“ንስኻስ ክትጸውም ከለኻ፡ ጽዋማይ ምዃናካ በቲ ኣብ ሕቡእ ዘሎ ኣቦኻ ደኣ’ምበር፡ ብሰብ ምእንቲ ኸይትርአ፡ ርእስኻ ተለኸይ፡ ገጽካውን ተሓጸብ፡ እቲ ብሕቡእ ዚርእይ ኣቦኻ ድማ ብግህዶ ኪኽሕሰካ’ዩ።” ማቴ 6፡17,18።

እዛ ሰንበት እዚኣ ቅድስት ተባሂላ እያ ትስመ። ነዚ ናብ ካልኣይ ሰሙን ንኣትወሉ ዘለና፡ ናይ ዓብዪ ጾም (ጾመ-ኣርብዓ) ቅንያት ተሰሪዖምልና ኻብ ዘለዉ ንባባት ቅዱስ ወንጌል ሓደ፡ እዚ ተመሪጹ ዘሎ ኣርእስትን መሪሕ ጥቕስን’ዩ። ምጻምና ጥራሕ ዘይኰነ፡ ብኸመይ ንጸውምን ንመን ኢልና ንጸውምን ምፍላጥ’ውን ኣዝዩ ኣገዳሲ’ዩ። ከቢድ ጾም ብምጻም ዝኸፈልናዮ ኸቢድ መስዋእቲ ንመን ኢልና ኽንጾሞ ኸም ዚግብኣናን ብኸመይ ክንጾሞ ኸም ዚግብኣና ሰኣን ምፍላጥና፡ ጻማ ዘይብሉ ኸንቱ ጾም ክንገብሮ፡ ካብኡ ሓሊፍና’ውን ፍርዲ ብዜስዕበልና መገዲ ኽንፍሞ ዚከኣል’ዩ። ቃል እግዚኣብሔር፡ “ህዝበይ ሰኣን ፍልጠት ይጠፍእ” ከም ዝበለ፡ ብሰሪ ዘይምፍላጥና ንድሕነት ዝሓሰብናዮ ንጥፍኣት ኪዀነና ልዑል ተኽእሎ ኣሎ። ንጾም ጥራሕ ዘይኰነ ንዅሉ ተግባርና እነማእዝነሉ መምርሒ ኣብቲ ቕዱስ መጽሓፍና ብንጹር ሰፊሩልና ስለ ዘሎ፡ ሰኣን ፍልጠት ዓስቢ እንስእነሉን ርእስና እነጥፍኣሉን ዋላ ሓንቲ ምኽንያት የልቦን። ስለዚ ንጾም ዚኣክል ዓብዪ ስነ-ምግባር ከነንቅድ ከለና። ንጾምና ዕዉት እንገብረሉን ርእስና ካብ ዕንቅፋት እነድሕነሉን ፍልጠት ሰኒቕና ኽንጅምሮ ግቡእ’ዩ። ጾምና ጀሚርና ኽሳዕ እንፍጽም ድማ ነዞም ጠቐምቲ ረቛሒታት መዓልቲ መጸ እናዘከርና ልብናን ተግባርናን ክንፍትሽ ይግባእ።

ሰብ ግና ብተለምዶ፡ ነየናይ ግብሩ’ዩ ተሓቢኡ ዚገብሮ፧ ብባሕርያዊ ኣተሓሳስባ ወዲ ሰብ፡ ሰብ ክፉእ ተግባር ኪገብር ከሎ’ምበር ሰናይ ተግባር ኪፍጽም ከሎ ኪሕባእ ኣየድልዮን’ዩ። ብኣንጻሩ ነቲ ጽቡቕ ተግባሩ ኼወዓውዖ’ዩ ዚመርጽ። ምኽንያቱ ኻብቶም ጽቡቕ ተግባሩ ዝረኣዩ ኣካላት ዚምጠወሉ ሞሳን ኣኽብሮትን ኣድናቖትን ዓብዪ ሓጐስ’ዩ ዚፈጥረሉ። ነቲ ተግባሩ ንበይኑ ከም ተግባር ዘይኰነስ፡ በቲ ኣብ ሰባት ዚፈጥሮ ተምሳጥን ጦብላሕታን’ዩ ዚመዝኖ። እዚ ድማ ካብ ህጻንነትና ጀሚርና ዝቐሰምናዮ ነዊሕን ጽዑቕን ስልጠና’ዩ። እዚ ብሰብ ዚወሃና ስልጠና ግና፡ ጐደሎን ምስቲ ናይ ኣምላኽ ኣካይዳን ምርጫን ዘይሰማማዕን’ዩ። እቲ ዜሰልጥነና ውልቀ ሰብን ሕብረተ ሰብን፡ ኣብ ቅድሚ ዓይኑ ንዘጋጠሞ’ምበር ብሕቡእ ንዝተፈጸመ ነገር ኪፈልጥ ስለ ዘይክእል፡ ዝተማልአ ስልጠና ኺህብ ኣይክእልን’ዩ። ስለዚ ኣብ ትሕቲ ሰብ ክንስልጥን ከለና፡ ከክፉኡ ብሕቡእ፡ ጸጽቡቑ ግን ብግሁድ ምግባር ኢና እንመሃር። እቲ ዜሰልጥን ኣካል፡ ዚበዝሕ ጊዜ ብሕቡእ፡ ንዝወሓደ ጊዜ ኸኣ ብግሁድ እኩይ ኪገብር ከሎ ብወዝቢ ስለ ዚርከብ፡ ነቲ ስልጠናኡ ብስልጣን ኣየካይዶን’ዩ። ምኽንያቱ ጕድለት ከም ዘለዎ ስለ ዚፈልጥ ምሉእ ትብዓት የብሉን። እዚ ናይ ትብዓት ጕድለት’ዚ ድማ፡ ዋላ ብቘልዑ ኸይተረፈ ተነባቢ’ዩ።

እቲ ዜሕዝን ግና፡ እዚ ልማድ’ዚ ዋላ ኣብቲ መንፈሳዊ ጕዳያትና ኸይተረፈ ኸነንጸባርቖ ንፍትን ምዃንና’ዩ። እግዚኣብሔር ዘይከም ሰብ፡ ብሕቡእ ጥራይ ዚርእይ፡ ኵሉ ዚፈልጥ ኣብ ኵሉ ዚርከብ፡ ልብን ኵላሊትን ዚምርምር፡ ከውሊ ዘይክውሎ፡ ጸልማት ዘይጽልምቶ ኣምላኽ ምዃኑ ፈቲና ንርስዖ። ስለዚ ምስ ኣምላኽ ልክዕ ከም ምስ ሰብ ጌርና ኽንዋሳእ ንሓስብ። እዚ ድኹምን እኩይን ሃቓና’ዚ ድማ ዋላ ነቲ ዝጸበቐ ምሩጽ ተግባርና ኸንቱ ይገብሮ። ስለዚ ምስ ኣምላኽ ብመንፈሳዊ ስነ-ምግባር ክንዋሳእ ክንሕልን ከለና፡ በቲ ምስ ሰብ እንዋስኦ ዓይነት ጌርና ኸይንዋሳእ ክንጥንቀቕ ይግብኣና። ምኽንያቱ ንኣምላኽ ከም ሰብ ጌርና እንተ ቐሪብናዮ፡ ገና ኸይጀመርና ኸለና ንመንነቱን ንዓቕሙን ስለ ዘቃለልናሉ፡ በቲ ብድሕሪኡ እነስዕቦ ስነ-ምግባር ከነቘጥዖ’ምበር ከነሐጕሶ ኣይከኣልን ጥራሕ ዘይኰነስ ኣይሕሰብን እውን’ዩ።

እግዚኣብሔር ንጾምና ዀነ ንኻልእ ኩሉ መንፈሳዊ ስነ-ምግባራትና፡ ብሕቡእ ክንገብር ዚደልየሉ ምኽንያት እንታይ’ዩ፧ ጾም ዝኣዘዘ በይኑ እግዚኣብሔር ስለ ዝዀነ፡ ንጾምና ብዚምልከት ንዝዀነ ኻልእ ኣካል ጣልቃ ኸነእትው ኣይግባእን’ዩ። ብኣንጻሩ’ኳ ደኣ፡ ዋላ ኸይደለኻዮ’ውን ሰባት ብወዝቢ ከይዕዘቡና ልዑል ጥንቃቐ ኽንገብር ይግብኣና። ምኽንያቱ ሰባት ኣብ ዘይምልከተና ጕዳይ እናኣተና፡ ንኣምላኽ ክብሩን ስልጣኑን፡ ንሰብ ከኣ ጻማኡ ናይ ምስራቕን ምዕናውን ልማድ ኣሎና። ስለዚ ንጕዳይ ጽድቂ ብዚምልከት፡ ንሰብ እቲ ዝዓበየ ጸላኢኡን ፈተናኡን ባዕሉ ሰብ’ዩ። ካብቲ ኸም ዘራፊ ተዅላ ዀይኑ ዓስብና ኺዝርፈና ተዳልዩ ዘሎ ሰብ ምእንቲ ኼድሕነና ኸኣ’ዩ፡ ጐይታና፦

“ጽድቅኹም፡ ኣብ ቅድሚ ሰብ ምእንቲ ኽትረኣዩ፡ ከይትገብሩ ተጠንቀቑ። እንተ ዘይኰነስ ካብቲ ኣብ ሰማያት ዘሎ ኣቦኹም ዓስቢ የብልኩምን።”

ብምባል ዝመዓደና1። ናይ ፈሪሳውያንን ሰዱቃውያንን ዝዓበየን መሰረታውን ጸገም፡ ብሰብ ክትረኣይ ምድላይ’ዩ። ጐይታና ንጸገሞም ኪገልጽ ከሎ፡ “ኵሉ ግብሮም፡ ሰብ ምእንቲ ኺርእዮም ይገብሩ” ብዚብል ቃል ኣጠቓሊልዎ ኣሎ2። ስለዚ እዞም ሰባት ከይተረድኦም ናይ ኣምላኽን ኣምልኾን ለውጢ ገይሮም ኣለዉ ማለት’ዩ። እግዚኣብሔር ዝኣዘዞ ትእዛዝ ንሰብ ኬርእዮ ዚደልዮ ምዃኖም ንኣምላኽ ዘይኰነስ ንሰብ የምልኹ ከም ዘለዉ የቃልዖም ኣሎ። እዚ ኸኣ ኣቦኡ ዘፍለጠ ኣምልኾ ጣኦት’ዩ። ስለዚ ኸኣ’ዮም ኣብ ዓይኒ ጐይታን ኣብ ዓይኒ ኣቦን ፍንፉናት ኰይኖም ዝተረኽቡ። ጐይታ ድማ፦

“እቲ ኣብ ቅድሚ ሰብ ዓብዪ መሲሉ ዚርአ፡ ኣብ ቅድሚ ኣምላኽ ፍንፉን እዩ እሞ፡ ንስካትኩም ርእስኹም ኣብ ቅድሚ ሰብ ተጽድቑ ኢኹም፡ ንልብኹም ግና ኣምላኽ ይፈልጦ’ዩ።”

ብምባል ኣብ ዓይኒ ኣምላኽ ዘለዎም ሚዛን ኣፍለጦም3። ስለዚ እቲ ሰባት ኬድንቕዎ ዚብህግ፡ ከይተረድኦ ኣምላኽ ኪፍንፍኖ ይደፋፍኦ ኣሎ ማለት’ዩ።

ኣምላኽ ግን ሰለምንታይ’ዩ ብሰብ ከይንረኣይ ዚደሊ፧ ብሰብ ስለ ዚቐንእ ድዩ፧ ካብ ሰብ ናእዳ እንተ ተቐበልና ንኣምላኽዶ እንታይ ይጐድሎ’ዩ፧ እቲ ንሰብ ዜድንቕ፡ እቲ ንኣምላኽ ዚንዕቕ’ዩ። ነስተውዕሎ ኣይነስተውዕሎ፡ ንሰብ መተካእታ ኣምላኽ ክንገብሮ ዚድርኸና፡ ንኣምላኽ ዘሎና ንዕቀት ምእንቲ ኽንገልጽ’ምበር፡ “ናእዳ ሰብ ይጠቅም’ዩ” ዚብል እምነት ስለ ዘሎና ኣይኰነን። ንሕና ንመልእኽቲ ናይቲ ተግባርና ኸነንብቦን ከነስተውዕሎን እንተ ዘይከኣልና’ኳ፡ እቲ ናይዚ ንዕቀት’ዚ ደራስን ሃዋርያን ዝዀነ ሰይጣን ግን ጽቡቕ ገይሩ ይፈልጦ’ዩ። ነቲ ብእምነት’ምበር ብዓይኒ ዘይረአ ኣምላኽ ምእንቲ ኽንንዕቆ፡ ምሉእ ኣድህቦና ኣብቲ እንርእዮን ዚርእየናን ሰብ ክንገብር የስሕተና። ሰብ፡ ንገጽ’ምበር ንልቢ ስለ ዘይርእይ፡ ንድኻም ሰብ መዝሚዝና ጥበራ ኽንለማመድ የተባብዓና። ንዓይኒ ስጋና’ምበር ንዓይኒ ልቦናና ኸይንጥቀመሉ ይዕዝመና። እቲ ንምድሓን ዝለበመ ክርስትያን ግን ዓይኒ-ልቦናኡ ኣንቍሑ ዓይነ ስጋኡ ኺዕምት’ዩ ዚመርጽ። ጐይታውን፡ ብዛዕባ ኣጠማምታ ኣዒንትናን ሳዕቤናቱ ብኸምዚ ዚስዕብ ገሊጹልና’ዩ።

“ናይ ስጋ መብራህቲ ዓይኒ እያ። ዓይንኻ ጥዕይቲ እንተ ዀነት፡ ብዘሎ ስጋኻ ብሩህ ይኸውን። ዓይንኻ ሕምምቲ እንተ ዀነት ግና፡ ብዘሎ ስጋኻ ጸልማት ይኸውን። እምብኣርሲ እቲ ኣባኻ ዘሎ ብርሃን ካብ ጸልመተ፡ ጸልማቱስ ክንደይ ዓብዪ ይኸውን።” ማቴ 6፡22,23።

“የማነይቲ ዓይንኻ እንተ ኣስሐተትካ፡ ካባኻ ጐጥጕጥካ ደርብያ። ብዘሎ ስጋኻ ኣብ ገሃነም ካብ ዚኣቱስ፡ ሓንቲ ኣካልካ እንተ ጠፍአት ይሕሸካ።” ማቴ 5፡29።

ስለዚ ኣረኣእያና እንተ ዘይጥዕዩ፡ ተግባርና ኺጥዕይ ኣይክእልን’ዩ። “ካብ ኣምላኽሲ፡ ሰብ እንተ ረኣየኒ’ዩ ዜሕሽኒ፡ ኣምላኽ ካብ ዚህቦ ዓስቢ፡ ሰብ ዚህቦ ዓስቢ ይበልጽ” ዚብል ዝምቡዕ ኣረኣእያ እንተ ዘይህልወና፡ ነቲ ኣምላኽ ዝኣዘዞ ዅሉ ተግባር፡ ንሰብ ንምርኢት እነቕርበሉ ዋላ ሓንቲ ምኽንያት የልቦን። ዕድመ ሰብ ክንደይ ምዃኑ ምሕሳብ ጥራሕ’ኳ፡ ክብረት ሰብ ዋጋ ኸም ዘይብሉ ዓብዪ መርትዖ’ዩ። ንውሓት ጊዜ ናይቲ ሰብ ዚህበና ክብረት ጥራይ ዘይኰነ ዓይነት ናይቲ ብሰብ ዝወሃበና ኽብረት’ውን ኣዕሚቝና ኸይሓሰብና ኸንቱነቱ ኽንርድኦ ዜጸግም ኣይኰነን። ሰብ ንጾምና ይኹን ንኻልእ ተግባርና ምስ ተዓዘበ፡ ምናልባት ናይ ኣኽብሮት ቈላሕታን ሰላምታን ይምጥወልና፡ ኣብ በይንና ወይ ኣብ ቅድሚ ሰብ ብቓላቱ ይንእደና፡ ብድሕሬና’ውን ምስ ሰባት ኰይኑ ኺንእደናን ኪውድሰናን ይኽእል ይኸውን። ምናልባት ኣብ ግብዣታት ብኽብሪ ንዕደም፡ ኣብ ናይ ቤተ ክርስትያን ምርጫታት ይመርጸና ይኸውን፡ ንዕርቂ ይኹን ንኻልእ ኣገዳሲ ጕዳያት ኪዕድመና ይኽእል። ዋላ ኻልእ ዘይጠቐስናዮ ማሕበራዊ ኽብርታት ክንረክብ ንኽእል ኢና። እዚ ዅሉ ብሓቂዶ ምስ ክብረት ኪቝጸር ዚኽእል’ዩ፧ ነዚ ስለ ዝሃበና እንረኽቦ ኺጥቀስ ዚኽእል ረብሓ ኣሎ ድዩ፧ ምግቢ ዀይኑ ኼስብሕ፡ ገንዘብ ኰይኑ ኼሀብትም፡ ኣኽሊልን ዝፋንን ኰይኑ ኼንግስ፡ ስልማት ወርቂ ዀይኑ ኼማዕርግ ዚኽእል ድዩ፧ ብኣንጻሩ’ኳ ደኣ፡ ትዕቢትን ግብዝነትን ትምክሕትን ካልእ ሰይጣናዊ ባሕርያትን ኣልቢሱ የነውረናን የዋርደናን’ምበር፡ ዝዀነ ረብሓ ኣይህበናን’ዩ። ሰብ ኪርእዮን ኪንእዶን ዚደሊ ሰብ እምበኣር፡ ዝተጠበረ ልቢ ዘጋገዮ ውርደትን ውድቀቱን ዝናፈቐ ሰብ ጥራሕ’ዩ።

ካብቲ ኻብ ኣምላኽ ዚርከብ ክብረትን ዓስብን ንላዕሊ፡ ነቲ ኻብ ሰብ ዚርከብ ክብረት ኣብሊጽና ምርኣይና ዜመሓላልፎ መልእኽቲ እንታይ’ዩ፧ ቀዳማይ መልእኽቱ፡ ብዛዕባ ህላውነት ኣምላኽ እንጠራጠር ሰባት ምዃንና’ዩ። ንሰብ ከም መተካእታ ናይ ኣምላኽ ጌርና ኽንጥቀመሉ ምፍታንና ዝዓበየ መረጋገጺ’ዩ።

ብዛዕባ ህላወ ናይቲ ዘለኣለማዊ ኣምላኽ ሓቀኛ እምነት ዘለዎ ሰብ፡ ንኣምላኽ መተካእታ ወይ መመላእታ ኣይደልየሉን’ዩ። ምኽንያቱ ኣብ ምሉእ ዓለም ዘሎ ሰብ ተደሚሩ ከም ሓንቲ ነጥቢ ኣብ ውቅያኖስ፡ ከም ሓንቲ በሰር ኣብ ሚዛን ከም ዘይቍጸር ይፈልጥ’ዩ4። ስለዚ በቲ ምርጫና ብዛዕባ ኣምላኽ ዘሎና እምነትን ክሕደትን ንገልጽ ከም ዘለና ኸነስተውዕል ይግባእ። ካልኣይ መልእኽቱ ድማ፡ ብዛዕባ’ቲ ድሕሪ ሞትናን ድሕሪ ምጽኣት ጐይታን ዘሎ ዘለኣለማዊ መጻኢ ዘሎና ርድኢትን እምነትን ዜቃልዕ’ዩ። እቲ ድሕሪ ምጽኣት ጐይታ ዚገሃድ ዘለኣለማዊ ሕይወት ወይ ሞት ከም ዘሎ ዚኣምን ሰብ፡ ነቲ ሰናይ ብምግባሩ ኺረኽቦ ዚደሊ ዓስቢ ኣብኡ ኣብቲ ዘለኣለማዊ መጻኢ’ምበር፡ ኣብዚ ሓጺርን ሓላፍን ሕይወት’ዚ ኺረክቦ ኣይመርጽን’ዩ። ምኽንያቱ ሒደት ዓሰርተታት ዓመታትa ምስቲ ዘይውዳእ ዘለኣለማዊ ጊዜ ይትረፍ ኪመጣጠኖ ብመሰረቱ ምስኡ ኣብ ንጽጽር ኪኣቱ’ውን ኣይግባእን’ዩ። ይትረፍ’ቲ ናይ ሰብ ሕሱር ክብረት፡ ናይ ኣምላኽ ክብረት’ኳ ካብ ዕድመ ሰብ ንዘይነውሕ ጊዜ ጥራሕ ዚወሃብ እንተ ዚኸውን፡ ዚበሃግ ኽብሪ ኣምዀነን ነይሩ። እቲ ሰብ ዚምጥወልና ዝርካቡ ኽብሪ፡ ዕምሩ ንዘለኣለም እንተ ዚኸውን እቲ ብእኡ ምጥባርና እምብዛ ኣይመኽፍአን ነይሩ። ንኣበሳና ኣዝዩ ዜኽብዶ’ምበኣር፡ ነቲ ንእሽቶን ጊዝያውን ክብረት ናይ ሰብ፡ ምስቲ ዓብይን ዘለኣለማውን ክብረት ናይ ኣምላኽ ከነነጻጽሮ፡ ካብኡ ሓሊፍና’ውን ነቲ ናይ ኣምላኽ ንዒቕና ነቲ ናይ ሰብ ምምራጽና’ዩ።

ሳልሳይን ግዕዙይን መልእኽቱ ኸኣ፡ በቲ ንኣምላኽ ከነምልኸሉ ዝተሰርዓልና ስነ-ምግባር፡ ንርእስና ኽንምለኸሉ ንደሊ ምህላውና’ዩ። ስለዚ ነቲ ሰናይ ስነ-ምግባር ኣብ ክንዲ ኽንጻድቀሉ ኽንሓጥኣሉ ንመርጽ ኣለና ማለት’ዩ። ክንሓጥኣሉ እንኽእል ማእለያ ዘይብሉ እኩይ ስነ-ምግባር እናሃለወ፡ በቲ ሰናይ ስነ-ምግባር ክንሓጥእ ምምራጽና፡ ንኣምላኽ ብገዛእ በትሩ ኸም ምውቃዕ ዚቝጸር፡ ናይ ንዕቀትና ዝለዓለ ጥርዚ’ዩ። መልእኽቲ ናይዚ እኩይ ምርጫና በዚ ጥራሕ ዚድረት’ኳ እንተ ዘይኰነ፡ ክፋእ ናይዚ ኣበሳ’ዚ ንምግላጽ፡ እዚ ዝተጠቕሰ እኹል’ዩ።

እግዚኣብሔር’ከ ንምንታይ’ዩ ብሕቡእ ጥራሕ ክርእይ ዚመርጽ፧ ካብዚ ሰራም ኣበሳ’ዚ ምእንቲ ኼድሕነና፡ ልክዕ ከም ሰብ፡ ይርእየና ኸም ዘሎ ኸም ዚፍለጠና ገይሩ ዘይርእየና፧ ብመሰረቱ “ዘይርአ” ምዃኑ ኣካል መለኮታዊ መንነቱ’ዩ5። ሰለዚ ንኣና ደኣ’ዩ ናብቲ ንዘይርአ ባሕርዩ ብእምነት ናይ ምርኣይ ደረጃ ኼዕብየና ኼደይበና ዚመርጽ እምበር፡ ንኣና ኺብል መለኮታዊ ባሕርዩን መንነቱን ኪልውጥን ኪድርብይን ክንጽበዮ ኣይግባእን፡ ንጉስ ሰለሞን፦ “ክብሪ እግዚኣብሔርሲ (ኣብ) ምስዋር ነገር’ዩ፡ ክብሪ ነገስታት ግና (ኣብ) ምምርማር ነገር‘ዩ።”ብምባል ብዛዕባ ኣብ መንጎ እግዚኣብሔርን ሰባትን ዘሎ ዓብዪ ፍልልይ ገሊጹልና ኣሎ6። ነብዪ ኢሳይያስ’ውን፦ “ዎ ኣምላኽ እስራኤል፡ ዎ መድሓኒ፡ ብሓቂ ንርእስኻ እትስውር ኣምላኽ ኢኻ።” ብምባል ንእግዚኣብሔር ብዜገርም መገዲ ገሊጽዎ ይርከብ7። ስለዚ እቲ እነምልኾ ኣምላኽ ርእሱን ኣሰራርሓኡን ዚስውር ኣምላኽ ምዃኑ፡ እንተ ፈሊጥና፡ ኵሉ ባሕርናን ተግባርናን ድማ ነቲ ስዉር ኣምላኽ ብዜስምር መገዲ ኽንገብሮ ይግባእ። ካብቲ ናይ ንጉስ ሰለሞን ኣገላልጻ ኸም እንርድኦ፡ እግዚኣብሔር ርእሱ ዚስውር፡ ነቲ ናይ ሰብ ምምርማር ምእንቲ ኼብዝሖ’ዩ። ሃዋርያ ቅዱስ ጳውሎስ’ውን እግዚኣብሔር ርእሱ ዚስውረሉ ዕላማ፦ “ንሱ ኻብ ነፍስ ወከፍና ዘይረሓቐ ክነሱ፡ ምናልባሽ ሃሰስ ኢሎም እንተ ረኸብዎ፡ ንኣምላኽ ምእንቲ ኺደልዩ፡ ንመናበሪኦም ውሱን ዘመናትን ድዉብ ደረትን ሓገገሎም።”

ብምባል ገሊጽዎ ኣሎ8። ኣብ ኵሉ ዚርከብ ብህላዌኡ ምሉእ ኣምላኽ ስለ ዝዀነ፡ ካባና ኸይረሓቐ፡ ምስ ነፍሲ ወከፍና ኣሎ። ምሳና እናሃለወ ኻባና ዝተሰወረሉ ምኽንያት ከኣ፡ ሃሰስ ኢልና ምእንቲ ኽንደልዮን ክንረኽቦን’ዩ። “ስዉር እንተ ዀይኑ ደኣ ከመይ ጌርና ሃሰስ ክንብሎ ንኽእል፧” ዚብል ሕቶ ኺለዓለና ይኽእል’ዩ። ነቲ ዚረኣይን ግሁድን ኣካል፡ ብዓይንኻ ደሊኻ ብኢድካ ሃሰስ ኢልካ ኽትረኽቦ ይከኣል’ዩ። ርእሱ ሰዊሩ፡ “ድለዩኒ” ኻብ በለ፡ ንእኡ ሃሰስ ኢልካ እትደልየሉ ኻልእ ዝረቐቐ ጥበብ ኣሎ ማለት’ዩ። ንእኡ ዚመስል ባሕርይ ብምንጽብራቕን፡ ንእኡ ዜሓጕስ ግብሪ ብምግባርን’ዩ ናይ እግዚኣብሔር ደላዪ ምዃንካ እተረጋግጽ። ንኣምላኽ ክንደልየሎም ካብ እተሰርዑልና ስነ-ምግባራት ሓደ ድማ እቶም ግብረ-ኣምልኾ ኢልና እንሰምዮም ጾም፡ ጸሎት፡ ስግደት ወዘተ፡ እቶም ግብረ-ውህበት ኢልና እንሰምዮም ምጽዋት፡ መባእ ከምኡ’ውን ኵሎም’ቶም ፍረ መንፈስ ቅዱስ ዝዀኑ ከም’ኒ ፍቕሪ፡ እምነት፡ ትዕግስቲ ይኣኽለኒ-ምባል፡ ትሕትና፡ ምሕረት ምግባር ዝኣመሰሉ ስነ ምግባራት’ዮም። እቲ ብኣምላኽ ዘይግደስን ንእኡ ዘይደልዮን ሰብ ዜርእዮም ናይ መጀመርታ ምልክታት ነዞም ንኣምላኽ ዜስምሩ ስነ-ምግባራት ካብ ሕይወቱ ምርሓቕን ምድርባይን’ዩ። እቲ ጕልባቡ ብዘይቀልዐ ኽሕደት ዚመላለስ ግብዝ ክርስትያን ድማ፡ በቲ ናይ ኣምላኽ ስነ ምግባር ንሰብ እናምለኸን ብሰብ እናተመለኸን ርእሱ ኺጥብር ይነብር። ጸላእ ኣምላኽ ምዃኑ ድማ በቲ ዜዘውትሮ እኩይ ስነ- ምግባር (ግብሪ ዓመጻ) ጭቡጥ መትርዖ ይህብ።

ናይ ምስዋሩ ኻልኣይ ኣገዳሲ ዕላማ ድማ፡ እዚ ምድራዊ ሕይወትና ናይ ትዕዝብቲ ጊዜ ስለ ዝዀነ’ዩ። ምድራዊ ሕይወትና ዓስብና ንምብዛሕ እንዓይየሉን ብእምነት እንጽበየሉን ጊዜ እዩ። ዓስቢ፡ ስራሕ ምስ ተወድኣ’ምበር፡ ገና ስራሕ ኪጅምር ከሎ ኣይወሃብን’ዩ። ዋላ ኣብ ምድራዊ ስራሕና’ውን፡ ተዓሲብና ኽንሰርሕ ምስ ጀመርና፡ “ስርሐይ ቅድሚ ምውዳአይ ደሞዘይ ይወሃበኒ” ኢልና ኣይንሓትት ኢና። ደሞዝና መዓልታዊ፡ ሰሙናዊ፡ ወርሓዊ ኺወሃበና ብእተሰማማዕናዮ መሰረት፡ ነቲ ስራሕ ምስ ፈጸምና ኢና ደሞዝ ክንጽበይ እንኽእል። እቲ ኣስራሒና ድማ ስራሕናን ኣሰራርሓናን ከም ዚግባእ ድሕሪ ምዕዛቡ’ዩ ደሞዝና ዚኸፍለና። ብውጽኢትን ጽፍፈትን ናይ ኣሰራርሓና ምስ ዘይዓግብ፡ ካብ ስራሕ የባርረና። እግዚኣብሔር ከኣ እዚ ብሕይወት እንነብረሉ ዓመታት ከም ሓደ ናይ ስራሕ ዘመን ገይሩ፡ እቲ ኣብ ሕይወት ክንገብሮ ዚግብኣና ምስ ፈጸምና፡ ናብቲ ዓስብና ዚኸፍለሉ ቦታ የግዕዘና። እቲ ደሞዝና እንቕበለሉ ጊዜ ምስ ኣኸለ ድማ ከካብቲ ዓሪፍናሉ ዘለና መቓብር ኣውጺኡ ንነፍሲ ወከፍ ከከም ግብርና ይፈድየና9።

እግዚኣብሔር ዘይታኸስ ንቑሕ ሓላዊ’ዩ። ኣብ ዘለኻ ሃሊኻ ኻብኡ ኽትሕባእን ክትስወርን ኣይከኣልን’ዩ10። መዓልትን ለይትን ኣዒንቱ ኣባና ተኺሉ ይከታተለና’ዩ11። ልብን ኰላሊትን ዚምርምር ኣምላኽ ስለ ዝዀነ፡ ንዅሉ ሓሳባትናን ድርኺትናን ይፈልጦ’ዩ12። ኣሽንኳይ’ቲ ኪግለጽ’ምበር ኪሕባእ ዘይደሊ ሰብ፡ እቲ ደይመደይ ኢሉ ኺሕባእ ዚከኣሎ ዅሉ ዚገብር’ኳ ካብኡ ኺሕባእ ከም ዘይክእል፡ እግዚኣብሔር ባዕሉ፡ “ኣነ ኸይርእዮስ ሰብዶ ኣብ ስዉር ስፍራ ኺሕባእ ይከኣሎ’ዩ፧” ይብል እግዚኣብሔር። ሰማይን ምድርን ዝመልእዶ ኣነ ኣይኰንኩን፧ ይብል እግዚኣብሔር” ኤር 23፡24።

ስለዚ ኸምቲ ጐይታ ምዒዱና ዘሎ፡ ነቲ ንሓጺር ጊዜ ብሕቡእ ተዓዚቡ፡ ደሓር ግና ኣብ ቅድሚ ዅላቶም ነገዳት መላእኽትን ደቂ ሰብን ዚኽሕስ ኣምላኽ ንምረጽ። በቲ ንዘለኣለም ክንረብሓሉ ዝተዋህበና ስነ-ምግባር ኣይንሕጣእ። ንሰብ ኣኽቢርና ንኣምላኽ ኣይነሕስር። ከምቲ ጐይታና፦ “ናይ ቄሳር ንቄሳር፡ ናይ ኣምላኽ ከኣ ንኣምላኽ ሃቡ” ዝበለና፡ ከምቲ ሃዋርያ ጳውሎስ’ውን፡ “....ፍርሃት ንዚግብኦ ፍርሃት፡ ክብረት ንዚግብኦ ክብረት፡ ንዅሉ’ቲ ዘዚግብኦ ሃብዎ።” ዚበሎ፡ ንሕና’ውን ከምኡ ንግበር13። ንሰብ ናይ ኣምላኽ ቦታ ሂብና፡ ኣምለኽቲ ጣኦት ኣይንኹን። ነቲ ኣምላኽ ጥራሕ ኪኸብረሉ ዚግባእ ግብርና፡ ክብሪ ኣምላኽ ንምስራቕ ኣይንጠቐመሉ። ኣምላኽ ኣብ ዘለናዮ ዅሉ ምሳና ኸም ዘሎ፡ እንዛረቦ ዅሉ ይሰምዕ፡ እንገብሮ ዅሉ ይዕዘብ፡ እንሓስቦ ዅሉ ይምርምር ከም ዘሎ ወርትግ ንዘክር። ምኽንያቱ ንሱ ነቲ እንገብሮ ዅሉ ኽፉእን ጽቡቕን ግብርና ብሕቡእ ይዕዘብ ኣሎ። ኣብ መወዳእታ ድማ ናይ ኵሉ ተግባርና ጻማ ብቕሉዕ ብግህዶ ኺፈድየና’ዩ። ክፉእና ዀነ ጽቡቕና፡ ውርደትና ዀነ ኽብረትና፡ እቶም ብኣካል ዚፈልጡና ሰባት ጥራሕ ዘይኰኑ፡ ካብ ኣዳም ክሳዕ ምጽኣት ጐይታ ዝነበሩ ዅላቶም ሰባትን ህዝብታትን ብግሁድ ኪርእይዎ’ዮም። “ተሓቢአን ይጠንሳኦ፡ ሰብ ኣኪበን ይወልዳኦ” ኸይኰነና፡ ብዚገሃድ ሓጢኣት ክንዋረድ ዘይኰነስ፡ ብግህዶ ብዚከሓስ ሕቡእ ስነ-ምግባር ንሃብትም!! ነቲ ዳሕራይ ክብርና ምእንቲ ኼግህድ ሕጂ እተሓብአ ኣምላኽ ንዘክር።

ሰማይን ምድርን ኪሐልፍ፡ ቃለይ ግና ኣይኪሐልፍን እዩ።!

ጸጋ ጎይታና ኢየሱስ ክርስቶስን ፍቕሪ ኣምላኽን ሕብረት መንፈስ ቅዱስን ምስ ኩላትና ይኹን።

ኦርቶዶክሳዊት ተዋህዶ ቤተ ክርስቲያን ኤርትራ - መንበረ ጵጵስና ሰሜን ኣሜርካ።

¹ማቴ 6፡1 ²ማቴ 23፡5 ³ሉቃ 16፡15: ⁴ኢሳ 40፡15 ^adecades: ⁵ዮሃ 1፡18 ፣ 1ጢሞ 6፡16 ፣ ዘጸ 33፡18-23 ⁶ምሳ 25፡2 ⁷ኢሳ 45፡15 ⁸ግብ 17፡26,27: ⁹ማቴ 25፡14-46፣ 16፡27 ¹⁰መዝ 12፡2,3,8 ፣ 139፡1-12 ¹¹መዝ 33፡13-15 ¹²መዝ 17፡3 ፣ ኤር 17፡9,10 ¹³ማቴ 22፡21 ፣ ሮሜ 13፡7