“ንሳ ሰማንያን ኣርባዕተን ዓመት ዝዕድሚኣ መበለት’ያ። ካብ ቤት መቕደስ ከይወጸት፡ ብጾምን ብጸሎትን ለይትን መዓልትን ንኣምላኽ ተገልግል ነበረት።” ሉቃ 2፡37።

እዛ ናይ’ዚ ዕለት ንባብ ቅዱስ ወንጌል ጠቒስዋ ዘሎ ቅድስቲ ኣደ፡ ብኣገልግሎታ ነብዪት’ያ። ድሕሪ ናይ ሾብዓተ ዓመት ሓዳር፡ በዓል ኪዳና ብሞት ተፈልይዋ ምስ መብለወት፡ ኣብ ቤት መቕደስ ተኸቲታ፡ ካብኡ ኸይወጸት ንኣምላኽ ተገልግል ነበረት። ኣብቲ ናይ ብሉይ ኪዳን ቤት መቕደስ ንደቀንስትዮ ዝተሰርዐ ኣገልግሎት ከም ዝነበረ፡ ኣብ መጻሕፍቲ ኦሪት ኣይንረክብን ኢና። ስለዚ ካብ ቤት መቕደስ ከይወጸት ኪበሃል ከሎ ናብቲ ውሽጢ ቤት መቕደስ ትኣትው ከም ዝነበረት ዜመልክት ኣይኰነን።

ኣብ ዙርያ’ቲ ቤት መቕደስ፡ ደቀንስትዮ ዚኣትዋኦ ስፍራ፡ ኣሕዛብ ዚኣትውዎ ስፍራ ተባሂሉ ዝተፈልየ ቦታታት ከም ዝነበረ ታሪኽ ኣይሁድ የረጋግጽ’ዩ። ኣብ ደገ ናይቲ ድንኳን ምርኻብ የገልግላ ከም ዝነበራ ግን መጽሓፍ ቅዱስ ይገልጸልና’ዩ1። ስለዚ ኣብዚ ንደቀንስትዮ ዝተመደበ ቦታ ኸይወጸት፡ ዕድሚኣ ምሉእ ብጾምን ጸሎትን፡ ከምኡ’ውን እግዚኣብሔር ብዝተዛረባ መጠን ብትንቢት ተገልግል ነበረት። እቲ ሕጻን ኢየሱስ ናብቲ ቤት መቕደስ ምስ መጸ መንነቱ ኣለልያ፡ ነቶም ምድሓን ኢየሩሳሌም ዚጽበዩ ዅሎም ዝተዛረበት ከኣ፡ መንፈስ ቅዱስ ብዛዕባ’ቲ ሕጻን ስለ ዝገለጸላን ብዛዕባኡ እትዛረቦ ስለ ዘፍለጣን’ዩ። ጓል ሰማንያን ኣርባዕተን ዓመት መበለት፡ ንርእሳ ብሰብ ክትግልገል’ምበር፡ ንሳ ንኣምላኽ ከተገልግል ትኽእል’ያ ኢልካ ኽትሓስብ የጸግም’ዩ።

ኣምላኽከ ብጾምን ጸሎትንዶ ይግልገል’ዩ፧ ጾምን ጸሎትን ንርእስና ኽንረብሕን ከገልግልን ኢልና እንገብሮዶ ኣይኰነን፧ “ካብ ሓጢኣተይ ወይ ካብ ሕማመይ ምሕረት ግበረለይ” ወይ ከኣ “ናይ ዕለት እንጌራ ሃበና፡ ውሉድ ሃበኒ፡ ሰላምካ ሃበና” ወዘተ ኢልና እንተ ጸለናስ፡ ኣምላኽ ካብ’ዚ ጸሎትና’ዚ ዚረኽቦ ኣገልግሎት እንታይ’ዩ፧ እዚ ሕቶታት’ዚ ነቲ ኣብ ቤተ ክርስቲያን ኰነ ኣብ ኣባይትና እንገብሮ ግብረ-ኣምልኾ ብዓሚቚ ርድኢት ክንገብሮ ዚሕግዘና’ዩ። ናብ ኣምላኽ ቀሪብኻ ዜድልየካ ነገር ብጸሎት ስለ ዝሓተትካ እግዚኣብሔር ዚግልገል እንተ ዀይኑ፡ ጸሎት ካብ ልመና ዚበልጽ ካልእ ዝዓበየ ትርጉም ኣለዎ ማለት’ዩ። ምጽላይ ንኣምላኽ ዚብርከት ኣገልግሎት እንተ ዀይኑ፡ ዘይምጽላይ ከኣ ንኣምላኽ ናይ ምግፋዕ ሰይጣናዊ ኣገልግሎት’ዩ ኽንብል ንኽእል ኢና። ምጽላይ ኰነ ዘይምጽላይ፡ ክልቲኡ ኣገልግሎት’ዩ። ፍልልዮም፡ ኣብቲ ዚግልገል ኣካል ጥራሕ’ዩ። ብምጽላይ ዚግልገል እግዚኣብሔር ኪኸውን ከሎ ብዘይ ምጽላይ ዚግልገል ከኣ ሰይጣን’ዩ። ዘይምጽላይ ንገዛእ ርእስና ካብ ምጒዳእ ሓለፋ ነቲ ልዑል ኣምላኽ ይብድል ምህላዉ ዘይምፍላጥንና፡ ኣብቲ ናይ ዘይምጽላይ ሓጢኣት ጥሒልና ኽንነብር ይገብረና ኣሎ። ሕዝቢ እስራኤል ንንግስነት ናይ ኣምላኽ ንዒቖም፡ ከምቶም ኣብ ከባቢኦም ዘለዉ ኣሕዛብ ናይ ሰብ ንጉስ ኪቕብኣሎም ምስ ሓተቱ፡ እግዚኣብሔርን እቲ ቕቡእ ባርያኡ ነብዪ ሳሙኤልን ኣዝዮም ጐሃዩ2። በደሎም ምስ ተረድኦም፡ “ንጉስ ብምልማን እዚ ኽፉእ’ዚ ድማ ወሲኽና ኢና’ሞ፡ ምእንቲ ኸይንመውትሲ፡ ስለ ገላውኻ ንእግዚኣብሔር ኣምላኽካ ለምነልና፧” ብምባል ንነብዪ ሳሙኤል ተማሕጸንዎ፡፡ እቲ ቕዱስ ናይ ኣምላኽ ሰብ ድማ፡

“ኣነስ ነታ ጽብቕትን ቅንዕትን ደኣ ክምህረኩም’የ’ምበር፡ ምእንታኹም ምልማን ብምሕዳገይ ንእግዚኣብሔር ምብዳልሲ ካባይ ይርሓቕ።”

ኢሉ፡ ብዛዕባ ጸሎት ናይ ብሓቂ ጽቡቕን ቅኑዕን ትምህርቲ መገቦም3። ካብዚ ኣበሃህላ’ዚ ከም እንርድኦ እምበኣር፡ ይትረፍ ብዛዕባ ገዛእ ርእስና፡ ብዛዕባ ቐረባና ዝዀኑን ዘይኰኑን ካልኦት ሰባት ዘይምጽላይ’ውን ኣብ ልዕሊ እግዚኣብሔር ዚፍጸም ከቢድ በደል’ዩ። ዓስቢ ኵሉ ሓጢኣት ድማ ብዘይ ኣድልዎ ዘለኣለማዊ ሞት’ዩ። ስለዚ ብዛዕባ’ቲ ዕድሜና ምሉእ ብዘይምጽላይና ኣብ ልዕሊ ኣምላኽ ዝፈጸምናዮ እልቢ ዘይብሉ ሓጢኣት፡ ብእተሰብረ ልቢ ብብዙሕ ጓህን ንብዓትን ቀሪብና ሓቀኛን ዘየጣዕስን ንስሓ ኽንኣቱ ይግብኣና። ንምዃኑኸ ብዛዕባ ዘይምጽላዩ ዝተነስሓ ሓደ ሰብ ኣብ ማእከልና ይርከበናዶ ይኸውን፧

ኣርእስትና ብሓፈሻ ብዛዕባ ንኣምላኽ ምግልጋል እምበር ብፍላይ ብዛዕባ ጸሎት ስለ ዘይኰነ፡ በዚ ድሮ ዘልዓልናዮ መእተዊ ሓሳብ ተደሪኽና፡ ብዛዕባ’ቲ ኻልእ ንኣምላኽ እነገልግለሉ ኣርእስታት ንመልከት። ንምዃኑ ሰብ ዚፍጽሞ፡ ስጋዊ ይኹን መንፈሳዊ ግብሪ፡ ኣገልግሎት ዘይኰነ ኣሎዶ፧ እዚ ሕቶ’ዚ ዋላ ነቲ ምብላዕን ምስታይን ከይተረፈ ዚምልከት’ዩ። ዋላ’ቲ ኾፍ ኢልና በእምሮና እነሰላስሎ ሓሳባት ከይተረፈ ኣብኡ ዚጠቓለል’ዩ። ልዕል ኢልና ከም ዝጠቐስናዮ፡ እንታይ ዓይነት ተግባር ምዃኑ’ዩ ዚውስኖ’ምበር፡ ኣገልግሎት ዘይኰነ ተግባር ፈጺሙ የልቦን። ብርግጽ፡ ዓይነት ተግባርና ምስ መንነት ናይቲ ተቐባሊ ኣገልግሎትና ብቐጥታ ዚዛመድ’ዩ። እቲ እንፍጽሞ ዘለና ተግባር ጽቡቕ እንተ ዀይኑ፡ እቲ ብተግባርና ዚግልገል ኵሉ ጊዜ እግዚኣብሔር ጥራሕ’ዩ ዚኸውን። ብኣንጻሩ እቲ ተግባርና እኩይ ምስ ዚኸውን ድማ ነቲ ንጥፍኣትና እተዓጥቀ ቐንዲ ጸላኢና ሰይጣን ነገልግል ከም ዘለና ኸነስተውዕል ይግብኣና።

ብዛዕባ ኣገልግሎት ዘለና ሓሳብ ወይ ርድኢት ኣዝዩ ካብ ምጽባቡ እተላዕለ፡ ኣገልገልቲ ኣምላኽ እንቘጽሮም ነቶም ኣብ ናይ ቤተ ክርስቲያን መንፈሳዊ ዕዮ ዝተጸምዱ ጥራሕ’ዩ። ዋላ እቶም ኣገልገልቲ ንርእሶም’ውን፡ ኪቕድሱ፡ ኪሰብኩ ኸለዉ ጥራሕ እምበር፡ ኣብቲ ማሕበራዊ ንጥፈታቶምን ዝምድናታቶምን ንእግዚኣብሔር ወይ ንሰይጣን የገልግሉ ኸም ዘለዉ ኣይሓስቡን’ዮም። ግደ ሓቂ ኻብቲ ኣብ ውሽጢ ቐጽሪ ቤተ ክርስቲያን ኰነ ኣብ ካልእ ቦታታት ዚፍጸም መንፈሳዊ ኣገልግሎታት፡ እቲ ኣብ ማሕበራዊ ሕይወትና እንፍጽሞ ኣገልግሎት ዝዓበየን ዝለዓለን ኣገዳስነት ኣለዎ። ብኸመይ’ዩ ከምኡ ዚኸውን፧ ከምዚ ብምባልናኸ ነቲ ዓበይቲ ምስጢራተ ቤተ ክርስቲያንን ንስብከተ ወንጌልን ነነኣእሶ ኣለና ማለት ድዩ፧ ብፍጹም ኣይኰነን!! ብኣንጻሩ ነዕብዮን ነኽብሮን ኢና ዘሎና። ምኽንያቱ እቲ ኣብ ማሕበራዊ ሕይወቱ ንኣምላኽ ብብቕዓት ዘየገልገለ ሰብ፡ ኣብቲ ናይ ቤተ ክርስቲያን ምስጢራት ክካፈል ኣይክእልን’ዩ። ንኣብነት፡ ሓደ ንሰብ ዘቀየመን ብሰብ ዝተቐየመን ሰብ፡ ካብቲ ቤተ ክርስቲያን ዘዳለወቶ ቕዱስ ቁርባን ኪካፈል ኣይክእልን’ዩ። ኣብቲ ማሕበራዊ ሕይወቱ ንእግዚኣብሔር ኣብ ምግልጋል ስለ ዝፈሸለ፡ ኣብቲ ናይ ቤተ ክርስቲያን ኣገልግሎት ኪካፈል ዜኽእሎ ብቕዓት የጥፍእ’ዩ። ብዝዀነ ምኽንያት ካብቲ ቅዱስ መኣዲ ጐይታ ኸይተኻፈለ ዝተረፈ ሰብ ግና፡ ኣብቲ ዝሰፍሐ ማሕበራዊ ሕይወቱ ንኣምላኽ ንኸየገልግል ዚኽልክሎ ዝዀነ ዓይነት ሕጊ የልቦን። ኣብቲ ማሕበራዊ ሕይወቱ ንኣምላኽ ኬገልግል ዘይኰነስ ኪብድል ዝቐነየ ሰብ፡ መንፈሳዊ ኣገልግሎት ክፍጽም ወይ ከኣ ኣብቲ ኣገልግሎት ኪሳተፍ እንተ ኸደ፡ ከም ናይ ድፍረት ሓጢኣት እምበር፡ ኣበርክቶ ወይ ተሳትፎ ከም ዝገበረ ኣይቈጸረሉን’ዩ። ነዚ ሓቂ’ዚ ነብዪ ኢሳይያስ ብስእላዊ መገዲ ኣብሪሁ ጽሒፉልና ኣሎ።

“ኣቱም ሓላቑ ሶዶም፡ “ቃል እግዚኣብሔር ስምዑ፡ ኣታ ሕዝቢ ጎሞራ፡ ንሕጊ ኣምላኽና ጽን በሎ። ብዝሒ መስዋእትታትኩም እንታይ ኢለዮ፧” ይብል እግዚኣብሔር፡ ብዚሓርር መስዋእቲ ደዓውልን ብስብሒ ስቡሓትን ጸጊበ ኣሎኹ፡ ደም ዝራብዓትን ገናሽልን ድቤላታትን ባህ ኣየብለንን እዩ። ኣብ ቅድመይ ክትረኣዩ ምስ እትመጹ፡ መን ኰታ ኣጸደይ ክትረግጹ ደለየኩም ከንቱ መስዋእቲ ብልዒ ኣይተምጽኡ፡ ዕጣን ንኣይ ፍንፋን እዩ፡ ስርቂ ወርሕን ሰንበትን፡ ኣኼባ ማሕበር፡ ንኣበሳ ምስ ኣኼባ በዓል ኣይዕገሶን እየ። ንስርቂ ኣዋርሕኩምን በዓላትኩምን ነፍሰይ ትጸልኦ ኣላ፡ ጾር ኰይኑኒ፡ ምስካሙ ስኢነ ኣሎኹ። ኣእዳውኩም ምስ እትዝርግሑ፡ ኣዒንተይ ካባኻትኩም እኽውለን፡ ምህለላ እኳ እንተ ኣብዛሕኩም፡ ኣይሰምዕን እየ፡ ኣእዳውኩም ደም መሊአን እየን። ተሓጸቡ፡ ንጽሁ ነቲ እከይ ግብርኹም ካብ ቅድሚ ኣዒንተይ ኣርሕቕዎ፡ ምግባር እከይ ሕደጉ። ምግባር ሰናይ ተመሃሩ፡ ቅንዕና ድለዩ፡ ንጥቑዕ ርድእዎ፡ ንዘኽታም ፍትሒ ኣውጽኡሉ፡ ንመበለት ተጣበቑላ።” ኢሳ 1፡10-17.

ካብዚ ኽፍሊ ጽሑፍ’ዚ ኸም እንርድኦ፡ ሕዝቢ እስራኤል ኣብቲ ማሕበራዊ ሕይወቱ፡ ኣብ ዓይኒ ኣምላኽ ልክዕ ከም ሕዝቢ ሰዶምን ጎሞራን’ዩ ዝነበረ። ንጹህ ደም የፍስስ፡ ሰናይ ገዲፉ እኩይ ግብሪ የዘውትር፡ ቅንዕና ገዲፉ ብተንኰል ይመላለስ። ነቶም ጥቑዓት ዘኽታማትን መበለታትን ፍትሒ ደፊኑ የጥቅዕ ነበረ። እዚ ዅሉ ኽፉእ እናገበረ ድማ፡ ንኣምላኽ ያኢ ኺጥብሮ፡ በቲ መስዋእትን በዓላትን ንእግዚኣብሔር ኬገልግል ናብ ኣጸድ ናይ ቤት እግዚኣብሔር ይውሕዝ ነበረ። በዚ ኸምዚ ድማ ንእግዚኣብሔር በቲ ባዕሉ ዝኣዘዞን ዝሰርዖን መንፈሳዊ ኣገልግሎታት ዓቕሉ ኽሳዕ ዚጸብቦ ኸም ዚጸልኦ ገበርዎ። ካብዚ ንላዕሊ ብዛዕባ ኣገዳስነት ናይቲ ኣብ ማሕበራዊ ሕይወትና ንእግዚኣብሔር ምግልጋል ዚገልጽ ክፍሊ መጽሓፍ ቅዱስ ኣሎ ኽትብል ኣዝዩ ኣጸጋሚ’ዩ።

ብኸመይ’ዩ እቲ ማሕበራዊ ንጥፈታትና ንኣምላኽ ወይ ንሰይጣን ዜገልግሎ፧ ነዚ ሓቂ’ዚ ንምርዳእ ብሰለስተ ነጥብታት ከፋፊልና ንርኣዮ።

ብሓሳብ ምግልጋል፦ ሓሳብ፡ ንዅሉ ቃልናን ስምዒታትናን ተግባርናን ናይ ምምእዛን ሓይሊ ዘለዎ ናይ ኣእምሮና ስራሕ’ዩ። እግዚኣብሔር ብሓሳብ ኣእምሮና ከም ዚግልገል፡ በቲ ሓዋርያ ቅዱስ ጳውሎስ፡ “እምብኣርሲ ኣሕዋተየ፡ ንስጋኹም ሕያውን ቅዱስን ንኣምላኽ ባህ ዜብልን መስዋእቲ ጌርኩም ከተቕርብዎ፡ ብምሕረት ኣምላኽ ኣምዕደኩም ኣሎኹ፡ እዚ ማለት እቲ ናይ ኣእምሮ መንፈሳዊ ኣገልግሎትኩም እዩ። እቲ ሰናይን ባህ ዜብልን ምሉእን ፍቓድ ኣምላኽ እንታይ ምዃኑ ምእንቲ ኽትምርምሩስ፡ ብምሕዳስ ሓሳብኩም ተለወጡ እምበር፡ ነዛ ዓለም እዚኣ ኣይትምሰልዋ።” ዝብሎ ቃል ከነረጋግጽ ንክእል ኢና4። ስለዚ ከኣ “እቲ ኣብ ክርስቶስ ኢየሱስ ዝነበረ ሓሳብ ኣባኻትኩም’ውን ይሃሉኹም።” ተባህለልና5። ምኽንያቱ እቲ ኣብቲ ጸቢብ ሓንጐልና መዀርመዪ ዝረኸበ ሓሳብ’ዩ፡ ኣብ ምሉእ ኣካላትና ኣሳፊሑ ዚገዝእ። ሰይጣን ናብ ኣእምሮ ኽልተ ሓዋርያት ሓሳቡ ኣስሊኹ ኣብ ምእታው ስለ ዝተዓወተ’ዩ ኣብ ዕዮ ወንጌል ዕንቅፋት ናይ ምጽዋድ ዕድል ዝረኸበ። ይሁዳ፡ ነቲ ሓሳብ ሰይጣን ከም ወርቃዊ ሓሳብ ብኣኽብሮት ስለ ዘአንገዶ፡ ንጐይታኡ ብሕሱር መጠን ገንዘብ ክሳዕ ምሻጥ ተሃንደደ6። ነቲ ጐይታኡ ዜቕርበሉ ዝነበረ ናይ መጠንቀቕታ ቓላት ናብ ኣእምሮኡ ኼስርጾ ስለ ዘይፈቐደ፡ ንፍቓድ ሰይጣን ብድርብ ኣገልግሎት፡ ማለት ንጐይታን ንገዛእ ርእሱን ብምቕታል፡ ኣገልገለ። ንሓዋርያ ጴጥሮስ፡ ነቲ ርእሰ-ሓዋርያት’ውን ዘይጥዑይ ሓሳብ ብምምጋብ፡ ኪግልገለሉ ኣንቂዱ’ኳ እንተ ነበረ፡ ሓዋርያ ጴጥሮስ ግን ነቲ ናይ ጐይታ ተግሳጽ ብልስሉስ ልቢ ብትሕትና ስለ ዝተቐበሎ፡ ስፍራ ሓዋርያነቱ ክሳዕ ምልቃቕ ኣይተዋረደን። ይኹን ደኣ’ምበር፡ እታ ብዛዕባ መከራ ናብ ኣእምሮኡ ዝሰረጸት ሓሳብ ሰይጣን ገና ስለ ዘይለቐቐቶ፡ ንጐይታኡ ብዜሕፍር መገዲ ናብ ምኽሓድ ኣውዲቓቶ’ያ። ኣብ ኣእምሮና ርኹስ ናይ ኣጋንንቲ ሓሳባት ነአንግድ እንተ’ለና፡ በቲ እግዚኣብሔር ዝፈጠሮ ኽቡር ኣእምሮ፡ ንእግዚኣብሔር ገዲፍና ንሰይጣን ከነገልግል መሪጽና ኣሎና ማለት’ዩ። ካብ ከምዚ ዝበለ ጥፍኣት ዝዓስቡ ኽፉእ ምርጫ ምእንቲ ኽንድሕን ድማ፡ ሓዋርያ ቅዱስ ጳውሎስ፡

“ከምቲ ብእኡ ዝመደቦ ስምረቱ፡ ነቲ ምስጢር ፍቓዱ እናኣፍለጠና፡ ነቲ ናይ ምልኣት ዘመናት መጋቢነቱ፡ ኣብ ሰማይ ዘሎን ኣብ ምድሪ ዘሎን፡ ኣብ ክርስቶስ ምእንቲ ኺጥቕለልሲ፡ ብዅሉ ጥበብን ብዅሉ ኣእምሮን ነዚ ጸጋኡ ኣባና ኣውሐዞ።”

ብምባል መዓደና7። ብሓሳብና ጸላእቲ ኣምላኽ ክንከውን ከም እንኽእል’ውን፡ እቲ ሓዋርያዊ ቃል፦ “ንስኻትኩም ቀደም ካብ ኣምላኽ ዝረሓቕኩም፡ ብሓሳብኩምን፡ ብኽፉእ ግብርኹምን ጸላእቱ ነበርኩም።”

“ንኣኻትኩም፡ ቀደም ፍሉያት ብሓሳብኩም ብኽፉእ ግብሩኹምን ጸላእቲ ዝነበርኩም ከኣ”, “ንስኻትኩም ብበደልኩምን ብሓጢኣትኩምን ምዉታት ነበርኩም። ብናይ ዓለም ክፉእ መገዲ ትነብሩ ነበርኩም፡” ‘ነቲ ሕጂ ነቶም ንእግዚኣብሔር ዘይእዘዙ ሰባት ዚመልኽ ርኹስ መንፈስ፡ ‘ሓለቓ ስልጣን ኣየር’ ትእዘዙ ነበርኩም።’ ቀደም ‘ንሕናውን ኵልና ኸምኦም “ትምኒት ስጋና እናፈጸምና ከም ድሌትናን ሓሳብናን ንነብር ነበርና።” ብባሕርይና ከምቶም ካልኦት ቍጥዓ ኣምላኽ ዚግብኣና ነበርና።”ብምባል ምሂሩና ኣሎ8።

ብቓላት ምግልጋል፦ ቃላት፡ “ስጋ ዝለበሰ ሓሳባት’ዩ” ክንብል ንኽእል ኢና። እግዚኣብሔር ከኣ ንዅሉ ፍጥረቱ ብቓሉ’ዩ ዝፈጠሮ። ንሕዝቡ ዚኸውን መምርሒ ኢሉ ዝሃቦ ድማ ቃሉ’ዩ። ብቕዱሳን ነብያቱን ሓዋርያቱን ገይሩ ዝለኣኸልና ድማ ንቓሉ’ዩ። ስለዚ እግዚኣብሔር ብቓሉ ገይሩ ዜገልግለና ካብ ኰነ፡ ብመልክዑን ብኣምሳሉን ከም እተፈጠርና ሰባት መጠን፡ ንሕና’ውን በቲ ንሓድሕድና እንዘራረበሉ ቃላት ንኣምላኽ ከነገልግሎ ዓብዪ መንፈሳዊ ሓላፍነት ኣሎና። ንሓድሕድና ብጸጋ ብዝተቐመመ ቓላት ክንዛረብ ከለና፡ ብቃላትናን ብልሳንናን ንእግዚኣብሔር ነገልግል ከም ዘለና ኸነስተውዕል ይግባእ። ሓቂ ኽንዛረብ ከለና፡ ነቲ ናይ ኣምላኽ ሓቂ ብምዝራብ ነገልግሎ ከም ዘለና፡ ቃል ምጽንናዕ ክንዛረብ ከሎና ነቲ መጸናንዒ ባሕርዩን ግብሩን ብምንጽብራቕ ነገልግሎ ኸም ዘለና ኽንዝንግዕ ኣይግባእን። ብኣንጻሩ ሓሶት ንዛረብ እንተ’ሊና ግን በቲ ኣምላኽ ዝፈጠሮ ልሳንና ጌርና ነቲ ጓና ኣምላኽ፡ ማለት ነቲ ጸላኢና ዲያብሎስ ብምግልጋል ኣብ ልዕሊ ኣምላኽ ዓመጻ ንፍጽም ከም ዘለና ኽንዝግዕ ኣይግባእን። ሰይጣን፡ ንሓሶት ኣቦኣ ስለ ዝዀነ፡ ሓሶት ዚዛረብ ኵሉ ናይ ሰይጣን ኣገልጋሊ’ዩ። ንሱ ሰለሞን ኰነ ጐይታና፦

“ሞትን ሕይወትን ኣብ ስልጣን መልሓስ’ዩ፡ እቲ ዜፍቅራ ከኣ ፍሬኣ ኺበልዕ’ዩ።”

“እቲ ሕያዋይ ሰብ ካብቲ ዝቡቕ መዝገብ ልቡ ጽቡቕ የውጽእ። ክፉእ ሰብ ከኣ ካብቲ ኽፉእ መዝገብ ልቡ ኽፉእ እዩ ዜውጽእ። ኣነ ግና፡ ብዘረባኻ ኢኻ እትጸድቕ፡ ብዘረባኻውን ኢኻ እትዅነን እሞ፡ ሰብ ዚዛረብዎ ዘበለ ዘይጠቅም ኵሉ ቓል ብመዓልቲ ፍርዲ ጸብጻብ ኪህብሉ‘ዮም፡ እብለኩም አሎኹ።”

ብምባል፡ ረብሓን ወጽዓን ናይቲ ብምርጫና ዝተዛረብናዮ ቓላት ኣግሂዶምልና ኣለዉ9። ከምኡ ስለ ዝዀነ ከኣ’ዩ፡ እግዚኣብሔር ንነፍሲ ወከፍ ቃላትና ጽን ኢሉ ዚስመዖ። ንእኡ ዜሐጒስን ዜገልግልን ቃላት እንተ ተዛሪብና፡ ዓስብና ጽድቂ ይኸውን። ብልሳንና ሰይጣን ጥራሕ ይግልገል እንተ ነይሩ ግን፡ እታ ንእኡ ዝረኸበት ኵነኔ’ያ ጻማና እትኸውን። ኣብ ሚል 3፡16-18፦

““ሽዑ እቶም ንእግዚኣብሔር ዚፈርሁ ንሓድሕዶም ተዛራረቡ፣ እግዚኣብሔር ከኣ ጽን በለ ሰምዐውን።” ነቶም ንእግዚኣብሔር ዚፍርሁን ንስሙ ኸኣ ዚሓስቡን ዚኸውን መጽሓፍ መዘከርታ ኣብ ቅድሚኡ ተጻሕፈ። ‘በታ ኣነ ዚገብረላ መዓልቲ ንሳቶም ገንዘበይ ኪዀኑኒ’ዮም።’ ኣነ ኸኣ፣ ‘ከምቲ ወላዲ ነቲ ዜገልግሎ ውሉዱ ዚንሕፎ፣ ክንሕፎም እየ።’ ንስኻትኩም ድማ ከም ብሓድሽ ነቲ ኣብ መንጎ ጻድቕን ረሲእን፣ ኣብ መንጎ እቲ ንኣምላኽ ዚግዝኦን ዘይግዝኦን ዘሎ ምፍልላይ ክትርእዩ ኢኹም።”

ብዚብል ቃል ተገሊጹ ዘሎ ዓስቢ ናይ ብፍርሃት ኣምላኽ ዝተማእዘነ ዝርርብ፡ ንኣምላኽ ብልሳንና ኸነገልግል ዜተባብዓና’ዩ (ምሳ 10፡11,18,19,21,31,32፣ 12፡14,18,22፣ 13፡3,5፣ 14፡3,25፣ 15፡1,2,4,7,23,26,28)።

ብግብሪ ምግልጋል፦ ንወዲ ሰብ ካብ ዝተዋህቡ ዓበይቲ ሓለፋታት ሓደ ኸኣ፡ በቶም ኣብ ማሕበራዊ ሕይወትካ እተዘውትሮም ተግባራት ንእግዚኣብሔር ምግልጋል’ዩ። በቲ ኣብ ቤተ ክርስቲያን ብዝተቐብኡ ኣገልገልትን ዚግበር መንፈሳዊ ዕዮታት ጥራሕ ከም ግብሪ ዚቝጸር ነይሩ እንተ ዚኸውን፡ እቲ ኻልእ ኵሉ ሰብ ንኣምላኽ ዜገልግለሉ ዕድል ኣይምሃለዎን ነይሩ። ክብሩ ይስፋሕ መድሓኒ ዓለም ኢየሱስ ክርስቶስ፡ ነቲ ኣብኡ ካብ ዘሎና እምነት እተላዕለ ኣብ ሓድሕድና እንፍጽሞ ኵሉ ሰናይ ግብርታት ንእኡ ከም ዝተፈጸመ ኣገልግሎት ቈጺሩ፡ በቲ ንቕዱሳን ነብያቱን ሓዋርያቱን ዚህቦ ጻማ ኺጻምወና ብሕያውነቱ ፈተወልና። ምኽንያቱ ኵሉ ሰናይ ግብሪ፡ ናይ ኣምላኽ እምበር ናይ ሰብ ግብሪ ኣይኰነን። ምሕረት ምግባር፡ መለኮታዊ’ምበር ስጋዊ ባሕርይ ኣይኰነን። ንዝበደለና ምሕረት ክንገብር ከለና፡ ግብሩ ብምፍጻም ንኣምላኽ ነገልግሎ ከም ዘለና ኸነስተውዕል ይግብኣና። ከነፍቅር፡ ክንልግስ፡ ክንዕገስ፡ ክንድንግጽ፡ ከነጸናንዕ ከሎና’ውን ግብሪ ኣምላኽ እምበር ናትና ግብሪ ኸም ዝገበርና ጌርና ኽብሪ ኣምላኽ ክንሰርቕ ኣይግባእን። ምኽንያቱ ስጋን ደምን ዝለበሰ ሰብ፡ ኣብ ስጋኡ ሰናይ ስለ ዘየልቦ፡ ባዕሉ ኺገብሮ ኣይክእልን’ዩ። ጐይታና’ውን ነዚ ሓቂ’ዚ ምእንቲ ኼረድኣና ኢሉ፡ ንገዛእ ርእሱ ኣርኣያ ብምግባር፡ ብኸምዚ ዚስዕብ ኣለቢሙና ኣሎ።

“ግብሪ ኣቦይ እንተ ዘይገበርኩ፡ ኣይትእመኑኒ። እንተ ገበርኩ ግና፡ ኣቦ ኣባይ ምህላዉ፡ ኣነውን ኣብ ኣቦ ምህላወይ ምእንቲ ኽትፈልጡን ከተስተብህሉንሲ፡ ንኣይ እኳ እንተ ዘይኣመንኩምኒ፡ ነቲ ግብረይ እመንዎ።” ዮሓ 10፡37,38

“ኣነ ኣብ ኣቦ ኸም ዘሎኹ፡ ኣቦውን ኣባይ ከም ዘሎዶ ኣይትኣምንን ኢኻ፡ እቲ ኣባይ ዘሎ ኣቦ ባዕሉ እዩ ግብርታቱ ዚገብር ዘሎ እምበር፡ እዚ ንኣካትኩም ዝነግረኩም ዘሎኹ ዘረባስ ካብ ርእሰይ ኣይኰነኩን ዝዛረቦ ዘሎኹ። ኣነ ኣብ ኣቦ ምህላወይ፡ ኣቦውን ኣባይ ምህላዉ እመኑኒ። እንተ ዘይኰነስ፡ ስለቲ ግብርታት’ኳ እመኑኒ።” ዮሓ 14፡10,11

ጽቡቕ ግብሪ ምግባር ማለት ንኣምላኽ ምግልጋል ማለት ዚዀነሉ ምኽንያት ከኣ ንሱ’ዩ። ሰናይ ምግባር ማለት እቲ ልዑል ኣምላኽ ነቲ ግብርታቱ ባዕሉ ኣባና ኺፍጽሞ ምፍቃድ ማለት’ዩ። ስለዚ ኢና በቲ ኣብ ሰባት እንገብሮ ዅሉ ጽቡቕ ግብርታት ንእግዚኣብሔር ነገልግሎ ኣለና እንብል።

“ኣነ ኸኣ በቲ ንሱ ኣብ ውሽጠይ ብሓይሊ ዚገብሮ ዘሎ ተግባራት ኵሉ እናተጋደልኩ እጽዕር ኣሎኹ።” ቈሎ 1፡29 ካ.ት

“ከመይ ነቲ ኣምላኽ ብፍቕሩ ዝመደቦ ምእንቲ ኽትደልዩን ክትገብሩን ‘ኣምላኽ ባዕሉ’ዩ ኣባኻትኩም ዚዓዪ’።” ፊሊ 2፡13 ካ.ት

“ክፉእ ዚገብር ዘበለ ብርሃን ይጸልእ እዪ እሞ፡ እቲ ግብሩ ምእንቲ ኸይዝለፍ፡ ናብ ብርሃን ኣይመጽእን። እቲ ሓቂ ዚገብር ግና፡ ብኣምላኽ እተገብረ እዩ እሞ፡ ግብሩ ምእንቲ ኺግለጽ፡ ናብ ብርሃን እዩ ዚመጽእ።” ዮሓ 3፡20,21።

እምበኣር ብሓሳብ፡ ብቓል ብግብሪ እንፍጽሞ ዅሉ፡ ንኣምላኽ ወይ ነገልግሎ ወይ ከኣ ንዋግኦ ኸም ዘለና ዅሉ ጊዜ ንዘክር። ምስኡ ካብ ምውጋእ፡ ምስኡ ወጊንካ ንእኡ ምግልጋል ኣዝዩ ዝበለጸን ነገርን ረብሓ ስለ ዜጐናጽፍ፡ ኣብዛ ምድሪ’ዚኣ ብሕይወት ክሳዕ ዘለና፡ ንዅሉ ሓሳባትናን ዘረባናን ተግባራትናን ብምስትውዓል ንምረጾ። ወርትግ፡ “እዛ ዝሓስባ፡ እዛ ዝዛረባ እዛ ዝገብራ ዘለኹ፡ ንኣምላኽ ድያ እተገልግል ንሰይጣንን፧ ኣብቲ ዘለኣለማዊ መጻእየይ’ከ እንታይ ኰን ትፈድየኒ ትኸውን፧” ኢልና ቅድም ድሕርን ምግባርና ንሕተትን ንመርምርን፡ ቅኑዕ ምርጫ ብምምራጽ።

ሰማይን ምድርን ኪሐልፍ፡ ቃለይ ግና ኣይኪሐልፍን እዩ። በለ ጐይታ።

ጸጋ ጎይታና ኢየሱስ ክርስቶስን ፍቕሪ ኣምላኽን ሕብረት መንፈስ ቅዱስን ምስ ኩላትና ይኹን። 

ኦርቶዶክሳዊት ተዋህዶ ቤተ ክርስቲያን ኤርትራ - መንበረ ጵጵስና ሰሜን ኣሜርካ።