እዋኑ ዝጠልቦ ጥርናፈ ኦርቶዶክሳውያን ኣብ ስደት

መግለጺ መንበረ ጵጵስና ኣሕጉረ ስብከታት

በስመ ኣብ ወወልድ ወመንፈስ ቅዱስ ኣሓዱ ኣምላኽ፡ ኣሜን።

ብሩኽ በዓል ቅዱስ ዮሓንስን ሠናይ ምጅማር ሓድሽ ዓመትን ይግበረልና እንናበለ፥ እዚ ዘመነ-ዮሓንስ ናይ ሰላም፥ ቅሳነት፥ ፍቕርን ስኒትን፥ ፍትሕን ሥርዓትን ዝነግሠሉ ክኾነልና ንልዑል እግዚኣብሔር ይልምን።

ዝኸበርኩም ኦርቶዶክሳውያን ውሉደ-ክህነት፥ ኣመንትን ምሉእ ህዝቢ ኤርትራን፥-

እቲ ኣብ 2005 ዓ.ም.ፈ ብረቂቕ ውዲት ሰይጣን ዝጀመረ ዘይሕጋዊ ማሕዩር 3ይ ፓትርያርክ ሃገረ ኤርትራ ቅዱስ ኣቡነ እንጦንዮስ፥ ምግሃስ ጥንታዊ ሕጊ ኦርቶዶክሳዊት ቤተ ክርስቲያን ተዋሕዶ፥ ግዱድ ወተሃደርዊ ዕስክርና ውሉደ-ክህነት፥ ስደትን መስጎግትን ኦርቶዶክሳውያን ኣገልገልትን ኣመንትን፥ ኣብ ልዕሊ ቅድስት ተዋሕዶ ቤተ ክርስቲያን ዘስዓቦ ዕንወትን ምፍልላይን መዘና-ኣልቦ ከቢድ ፈተና ምዃኑ ብመሪር ሓዘን እንሓልፎ ዘሎና ናይ ዘመንና ሕማቕ ፍጸሜ እዩ።

ይኹን እምበር፥ እቲ ኣብ እዋን ፈተና መዋጽኦ ዝፈጥረልና ዘይታኸስ ርህሩህ ኣምላኽና፡ ንኣውያት ግፉዕ ቅዱስ ኣቡነ እንጦንዮስን ወጽዓን ቤተ ክርስቲያን ተዋህዶን ዕሽሽ ስለ ዘይበሎ፥ እንሆ እቲ ን13 ዓመታት መመላእታ “ዓገብ!” ስለ ዝበልና ምእንቲ መንፈሳዊ ግዝኣተ-ሕጊ ብዙሕ ክንዋረደሉ ዝጸናሕና ኣገዳሲ ጉዳይ ቤተ ክርስቲያን እዩ። ሎሚ ግን ካብ ውሽጢ ኤርትራ ጀሚሩ ክሳብ ምሉእ ኵርንዓት ዓለም ምእንቲ መንፈሳዊ ሓቅን ኦርቶዶክሳዊ ሕግን ኣሰኣሰር ኢየሱስ ክርስቶስን ኣብነት ቅዱስ እንጦንዮስን ዝስዕቡ ብዙሓት ጉዱሳትን እሙናት ጓሶትን በብቦትኡ ይበዝሑን ይጥርነፉን ብምህላዎም ብጣዕሚ ዘሐጉስ ሠናይ ተርእዮ እዩ።

ኣብ ከተማ ካስል ሃገረ ጀርመን ብዕለት 17ን 18ን ነሓሰ ኣብ ኤውሮጳ ዝተኻየደ ፈላሚ ሰፊሕ ኣኼባ ውሉደ-ክህነትን ከምኡውን ብተመሳሳሊ እቲ ብዕለት 31 ነሓሰ 2019 ኣብ ሳን-ኣንቶንዮ ሕቡራት መንግሥታት ኣሜሪካ ዝተገብረ መንፈሳዊ ጉባኤን፥ “ብሓዋርያዊ መሪሕነት ቅዱስ ኣቡነ እንጦንዮስ ኢና ንምራሕ” ዝብል ውሳኔታት ምሕላፎም፥ መንበረ ጵጵስና ኣሕጉረ ስብከታት መንፈሳዊ ደገፉን ልባዊ ሓጎሱን ክገልጽ ይፈቱ። “ኣሕዋት ምስ ዝሓብሩ ጸላኢ የባርሩ” ዝብል ምስላ ኣበው ግና ብሕብረት እምበር ብተናጸል ዝመጽእ ፍታሕ ከምዘይለ ይምህረና። ብተወሳኺ፥ ጸላኢና ዝስስን ኣብ ምፍልላይና እዩ፥ ሕብረት ምስ ዝህሉ ግና ጸላኢ ቤተ ክርስቲያን ዕድል ከምዘይረክብ ዘዘኻኽረና ዓቢ ትምህርቲ እዩ። እምበኣር፥ ኣነ ናይ ጳውሎስ፥ ኣነባ ናይ ኣጵሎስ ከይበልና ምፍልላይ ነወግድ።

ብተወሳኺ፥ ከምቲ ጎይታናን መድኃኒናን ኢየሱስ ክርስቶስ “እቲ መስቀሉ ፀይሩ ደድሕረይ ዘይስዕብ ንዓይ ኣይበቅዕን እዩ” (ማቴ፣10፡38) ክብል ሕድሪ እምነት ዝሓደገልና ፍኖተ-መስቀል መከራን ፈተናን ዝበዝሖ፥ ግናኸ መወዳእታኡ ዓወት ምዃኑ ተረዲእና ነፍሲ ወከፍ ኦርቶዶክሳዊ ኣማኒ ይኹን ኣገልጋሊ ምእንቲ ማዕተብ-መስቀልና ክንብል ክሳብ መወዳእታ እሙናት ክንከውን በዚ ኣጋጣሚ ለበዋ ነመሓላልፍ። ዘየድሊ ምትእትታው ኢድ መንግሥትን ግፍዒ ዓመጸኛታት ሰባትን ከብቅዕን ካብ ቀጽሪ ተዋሕዶ ቤተ ክርስቲያን ክወጽእን ድማ ደጊምና ንሓትት።

ኣብ ልዕሊ ቤተክርስቲያን ተዋሕዶን ኣብ ልዕሊ ፓትርያርክ ቅዱስ እንጦንዮስን ንልዕሊ 13 ዓመታት ክወሃብ ዝጸንሐ ንሓድሕዱ ዝዋቓዕ ናይ ሓሶት ክስታት፥ ሕጂ’ውን እዚ ብብፁዕ ኣቡነ መቃርዮስ ዝምራሕ ቀኖናዊ መንበረ ጵጵስና ኣሕጉረ ስብከታት፥ ነቲ ካብ ፈለማ 2005 ዓ.ም.ፈ ጀሚሩ ደው ዝበለሉ ዕላማ፥ ማለት ”ዕላማና ንሰብ ዘይኮነስ ነቲ ልቢ ዝምርምር ኣምላኽ ምሕጓስ እዩ” (1 ተሰ 2፡4) ዝብል መሠረት ሒዙ ሓዋርያዊ ሕግን ቀኖና ቤተ ክርስቲያንን ናብ ንቡር ክሳብ ዝምለስ ሓቅን ሕግን ተዓጢቑ ምስ ኩሎም ደቂ ቅድስት ቤተ ክርስቲያንን ገበርቲ ሰላምን ብሓባር ብጾምን ብጸሎትን ኣብ መንፈሳዊ መትከሉ ጸኒዑ ከም ዝቕጽል ዳግማይ የረጋግጽ።