ናይቲ ኣብቲ ሓዋርያዊ-ሰንሰለት ጸኒዑ ዝርከብ ዘሎ መንበር፣ ዓቃቤ-መንበር ዝኾኑ ብፁዕ ኣቦና ኣቡነ-መቃርዮስ፣ ብድሕሪ ጀርመን ቀጺሎም ዝኸዱዎ ሃገረ-ስብከት ስዊስዘርላንድ እዩ። በዚ መሠረት`ዚ ድማ ብዕለት 27/09/2021 ከተማ-ባዝል ክኣትዉ ክኢሎም።

ኣብቲ ናይ ከተማ-ባዝል መዕረፍ-ባቡራት ከኣ፣ ቤተ-ክህነትን ተወከልቲ ማኅበረ-ምእመናንን ተረኺቦም፣ ቡራኬኦም ብምቕባል መስቀሎም ተሳሊሞም ተቐቢሎሞም። በዚ ኣገባብ`ዚ ከኣ ኣብቲ ኣቐዲሙ፣ ከዕርፉሉ ተባሂሉ ዝተመደበ መዕረፍ-ኣጋይሽ በጺሖም። ቡራኬኦም ደልዮም ንዝመጹ ብዙሓት ምእመናን`ውን ክቕበሉ ኣምስዮም።

ቀዳም ዕለት 02/10/2021 ድማ፣ ብፁዕነቶም ገባሬ-ሠናያት ኮይኖም ዝመርሑዎ ቅዳሴ፣ ኣብ ከተማ-ባዝል ተኻይዱ። ብዙሓት ሕፃናትን ማኅበረ-ምእመናንን`ውን፣ ተሳተፍቲ መኣዲ ቅዱስ-ቁርባን ብምዃን፣ ተሳተፍቲ ሰማያዊ በረኸትን ጸጋን ክኾኑ ክኢሎም። ኣብ መንጎ`ዚ ድማ ብፁዕ ኣቦና፣ ንዲያቆን ተስፋ-ማርያም ከሰተ መዓርገ-ክህነት ብምሃብ ባሪኾሞም። እቲ ጉባኤ ቤተ-ክርስቲያን ድማ፣ “-ይደልዎ-” ብዝብል ጣዕመ-ዜማ ሓጎሱ ብምግላጽ፣ ተሳታፊ`ቲ በዓለ-ሢመት ክኸውን ክኢሉ። ነቶም ዝተሾሙ መንእሰይ ካህን`ውን፣ እግዚኣብሔር ኣምላኽ ኣገልግሎቶም ክባርኽ ተመንዩሎም።

 “-ስለቲ ብክርስቶስ-ኢየሱስ ዝተዋህበኩም ጸጋ-ኣምላኽ፣ ብዛዕባኹም ኩሉ ግዜ ንኣምላኸይ አመስግን ኣሎኹ-” ዝብል ኃይለ-ቃል መንቀሊ ብምግባር`ውን፣ ብፁዕነቶም ግሩም ተባሂሉ ክግለጽ ዝኽእል ስብከተ-ወንጌል ኣስሚዖም። (1ቆሮ-1/4)

ብድሕሪ ቅዳሴ ድማ፣ ብልግሲ ማኅበረ-ምእመናን ባዝል ኣብ ዝተዳለወ መኽፈልቲ፣ ኩሉ`ቲ ኣብቲ ቤተ-ክርስቲያን ዝነበረ ሕዝቢ ክሳተፍ ክኢሉ። ብድሕሪ`ዚ ድማ እቲ ዝነበረ ጠቕላላ ኣገልግሎት፣ “ስብሓት-ለኣብ” ዝብል ጸሎተ-ምስጋና ብምብጻሕ፣ ነቲ ልዑለ-ባህርይ ዝኾነ ዘለዓለማዊ-ኣምላኽ፣ ክብርን ምስጋናን ብምቕራብ ክዛዘም ክኢሉ።

ንጽባሒቱ እቲ መደብ ኣብ ዙሪክ ዝተባህለ ከተማ`ዩ ከም-ዝቕጽል ተገይሩ። በዚ መሠረት`ዚ እውን ካብ ከተማ-ባዝል፣ ናይ ሓደ-ሰዓት ናይ መኪና ጉዕዞ ድሕሪ ምግባር`ዮም፣ብፁዕ ኣቡነ-መቃርዮስ ኣብቲ ዝተባህለ ከተማ ክበጽሑ ዝኸኣሉ። ኣብዚ`ውን ካብ ኩሉ መኣዝን ዝመጹ ብዙኃት ማኅበረ-ምእመናን`ዮም ንብፁዕ ኣቦና ዝተቐበሉዎም። ጸሎተ-ኪዳን ብምብጻሕ`ውን እቲ መደብ ከም-ዝጅመር ኮይኑ።

በዚ መሠረት`ዚ እውን ብፁዕ ኣቦና፣ ናብቲ ዘሎ ህልው ኩነታት ቤተ-ክርስቲያን ብምትኳር`ዮም፣ መልእኽቶም ዘመሓላለፉ። ከም ኣበሃህላ ብፁዕ ኣቦና እዚ ሕጂ ዘሎ እዋን፣ ቤተ-ክርስቲያንና ብከቢድ ፈተና እናተፈተነት ትሓልፈሉ ዘላ እዋን`ዩ። እዚ ማለት ድማ ምንም`ኳ ገና ብመጀመርታኡ`ውን፣ ነፃነት ነይሩዋ እትበሃል እንተ-ዘይኮነት፣ ካብ 1998 ዓ/ም(2006) ጀሚራ ግና፣ እቲ ኣብ ሃገርና ዘሎ ፖለቲካዊ-ሥርዓት፣ ምሉእ ብምሉእ ዝተቘጻጸራ ኮይና ትርከብ ምህላዋ፣ ዓለም ብዓለሙ ዝፈልጦ ናይ ኣደባባይ ምስጢር`ዩ።

ከመይሲ ኣብዚ ዝተባህለ እዋን፣ ነቶም ሕጋዊ ፓትርያርክ ኣቡነ-እንጦንዮስ ኣብ ትሕቲ ቀይዲ ብምእታው፣ ካብ ቀኖና ቤተ-ክርስቲያን ወጻኢ፣ ባዕሉ ፓትርያርክ ዝሸይም ኮይኑ ምርካቡ፣ ክሳብ ክንደይ ዓቐኑ ዝሓለፈ ግህሰተ ሕጊ፣ ኣብ ልዕሊ ቤተ-ክርስቲያን ተዋሕዶ፣ ብቐጻሊ እናተፈጸመ ይርከብ  ከም-ዘሎ፣ ካብዚ ዝዓቢ ክቐርብ ዝኽእል ካልእ መርትዖ ኣሎ ክንብል ኣይንኽእልን።

ሕጂ`ውን እንተኾነ ክሳብ`ዛ ሰዓት እዚኣ፣ እቲ ኣብ ልዕሊ ቤተ-ክርስቲያን ተዋሕዶ ዝፍጸም ዘሎ፣ ፖለቲካዊ ምትእትታው ከቋርጽ ብዘይ ምኽኣሉ፣ ነቲ ብቅድስና ዝጥመት ሥርዓተ-ቀኖና ብምስዓር፣ ክልተ ግዜ ዘይሕጋዊ ምርጫ-ፓትርያርክ ክገብር ተርእዩ እዩ። እዚ ኩሉ `ዚ እናተፈጸመ ከኣ፣ ንሕና ከም ደቂ ኦርቶዶክሳዊት ቤተ-ክርስቲያን መጠን፣ ደቂስና ክንሓድር ኣይንኽእልን ኢና። ስለ`ዚ ከኣ ኢና በዚ ዓቢይ ዝኾነ ጉዳይ`ዚ፣ ምስ ሕዝብና ክንዘራረብ ኣብ ዑደት ንርከብ ዘሎና-”  ብምባል`ዮም ብፁዕ ኣቡነ-መቃርዮስ መልእኽቶም ዘስምዑ።

እቲ ኣብ ማኅበረ-ምእመናን ተዋሕዶና ዘሎ ንቕሓት ግና፣ ነቲ ኣብ ልዕሊ ቤተ-ክርስቲያኑ ብቐጻሊ ዝፍጸም ዘሎ፣ ናይ ፖለቲካ ጸቕጢ ንክርድኦ ዝጽገም ዘሎ ኮይኑ`ዩ ዝርአ ዘሎ። እዚ ከኣ ርእሱ ዝኸኣለ ናቱ ጸገም ስለ-ዘለዎ፣ እቲ ሕዝቢ ይሕመየሉ`ዩ ዝበሃል ኣይኮነን። ከመይሲ መን ምስ መሃሮን፣ መን ምስ ነገሮን`ዩ እሞ ክፈልጥ ዝኽእል-? ንዝብል ሕቶ፣ እቲ ክወሃብ ዝኽእል መልሲ ግልጺ ስለ-ዝኾነ፣ እቲ ኣሎ ዝበሃል ድኽመት፣ ኣባና ኣብቲ ውሉደ-ክህነት እንተ-ዘይኮይኑ፣ እቲ ሕዝቢ ዝሕመየሉ ምኽንያት ኣሎ ክበሃል ኣይከኣልን።

ብዝኾነ ኣብዚ ጉባኤ`ዚ ካብቲ ሕዝቢ ዝቐረበ፣ ዝተፈላለየ ሕቶታት ነይሩ`ዩ። ግዳስ ካብቲ ኣዚዩ ኣገዳሲ ዝኾነ፣ ህልዊ ኣጀንዳ ቤተ-ክርስቲያን ንዘይምውጻእ፣ እቲ መድረኽ ካብዚ ወጻኢ ኮይኑ ክርከብ ስለ ዘይተደልየ፣ ኣብቲ ኣብ ቤተ-ክርስቲያን ዘሎ ጸገም፣ ዕቱብ ጠመተ ብምግባር ናይ ሓባር ጻዕሪ ክግበር`ዮም ብፁዕ ኣቦና ዘተሓሳሰቡ። ብርግጽ እቶም ኣብ ኣሥመራ ዘለዉ ኩሎም፣ ናይቲ ፖለቲካ መጋበሪ ብምዃን፣ ብሓላፍነት ተሓተቲ ኮይኖም ኣብ ሕጊ ቀሪቦም፣ ዝሕተቱሉ ግዜ ርሑቕ ክኸውን ኣይክእልን`ዩ።

“-እቲ ካልእ ካብዚ ወጻኢ ዘሎ ውሉደ-ክህነት ግና፣ ፓትርያርክነት ኣቡነ-እንጦንዮስ ዝቕበል ኮይኑ እናሃለወ፣ ዝፈላለየሉ ምክንያት ክህልዎ ኣይግባእን። ስለዚ ንድኅነት ቤተ-ክርስቲያን ክበሃል፣ ኩሉ ፍልልያት ንጎኒ ተገዲፉ ኣብ ትሕቲ ሓንቲ ጽላል  ተጠርኒፉ ክርከብ፣ ኣማራጺ ዘይብሉ ጉዳይ ምዃኑ ምርዳእ የድሊ። ብዝተረፈ ብሰንኪ ናትና ናይ ደቃ ዘይምርድዳእ፣ ቤተ-ክርስቲያን ንዝኸፍአ ሓደጋ ክትጋለጽ ኣሕሊፍና እንተደኣ ሂብናያ፣ ጽባሕ ኣብ ቅድሚ እግዚኣብሔር፣ ብሓላፍነት  ዘሕትት ገበን ኮይኑ ክርከብ ከም-ዝኽእል፣ ክንዝንግዕ ኣይግባእን-”  ብምባል ብፁዕ ኣቦና፣ ንሕልና ነፍስ ወከፍ ክዂሕኩሕ ዝኽእል መልእኽቲ`ዮም ዘስምዑ።

ብድሕር`ዚ እቲ ኣብ ስዊስዘርላንድ ክግበር ዝተመደበ ዑደት ስለ-ዝተፈጸመ፣ ብፁዕ ኣቦና ናብ ዓባይ-ብሪጣንያ ኣቢሎም`ዮም ኣቕኒዖም።

ይትባረክ እግዚኣብሔር ኣምላከ ኣበዊነ ሥቡሕኒ ውእቱ ወልዑልኒ ውእቱ ለዓለም

(ዘኣንበሳ-ማርቆስ)

ሓዋርያዊ-ዑደት ብፁዕ ኣቡነ-መቃርዮስ ኣብ ሃገረ-ጀርመን