ትግርኛ

ንልዕሊ ርብዒ ዘመን ኣብ ክልተ ደምበ ተኸፊላ ዝጸንሐት ኦርቶዶክሳዊት ቤተ ክርስቲያን ኢትዮጵያ፣ ትማሊ 26 ሓምለ 2018 (ሐምለ ፩፱, ፳፲ ግእዝ) ምሉእ ውህደት ምግባራ ብሓቂ ዘሕጉስ ዜና እዩ። ብጹእ ወቅዱስ ኣቡነ መርቆሬዎስ 4ይ ፓትርያርክ ኦርቶዶክሳዊት ቤተ ክርስቲያን ኢትዮጵያ ካብ ኣሜርካ ናብ ኢትዮጵያ ተመሊሶም ምስ ብጹእ ወቅዱስ ኣቡነ ማትያስ ብሓደ ኮይኖም ንኢትዮጵያዊት ቤተ ክርስቲያን ተዋህዶ ክመርሕዋ፥ ሲኖዶስ ቤተ ክርስቲያን ኣብ ሕቡራት መንግስታት ኣሜርካ ኣብ ዘካየዶ ዋዕላ-ዕርቂ ብኣዋጅ ተሓቢሩ ኣሎ።

በዚ መሰረት፥ ብጹእ ወቅዱስ ኣቡነ መርቆሬዎስ 4ይ ፓትርያርክ እናተባህሉ ብህይወት ክሳብ ዘለዉ ንኹሉ መንፈሳዊ ነገራት ክመርሕዎ፥ ብጹእ ወቅዱስ ኣቡነ ማትያስ ድማ 6ይ ፓትርያርክ ቤተ ክርስቲያን እናተባህሉ ንኹሉ ምምሕዳር ቤተ ክርስቲያን ክመርሕዎ ምዃኖም እቲ ዝተዋህበ መግለጺ ይሕብር። ብሓቂ ድማ ዘሕጉስ ዜና እዩ። 

ቀዳማይ ሚኒስተር ኢትዮጵያ፣ ዶር ዓቢይ ኣሕመድ’ውን ኣብቲ ናይ መዛዘሚ ዋዕላ-ዕርቂ ተረኺቦም ኣብ ዝሃብዎ መግለጺ፥ ኦርቶዶክሳዊት ቤተ ክርስቲያን ኢትዮጵያ ማለት ሃገር እያ፥ ምምቕቓል ኦርቶዶክሳዊት ቤተ ክርስቲያን ሃገራዊ ምምቕቓል ፈጢሩ’ዩ፥ ሕጂ ግና እቲ ናይ ጽልኢ መንደቕ ፈሪሱ ኣሎ ብምባል ንኣገዳስነት ውህደት ቤተ ክርስቲያን ኢትዮጵያ ገሊጾምዎ። ንዕርቅን ፍቕርን ዝሰርሑ መራሒ ብምርካብኩም ንእግዚኣብሔር ነመስግኖ። ስለቲ ዝገበረልኩም ሰናይ ነገር ኩሉውን ንእግዚኣብሔር ክብርን ምስጋናን ይብጽሓዮ።

ንኦርቶዶክሳዊት ቤተ ክርስቲያን ኢትዮጵያ፥ ምእመናንን ውሉደ ክህነት ድማ እንቋዕ እግዚኣብሔር ሞገሰኩም፥ እንቋዕ እግዚኣብሔር ምሉእ ዕርቀ-ሰላም፥ ኣዋጅ ሓድነት፥ ሰላምን ውህደትን ኣወጀልኩም።  እግዚአብሔር ንኦርቶዶክሳዊት ቤተ ክርስቲያን ኤርትራ'ውን ዘመን ሓድነትን ሰላምን ከምጽኣላ ንልምን።

ይትባረከ እግዚአብሔር ኣምላከ አበዊነ፥ ስቡሕኒ ውእቱ፥ ወልዑልኒ ውእቱ ለዓለም።

ኦርቶዶክሳዊት ተዋህዶ ቤተ ክርስቲያን ኤርትራ

ኣህጉረ ስብከታት ሰሜን አሜሪካ፥ ኤውሮጳን ማእከላይ ምብራቅን።

27 ሓምለ 2018 (ሐምለ ፳, ፳፲ ግእዝ)