(ወንጌላዊ ሉቃስ ከም ዝጸሓፎ 2፡1 16) “ክብሪ ንኣምላኽ ኣብ ላዕሊ፥ ሰላም ከኣ ኣብ ምድሪ ኣብ መንጎ እቶም ስምረት ኣምላኽ ዘለዎም ሰባት" ንወንጌል ሉቃስ ጸሓፊኡ፡ እቲ ሓኪምን ወንጌላውን ዝነበረ ግሪኻዊ ዝዓሌቱ ሉቃስ ዝተባህለ ወደ መዝሙር፥ ናብ ሓደ ቴዎፍሎስ ዝተባህለ ግሪኻዊ፥ ታሪኽ ጎይታና ኢየሱስ ክርስቶስ ንኣይሁዳውያንን ንግሪኻውያንን ጥራይ ዘይኰነስ ንምልእቲ ዓለም ከም ዝምልከታ ክፈልጥ ምእንቲ ኢሉ፥ ብ65 ዓ.ም. ጸሓፈሉ። እዚ፥ እቲ ሕጂ ወንጌል ኢልና ነንብቦን ንመሃረሉን ዘለና ጥዑም ዜና-ወንጌል እዩ።

ወንጌላዊ ሉቃስ ንድንግል ማርያም ብኣካል ረኺቡ፡ ምስኣ ኮፍ ኢሉ፡ ዛንታኣን ዛንታ ምላድ ክርስቶስን ዛንታ ድሕነት ደቂ ሰባትን ክጽሕፍ ከሎ ከምዚ ኢሉ ይጅምር። “፩ ኰነ ድማ፥ በቲ ቕነ እቲ ዅሉ ዓለም ኪጸሓፍ፥ ካብ ቄሳር ኣውጉስጦስ ትእዛዝ ወጸ። ፪ እዚኣ እታ ቀርኔሎዎስ ኣብ ሶርያ ተሸይሙ ኸሎ ዝዀነት ቀዳመይቲ ጽሕፈት እያ። ፫ ሽዑ ነፍሲ ወከፍ ኪጸሓፍ፥ ኵሉ ነናብ ዓዱ ኸደ። ፬-፭ ዮሴፍ ድማ፥ ካብ ቤት ዳዊትን ካብ ዓሌቱን ስለ ዝነበረ፥ ካብ ገሊላ ኻብ ዓዲ ናዝሬት ምስታ ጠኒሳ ዘላ ማርያም ሕጽይቱ ናብ ቤትልሄም እትብሃል ዓዲ ዳዊት ናብ ይሁዳ ኺጸሓፉ ደየቡ። ፮ ኰነ ድማ፥ ኣብኡ ኸለዉ፥ ጊዜ ሕርሳ በጽሔ። ፯ በኹሪ ወዳ ወለደት ብዓለባ’ውን ጠቕለለቶ። ኣብቲ ማሕደር ኣጋይሽ ስፍራ ስለ ዘይነበሮም ድማ፥ ኣብ መብልዕ ማል ኣደቀሰቶ። ፰ ኣብታ ምድሪ እቲኣ፥ ብለይቲ ማሎም ኪሕልዉ ኣብ መሮር ዝሓድሩ ጓሶት ነበሩ። ፱ መልኣኽ እግዚኣብሔር ከኣ ኣብ ጥቓኦም ደው በለ፥ ክብሪ እግዚኣብሔር’ውን ኣብ ዙርያኦም ኣብርሄ፥ ብዙሕ ፍርሃት ከኣ ፍርሁ። ፲-፲፩ እቲ መልኣኽ ድማ፥ እንሆ፥ ሎሚ መድሓኒ ኣብ ዓዲ ዳዊት ተወሊዱልኩም ስለ ዘሎ፥ ንሱ ኸኣ ክርስቶስ ጎይታ እዩ፥ ንዅሉ ህዝቢ ዚኸውን ዓብይ ሓጎስ ኤበስረኩም ኣሎኹ እሞ፥ ኣይትፍርሁ። ፲፪ ምልክት ድማ እዚ ይኹንኩም፥ ኣብ መብልዕ ማል ብዓለባ እተጠቕለለ ሕጻን ደቂሱ ኽትረኽቡ ኢኹም፥ በሎም። ፲፫-፲፬ ብዙሓት ሰራዊት ሰማይ ድማ ብድንገት ምስቲ መልኣኽ ተጸንቢሮም፥ “ክብሪ ንኣምላኽ ኣብ ላዕሊ፥ ሰላም ከኣ ኣብ ምድሪ ኣብ መንጎ እቶም ስምረት ኣምላኽ ዘለዎም ሰባት፥ እናበሉ ንኣምላኽ ኣመስገኑ። ፲፭ ኰነ ድማ፥ እቶም መላእኽቲ ኻባታቶም ናብ ሰማይ ምስ ደየቡ፥ እቶም ጓሶት ንሓድሕዶም፥ እዚ እግዚኣብሔር ዝገለጸልና ኸውን ነገር ክንርኢ ንዑናይ፥ ናብ ቤት- ልሔም ንኺድ፥ ተበሃሃሉ። ፲፮ ቀልጢፎም ከኣ ኸዱ፥ ንማርያምን ንዮሴፍን ነቲ ሕጻንን ከኣ ኣብ መብልዕ ማል ደቂሱ ረኸቡ። ፲፯ እዚ ምስ ረኣዩ፥ ብዛዕባ እቲ ሕጻን እተነግረሎም ነገር ኣውረዩ፥” እናበለ ወንጌላዊ ሉቃስ ጸሓፈሉ።

እዚ ዝተፈጸመሉ ግዜ፥ እዚ ሎሚ ነዘውትሮ ዘሎና ዓውደ ኣዋርሕ፥ ቅድሚ ምጅማሩ ብኣርባዕተ ዓመተ ዓለም፡ ብ5ይ ቅድሚ ልደተ ክርስቶስ እዩ ዝነበረ። ዝተፈጸመሉ ቦታ ድማ፥ ኣብ ሓንቲ ካብ ከተማታት ይሁዳ፥ ቤት ልሔም ወይ ድማ ኤፍራታ ተባሂላ እትጽዋዕ፥ ካብ ዮሩሳሌም ሽዱሽተ ማይልስ ኣቢላ ሪሒቓ እትርከብ ክትከውን ከላ፥ እቶም ጓሶት ድማ፥ ካብታ ብስራት ዝተሰምዓላ ከተማ ፍርቂ ማይልስ ኣቢሎም ሪሒቖም ነበሩ። እዛ ቤት ልሔም እዚኣ መበ ቆ ል በኣዝን ሩትን ዳዊትን ድማ እያ። ቤት ልሔም ማለት ብቋንቋ እብራይጢ “ቤት ልሓም” ቤት እንጀራ ማለት እዩ። ክርስቶስ እቲ እንጀራ ሕይወት ድማ፥ ንኹላትና ዝኣክል ዝብላዕ እንጌራ ሕይወት ክኸውን ምእንቲ ኣብኣ ተወልደ። ቤተ ክርስቲያና ድማ፡ እቲ ንቁርባን ዝብላዕ ሕብስቲ፡ ኣብ ቤት ልሔም ኰይና እያ እተዳልዎ።

ቀንዲ ሓሳባት