“ኣዲኡ ኸኣ ነቶም ተዓጠቕቲ፡ ‘ንሱ ዚብለኩም ኵሉ ግበሩ’ በለቶም። ...ኢየሱስ ከኣ፡ ‘ነዚ ኣጋንእ ማይ ምልእዎ’፡በሎም። ኣፍ ንኣፍ ከኣ መልእዎ። ሽዑ፡ ‘ሕጂ ቕድሕዎ’ሞ ነቦ ዳስ ውሰዱሉ” በሎም፡ ንሳቶም ከኣ ወሰዱ።” ዮሃ 2፡5-8። ብኣቛጻጽራ ግዕዝ ካብ ካብ ጥሪ 12 ክሳብ ጥሪ 18  “ኣስተርእዮ (ኤጲፋንያ)” ተባሂሉ ይጽዋዕ። ኣብዚ ዕለታት ዝዝመር መዝሙር ከኣ “ሖረ ኢየሱስ ብትፍሥሕት ውስተ ከብካብ (ኢየሱስ ክርስቶስ ብሓጐስ ናብ መርዓ ከደ)  እዚ ከኣ ሕጊ ዝሰርዔን ዝማሃረን፡ በረከት ናይ ስጋን ነፍስን ከካፍለና ከምኡውን ነቲ ስራሕ ሰይጣን ከፍርስ እቲ ንደቂ ሰባት ዝፈጠረ አምላክ ኣማልክቲ ጐይታ ኣብ ኢየሩሳሌም ካብ ቅድስቲ ድንግል ማርያም ብዝወሰዶ ስጋ ምግላጹ ንምዝካር ዝተሰርዔ ዕለት እዩ። ኣብዚ ሰሙን እዚ እምበኣር፡ ቤተ ክርስትያን ንምእመናን ተመሓላልፎ ትምህርቲ ከምቲ ዘማራይ ዳዊት “ብለሰ ብኽያት ኪሐልፉ ኸለዉ፣ ዓይኒ ማያት ይገብርዎ፣ ዝናም አዝመራውን ብበረኸት ይኸድኖ። ካብ ሓይሊ ናብ ሓይሊ ይኸዱ፣ አብ ጽዮን አብ ቅድሚ ኣምላኽ ይቘሙ።” (መዝ 84፡ 6, 7)  ሎሚ እቲ ንዓና ብቅድስት ድንግል ማርያም ጌሩ ንሰብ መርዓ ናይ ቃና ዘገሊላ ዝተዋህበና ‘ንሱ ዚብለኩም ኵሉግበሩ’ ኣብ ህይወትና ከመይ ከም ዘሎ፡ ብመሰረት ቃል እግዚኣብሄር ንህይወትና ምርኣይ ኣገዳሲ ስለዝኮነ እዩ፡ እዚ ጽሑፍ ተዳልዩ ዘሎ እሞ ሰናይ ንባብ ይግበረልና።

እዛ ዕለት እዚኣ እግዚኣብሄር ወልድ ብኣካል ስጋ ድሕሪ ምግላጹ፡ ኣብ ቃና ዘገሊላ ቐዳመይቲ ተኣምራቱ ዝፈጸመላ፡ ኽብሩ ድማ ዝገለጸላ እንዝክረላ መዓልቲ እያ። እቲ ስጉው ቃል፡ ጐይታናን መድሃኒናን ኢየሱስ ክርስቶስ፡ ኣብ ስጋዊ ህይወቱ ኰነ ኣብ ማሕበራዊ ሓላፍነታቱ፡ ብዘይካ ብሓጢኣት ብዅሉ ነገር ከምዚ ከማና ኰይኑ እዩ ኣሕሊፍዎ። ኣብ መርዓ እንተ ዓደምዎ ይኸይድ፡ እንዳ ፈተውቱ፡ እንዳ ጸላእቱ ከይተረፈ፡ ብቓላቱ ኼፈንጥርዎ ኢሎም ኣብ ዝዓደምዎ ዕድመ ኸይተረፈ ይኸይድ ነበረ። ዝዀነት ትኹን ዓይነት መድረኽ ወንጌል ንምስባኽ ይጥቀመሉ ነበረ። ነዛ ተዓዲሙላ ዝነበረ መርዓ ድማ፡ መለኮታዊ ኽብሩ ንምግላጽ ዝመረጻ መድረኽ ነበረት። ናብቲ መርዓ ምስ ቅድስቲ ድንግል ማርያም ወላዲቱን ምስ ኵሎም ደቀ መዛሙርቱን ተዓዲሙ ኸደ። ምናልባት ብስጋ ብዝምድና ናይ ዚብጽሕዎም ሰባት መርዓ ነይሩ ኪኸውን ይክእል እዩ።

እንተ ዕዱም ልዕሊ ዝተጸበይዎ በዚሑ፡ እንተ እቶም ሰብ ውራይ ዚኣክል ምድላዋት ዘይገበሩ ኰይኖም፡ እቲ ዝጸመቝዎ ወይኒ ተወዲኡ፡ ማሕበራዊ ክብሪ ናይታ ስድራ ቤት ዚጕድኣሉ ዅነታት ተፈጥረ። ኣብ ከምዚ ዝበለ ፈታኒ ዅነታት፡ እቶም ሰብ ውራይ ኣብታ መዓልቲ ሓጐሶምን ኣበባኦምን፡ ኣብ ከመይ ዝበለ ዘይጽወር ጭንቀትን ሕፍረትን ከም ዚኣትው ንምርዳእ ነጋሪ’ውን ዜድልዮ ኣይኰነን። እቶም ሰብ ውራይ ኪናወጹ ዝረኣየት ቅድስቲ ድንግል ማርያም፡ ናብ ጐይታና መጺኣ ነቲ ተፈጢሩ ዘሎ ጸገም ሓበረቶ። ብመሰረት ዮሃ 2፡11 ቕድሚ’ዚ እዋን’ዚ ጐይታና ተኣምራት ኣይፈጸመን። ስለዚ ድማ “ንምንታይን እንታይ ክገብርን እያ ዝነገረቶ፧’ ዚብል ሕቶ ዜልዕል እዩ። ዋላ ተኣምራት ኪገብር ቅድሚ ሕጂ ኣይትርኣዮ፡ መንነቱ ግና ገና ኣብ ማህጸና ኸይሓደረ ኸሎ ትፈልጦ ነበረት። ስለዚ ፍቓዱ እንተ ዀይኑ፡ ነዚ ጸገም እዚ ኺፈትሕን፡ ነቲ ማዕበል ጭንቀትን ሕፍረትን ድማ ኬህድኦ ከም ዚኽእል ኣይሰሓተቶን። ነቲ “ወይኒ እምበር የብሎምን” ዚብል ቃላ፡ “ገና ጊዜይ ኣይበጽሐን” ዚብል መልሲ ሂብዋ ኼብቅዕ፡ ናብቶም ተዓጣቖ ከይዳ፡ “ንሱ ዚብለኩም ኵሉ ግበሩ” ኢላ መዓደቶም። ንሳቶም ከኣ ንቓላ ተኣዚዞም ኣብ ቅድሚ ጐይታ ኸይዶም ደው በሉ። “ናብኡ እንኸይድሲ ንሱ እንታይ ኪገብረልና እዩ፧ ሕጂዶ ወይኒ ፈጢሩ ኼምጽኣልና ዀይኑ፧” ወዘተ ዚብል ምስምሳት ኬቕርቡን ንእኣ ዀነ ንእኡ ንዘይምእዛዝ ኪመጣልዑ ይኽእሉ እኳ እንተ ነበሩ፡ ነዚ ዘየርብሕ ኣካይዳ ኣይመረጽዎን። ብኣንጻሩ ነቲ ቕዱስ ምኽራ ተኣዚዞም ትኽ ኢሎም ናብኡ ኸዱ።

ንሳውን እንተ ዀነ እቲ ጐይታኣን ፈጣሪኣን ዝዀነ ወዳ፡ “ጊዜይ ገና ኣይበጽሐን” እናበለ ከሎ፡ ንምንታይ እያ፡ ጊዜኡ ከም ዝበጽሐ ገይራ ነቶም ተዓጣቖ ናብኡ ዝለኣኸት፧ ነቲ ዝበላ ከይትሰምዕን ኣብቲ መለኮታዊ ፍቓዱ ኢዳ ኸተእትውን ስለ ዝደለየት ድያ፧ ኣይፋሉን፡ ንሳ ፍቓድ ኣምላኽ ብምፍጻምን ትእዛዛቱ ብምኽባርን ምልእተ-ጸጋ ካብ ኵላተን ኣንስቲ ዝተባረኸት ምዃናን ዘረጋገጸት ቅድስቲ ኣደ እያ። ንሳ ኸምኡ ዝበለት እቲ ምስጢር ስለ ዝተገልጸላን ስለ ዘስተውዓለቶን እዩ። እቲ ንሕና ነቲ ዝበለና ዅሉ እንገብረሉ ጊዜ፡ እቲ ንሱ ግብሩ ዚገብረሉ ጊዜ ምዃኑ ስለ ዝፈለጠት እያ፡ በቲ መስተንክር ግብሩ ንጸገሞም ምእንቲ ኺፈትሓሎም ንሱ ዝኣዘዞም ኵሉ ኺገብሩ ዝመዓደቶም።

እቶም ተዓጣቖ ድማ ኣዝዮም መስተውዓልቲ ነበሩ። ዓይነት ናይቲ ንሱ ዝሃቦም ትእዛዝ ብዘየገድስ፡ ዝበሎም ኵሉ ንምግባር ኣብ ቅድሚኡ ድው በሉ። ኣብ ስርዓት ኣይሁድ ኢድካ ከይተሓጸብካ ምብላዕ ከም ርኽሰት ይቝጸር ስለ ዝነበረ ኣብ ውራያት ይኹን ኣብ ኣባይቲ ንምጽራይ ዚኸውን ማይ ኪቕረብ ናይ ግድን ነበረ። ኣብቲ ቦታ ድማ ንኸምኡ ዕላማ ካብ 75-115 ሊትሮ ማይ ኪሕዝ ዚኽእል ሹድሽተ ኣጋንእ ተተኺሉ ነበረ። ስለዚ በዚ ናይ ሎሚ ኽልተ ሚእቲ ሊትሮ ዚሕዝ ፊስቶታትና፡ ካብ ክልተ ክሳዕ ሰለስተ ፍስቶን ፈረቓን ማይ ዚሕዝ ማለት እዩ። ንሳቶም እቲ ናይ ወይኒ ኣጋንእ ወይኒ ኺመልኣሎም እናተጸበይዎ ከለው ንሱ ግና ነቲ መሕጸቢ ኪኸውን ዝተዳለወ ኣጋንእ ማይ ኪመልእዎ ኣዘዞም። ከምዚ ናይ ዘመንና ሽዑ ብቡምባ ማይ ይመልኡ ኣይነበሩን፡ ስለዚ ኻብ ዒላ ወይ ካብ ሩባ እዮም ማይ ኬምጽኡ ማለት እዩ። ንሳቶም ግና ነታ ናይ ቅድስቲ ማርያም ምኽሪ ኣጽኒዖም ብምሓዝ ነዚ ስግንጢር ዚመስል ትእዛዝ ተኣዚዞም ነቲ ኣጋንእ ኣፍ ንኣፍ መልእዎ። ኣብ ኣእምሮኦም ብዙሕ ዘይተደላዪ ሓሳባት ተገማዲሑ፡ ንሓድሕዶምውን ሒደት ቃላት ሕሹኽ ተባሂሎም ኪዀኑ ይኽእሉ እዮም፡ እዚ ከምዚ ዝበለ ስምዒታት ግና ንተኣዛዝነቶም ኪዕንቅፎ ኣይፈቐደሉን።

ነቲ ቐዳማይ ትእዛዝ ብዓወት ምስ ፈጸምዎ፡ ካልእ ዝኸበደት ትእዛዝ ኣዘዞም። ኪጽልይ ከሎ፡ ወይ ነቲ ማይ ኢዱ ዘርጊሑ ኺትንክዮ ወይ ኪባርኾ ከሎ፡ ወይ ዝዀነ ነገር ኬእትወሉ ኸሎ ኣይረኣይዎን። ገለ ነገር ኪገብር ግና ምልእቲ ዳስ ኣዒንታ ኣፍሊጣ ትጽበዮ ከም ዝነበረት ዘየጠራጥር እዩ። ኣብ ልዕሊ’ቲ ማይ ዋላ ሓንቲ ነገር ከይገበረ፡ “ሕጂ ኻብኡ ቕድሑ እሞ ነቦ ዳስ ውሰዱሉ” ኢሉ ኣዘዞም። እቲ ኣጋንእ ንመሕጸቢ እምበር ንምስታይ ኣይተዳለወን። እቲ ኣቦ ዳስ ድማ ማይ ኣይጸምአን። ኣብ መርዓ መዓልቲ ማይ ዝመልኣ ዋንጫ ሒዝካ ነቦ ዳስ እንካ ኽትብሎ ከሎኻ እሞ፡ “እንታይ’ዩ’ዚ” ኢሉ እንተ ሓተተካ እንታይ ኢልካ ክትምልስ ምተኻእለ፧ ቅድም ነቶም ተዓጣቖ ጥዓምዎ ኢሉ ደሓር ነቦ ዳስ ኪወስዱሉ እንተ ዚእዝዞም፡ እቲ ትእዛዝ ምቐለለሎም ነይሩ። ጐይታ ግና ንናይ መልሓሶም ናይ ምስትምቓር ህዋሳት ድዮም ዚኣምኑ ወይስ ንእኡ’ዮም ዚኣምኑ ዚፍትሽ ቀጢን ትእዛዝ ሃቦም። ንኣታቶም ግና እዚ ትእዛዝ እዚ’ውን ኣይከበዶምን። ከምታ ዝበሎም ብምግባር ነቲ ኣቦ ዳስ ኣስተንከርዎ። ተኣዝዞኦም ተኣምር ከም ዝተገብረ በቲ ኣቦ ዳስ’ዮም ዝተበሰሩ። ንምኽሪ ቅድስቲ ወላዲቱ ሰሚዖም፡ ንትእዛዝ ቅዱስ ወዳ ምስ ኣኽበሩ፡ ነቲ ቐዳማይ ተኣምር ወዲ ኣምላኽ ኪርእዩ በቕዑ።

መብዛሕትና ብዛዕባ’ዚ ተኣምር እዚ ኽንሓስብ ከሎና፡ ዝበዝሕ ጊዜ ኣብቲ መስተንክር ግብሪ ክርስቶስ እምበር፡ ኣብቲ ንክርስቶስ’ውን ዜስተንክሮ ተኣዝዞ ናይቶም ሰባት ፈጺምና ኣይነድህብን ኢና። ወይኒ ናብ ማይ ኪልወጥ ካብ ምርኣይ፡ ሰባት ንክርስቶስ ብዘይ ዝዀነ ጥርጥርን ምድንጓይን ኪእዘዝዎ ምርኣይ ዝዓበየ ተኣምር እዩ። እዞም ሰባት ነቲ ጐይታ ዝኣዘዞም ሕራይ ኢሎም እንተ ዘይእዘዙ ነይሮም፡ እዚ ተኣምራዊ በረኸት እዚ ኸቶ ኣይምተፈጸመን ነይሩ። ሰይጣን ነቲ ዜርብሓናን ዚልውጠናን ሓቂ ምእንቲ ኸይነቕልበሉ፡ ናብቲ ሓላፊ ናይ ስጋ ነገር እምበር ናብቲ መንፈሳውን ዘለኣለማውን ነገር ከነድህብ ኣይፈቕደልናን እዩ። እቲ ብተኣምር ዝተዳለወ ወይኒ ተወዲኡ፡ ንስርዓተ ሽንቲ ሓሊፉ ሽንቲ ዀይኑ ፈሲሱ እዩ። እቲ ብእምነት ዝተፈጸመ ተኣዝዞ ግና ነባርን ኣብ ሰማያት ዓስቢ ዜውህብን ተግባር እዩ። ስለዚ ምእዛዝ ዓቐብ ከም ዚዀነና ሰባት መጠን፡ ካብ በቲ ተኣምራዊ ለውጢ ንላዕሊ፡ በቲ ፍጹም ተኣዝዞ ብዝያዳ ክንድነቕ እዩ ዚግብኣና። ንጐይታ ደኣ ኣሽንኳይ ንማይ ናብ ወይኒ ምልዋጥ፡ ነቲ ወይኒ ምስ ናይ ኣጋንኡ ኻብ ዘየለ ኺፈጥሮ ኣይመጸገሞን ነይሩ። ከም ክርስትያን መጠን፡ በቲ ክርስቶስ ዚድነቐሉ እምነትን ምእዛዝን ክንድነቕ እዩ ዜጥዕመልናን ዜርብሓናን። ጐይታ ድማ ብእምነትን ተኣዝዞን ናይ ሰባት እዩ ዚድነቕ።

ነዞም ሰባት እዚኣቶም ናብ ከምዚ ዝበለ ግሩም ተኣዝዞን ዓወትን ዘብጽሖም። ነቲ እግዚኣብሄር መንፈስ ቅዱስ ብልሳን ኣዴና ቕድስቲ ድንግል ማርያም ዝተነግሮም መለኮታዊ ቓል ምስማዖም እዩ። ንሕና’ውን ከም መፍቀርቲ ማርያም መጠን፡ ነዚ ንዅሎም ቅዱሳን ዘዐወተ ምኽራ እዚ፡ ዕድሜና ምሉእ ክንሰምዖን ከነተግብሮን እዩ ዚግባእ። “አፍቅራ እየ” እናበልና፡ ነቲ ንሳ፡ “ንሱ ዚብለኩም ኵሉ ግበሩ” ኢላ ብዛዕባ ፍቁር ወዳ ዝተዛረበቶ ቓል ዘይነኽብሮ እንተ ዄንና ንእኣ ግብዝ እምበር ሓቀኛ ፍቕርን ኣኽብሮትን ከም ዘይብልና ዜቃልዓና እዩ። ነቲ ንሳ ዝበለቶ ዘይንሰምዖን ዘይነተግብሮን እንተ ዄንና፡ ነቲ ብስማ እንገብሮ ጸሎትን ምህለላን’ውን እግዚኣብሄር ኣይኪሰምዖን እዩ።

እቲ ጐይታና ዚብሎ ዅሉ ድማ ኣብ መጽሓፍ ቅዱስ ብሰፊሕን ብንጹርን መገዲ ተገሊጹልና ኣሎ። ከነፍቅር ክንትሕት፡ ምሕረት ክንገብር፡ ክንልግስ፡ ክንዕገስ ‘ይኣኽለኒ’ ኢልና ካብ ስሰዐ ኽንሕለው፡ ብጽድቅን ብቕድስናን ክንመላለስ፡ ከነገልግል ወዘተ ኢሉናን ኣዚዙናን እዩ። “ግበርዎ” ጥራይ ዘይኰነ፡ ‘ኣይትግበርዎ” ኢሉ ዝሃበና ትእዛዛት’ውን ብዙሕ እዩ። እምበኣር ነቲ “ግበርዎን ኣይትግበርዎን” ኢሉ ዝኣዘዞ ዅሉ ምስ እንገብሮ ናይ ብሓቂ ናይ ጐይታናን መድሓኒናን ኢየሱስ ክርስቶስን ናይ ቅድስቲ ወላዲቱ ኣፍቀርቲ ምዃንና ሽዑ’ዩ ዚረጋገጽ። ነቲ ንሱ ዚብሎ ዚገብር ሰብ ኣብ ሰማይን ምድርን፡ ኣብ መንፈሳውን ስጋውን ነገሩ ይቐንዖን ይሰልጦን። ከምኡ ዚገብሩ ሰባት እናበዝሑ ብዝኸዱ መጠን፡ ሰላም ናይ ቤተ ክርስቲያንና ገዛውትና ከተማና ሃገርና እናዓዘዘ ይኸይድ። ኣምላኽ ኣብ ማእከልና ይነብር፡ በረኸትና ድማ ይዓዝዝ። ነቲ ንሱ ዚብለና ዅሉ ሓዲግና፡ ነቲ ጽቡቕ ኰይኑ ዝተራእየና ፍቓድና ኣብ ምፍጻም ጥራይ እንተ ተጸሚድና ድማ ምስታ ንምዕዶኣ ዝረገጽናዮ ኣዴና ማርያምን፡ ምስቲ ትእዛዛቱ ዘፍረስናዮ ፍቁር ወዳን ጸላእቲ ንኸውን። ስለዚ ዂላቶም ነብያትን ሃዋርያትን ቅዱሳንን ክርስቶስ ዝበሎም ኵሉ ብምግባር ተዓዊቶም እዮም እሞ፡ ንሕና’ውን ኣሰሮምን ኣርኣያኦምን ብምስዓብ ዘለኣለማዊ ዓወት ንተዓወት!!

ጸጋ ጐይታና ኢየሱስ ክርስቶስን ፍቕሪ ኣምላኽን ሕብረት መንፈስ ቅዱስን ምስ ኩላትና ይኹን። 

ኦርቶዶክሳዊት ቤተ ክርስቲያን ተዋህዶ ኤርትራ - ሃገረ ስብከት ሰሜን ኣሜርካ