2ይ ዘይሕጋዊ ሢመት ኣቡን ቄርሎስ፥ ዝተሓብአ ሕርሚ መርገም ኣብ ቤተ ክርስቲያን እዩ።

ኣብዚ እዋን'ዚ ኣብ ቤተ ክርስቲያን ተዋህዶን ኣብ ሕዝብን ወሪዱ ዘሎ ከቢድ ጸገምን ኣደራዕን፥ ይትረፍዶ ዓሚጽካን ገፊዕካን፥ ሓደ ኮንካ’ውን ምስጋሩ ከቢድ ኮይኑሉ ዘሎ እዩ።

ኣባ ቄርሎስ ግና፡ ነቲ ኣብ ኤውሮጳ መጺኦም፥ ብዛዕባ ኣቡነ እንጦንዮስ “ሕጂ ክትሕጎሱ ኢኹም፥ ዕርቂ ክኸውን እዩ! ካልእ ፓትርያርክ ኣይንሸይምን ኢና፥ ቃል ይኣትወልኩም ኣሎኹ” ዝበልዎ ነገር ጠሊሞም፥ ብኃይሊ መንግስቲ ተኾብኪቦም፥ ናይ ብፁዕ ወቅዱስ ኣቡነ እንጦንዮስ፥ ወዲ 96 ዓመት፥ ኣክሊሎም ቀንጢጦም፥ ልብሶም ገፊፎም፥ መንበሮም ወሪሶም፥ መስቀሎም ኢዶም መንጢሎም፥ ንኣቦኦም ኣብ ሞቕሕ ቤት ማእሰርቲ ደርብዮም፥ ንሕጊ ቤተ ክርስቲያን ረጊጾም፥ ካልኣይ ዘይሕጋውን ዘይቀኖናዊን ሕርሚ ዝተሰከሙ ኣቡን ኮይኖም ኣለዉ። ነዚ ሕርሚ’ዚ ተሰኪሞም ድማ ፡ ብድፍረት “ኣነ ናይ ፍቕርን ናይ ምሕረትን ኣቦ እየ። ኣምላኽ ፍቕርን ምሕረትን እዩ እሞ፥ ተፋቐሩ” ኢሎም ኣብ ቤት መቕደስ ኣምላኽ ኮይኖም ተዛሪቦም ኣለዉ። እዚ ብሓቂ ንኣምላኽ ድፍረት እዩ።

“ታሪኽ ብኹሕሊ ኣይጽብቕ፥ ብጸለሎ ኣይድወን!” ከም ዝበሃል ኣብዚ “ክንዲ መጽዓንን ሓሊፉ፥ ክንዲ ማሕለኻን ተሪፉ”፥ ሎሚዶ ጽባሕ ኣምላኽ ይጽወዓኒ ኢሎም ኣብ ንስሓን መገዲ የማንን ክዳለዉሉ ዝግባእ እዋን፥ ኣብ ምዝዛም ዕድሜኦም ኣብ ከምዚ ዓይነት ዕያግ ታሪኽ ምውዳቖም ኣዝዩ ዘሕዝንን ዘጉህን ፍጻመ እዩ። ታሪኽ ቅዱስ ጽሑፍ ከም ዝሕብረና። ንጉሥ ቤልሻጽር፥ ዝዓመጾን ዝዘመቶን ንብረት እግዚኣብሔር፥ ኣብ ኣዳራሹ ኮፍ ኢሉ፥ ክዳን ተኸዲኑ፥ መልኪዑ፥ ኣብ ልዕል ዝበለ መንበር ተቐሚጡ፡ ብሰብ ክነኣድን ክድነቕን ከሎ፥ ኣምላኽ ግን ኣብ ንእሽቶ ሚዛን-ሓቂ ኣቐሚጡ ፈዂሱን ሓሲሩን ረኸቦ።

እዚ ብዕለት 13 ሰነ 2021 ዓ.ፈ ኣብ ኣሥመራ ዝተፈጸመ ናይ ዓመጽ፥ ናይ ጥልመት፥ ናይ ግፍዕን ሓሶትን ሽመት-ኣባ-ቄርሎስ ኣብ ቅድሚ ኣምላኽ ፍንፉንን ዘይቅቡልን ምዃኑ ርዱእ ኮይኑ ኣሎ። ዝጥበር ኣምላኽ ኣኮነን ዘሎና። ህዝቢ ኤርትራ ኮነ ማሕበረ ምእመናን ድማ ድሮ ነጺግዎም ኣሎ። እንተ ቅዱስ ኣቡነ እንጦንዮስ ግና፡ ኣብ ምሉእ ማሕበረ-ክርስትና ስሞም ይጸዋዕ፡ ዝንኦም ይንገር፡ እቲ እሙን ኣምላኽ ድማ ይጓስዮም ኣሎ።

ቀኖናዊ ኣህጉረ ስብከታት፥ ኣቐዲሙ እዚ ሕርሚ እዚ ካብ ዝባን ቤተ ክርስቲያንናን ሕዝብናን ክለዓል፥ ሓቀኛ ዕርቂ ክግበር፥ ቤተ ክርስቲያን ሓዋርያውን ክርስቶሳውን ሰንሰለታ፥ ተኸቲላ ምእንቲ ክትከይድ ደጋጊምና መንፈሳዊ ጸዋዒት ከነቕርብ ጸኒሕና ኢና። ይኹን እምበር ንጸዋዒት ምእመናንን ሕዝብን ጸማም እዝኒ ተዋሂብዎ ይፍጸም ኣሎ።

ስለዚ፡ ዳግማይ ጸዋዒትና፥ ነቶም ሕጂ በዚ ናይ ዓመጽን ሕርሚምን ኢድ-ኣባ-ቄርሎስ ክትሽየሙን ክትሽለሙን ትቀራረቡ ዘሎኹም መነኮሳት ኣቦታት፥ ካብ ምስ እግዚኣብሔርን ምስ ምእመናንን ምበኣስ ክትቁጠቡ፥ ነቲ “ዓለም ንዓይ ምውትቲ እያ” ኢልኩም ምእንቲ ጽድቂ ክትብሉ ዝመነንክምዋ ሕይወትኩም፥ ኣብዚ ናይ መርገምን ናይ ዕንወትን ሕርሚ ከይትሳተፉ ደጊምና ጸዋዒትና ነቅርብ። ንኹሎም ውሉደ-ክህነትን ምእመናንን ድማ ካብ ንሰብ ንኣምላኽ ምእዛዝ እቲ ዝበለጸ ምርጫ እዩ እሞ፥ ነዚ ኣብ ቅድሚ ዓይኒ ኩልና ዝፍጸም ዘሎ ግህሰት-ሕጊ ዓገብ ኢልና ካብ መርገሞም ክንርሕቕ ነዘኻኽር።