ጎይታና ኢየሱስ ክርስቶስን ፍቕሪ ኣምላኽን ሕብረት መንፈስ ቅዱስን ምስ ኩላትና ይኹን።

ኦርቶዶክሳዊት ተዋህዶ ቤተ ክርስቲያን ኤርትራ - መንበረ ጵጵስና ሰሜን ኣሜርካ።