ፖለቲካ ኣንታ ፖለቲካ፡

በል እስኪ ፍቐደለይ ከዕልለካ:

ፖለቲካ'ዶ ክብለካ ፖለቲካ:

ዘይጥዑም እቲ ስምካ:

ካብ መን ተፈጢርካ:

ካብ ምንታይ ፋብሪካ:

ፍጥረት ሰብ ዘይብልካ:

ኣብ ምድረ ሲኦል ዝሰፈርካ፡

ኣብ ባህሪ ጋኔን ዝሓደርካ፡

ስቓይ ህዝቢ  ዝጥዕመካ:

ዓመጽ ጎነጽ ዝስራሕካ: 

ጸይቂ ግፍዒ ዝልማድካ፡

ግህሰት ድፍረት ዝኣመልካ፡

ህውከት ዕንወት ዝፈቐድካ፡

ንሃስያ ንገበን ዝዓጠቕካ፡

እዛ ዓለም ገርካያ ግዝኣትካ:

ንደቂ ሰባት ገርካዮም  ባሮትካ:

ክንደይ ህዝቢ ዘጽነትካ:

ክንደይ መንእሰይ ዘቕዘፍካ:

ክንደይ ስድራ-ቤት ዘፍረስካ:

ክንደይ ንብረት ዘብረስካ:

ክንደይ ኣርካናት ዘሰወርካ:

ክንደይ መንፈሳዉያን ዘእሰርካ:

መግለጺ የልቦን ንጠባይካ:

መወዳእታ ዘይብሉ ክፍኣትካ:

እከይ ዝብሃል ኩሉ ኣብ ኢድካ:

ኣብ ኩሉ ወጠምጠም ማለት ኣመል ኮይንካ፡

ኣዳኸርቲ ትሓቁፍ ለባማት ጠሪዝካ፡

ሽማግለ ትሰርዕ መንእሰይ ኣባሪርካ፡

ሓሶት ትማጎት ሓቂ ገዲፍካ:

ግፍዒ ትፍጽም ፍትሒ ረጊጽካ:

ሓሳረ መከራ ትመርጽ ራህዋ ሓዲግካ:

ሕሰም ትጽውዕ ድሕነት ሰጊርካ:

ጥሜት ትዕድም ጽጋብ ኣርሒቕካ:

ድኽነት ትእውጅ ኣፍረይቲ ቀፊድካ:

ሕማም ተላብዕ ማዕጾ-ዶብ ረጊጥካ:

ኩናት ትውልዕ ንሰላም ጠሊምካ:

ንሰይጣን ትሰግድ ኣምላኽ ከለካ:

ፖለቲካ ሳሕቲ ዝምስገን ቁምነገር ኣሎካ:

ኣብ ገለ ክፋል ዓለምና ኣወንታዊ ለውጢ ዝሰረትካ፡

ከም ብዓል ቻይና ብዝሒ ህዝቢ ዝዓንገልካ:

ኣብ ገለ ሃገራት'ውን ራህዋ ዝፈጠርካ:

ኣብ ገለ ሃገራት ካኣ ፍትሒ ዘውሓስካ፡

ብሓፈሻ ግን ዘይተውርዶ ኣበሳ ዘይብልካ:

ኣብ ዓለምና መርዛም ሕንዚ ዝነዛሕካ፡

ኣብ ሲኖዶስ ኤርትራ ዘረዳድእ ዕርቂ ከይተኸልካ:

ናይ ቁዱስ ኣንጦንዮስ መስዋእቲ ከይዓጀበካ:

መራሕቲ ሃይማኖት ካብ ገለ ሃገራት ዓዲምካ:

ኣብ ኤርትራ ሓዱሽ ፓትርያርክ ኣመሪቅካ:

ፖለቲካ እንታይ እዩ እቲ ጉድካ:

ህዝቢ ዓለም ገርካዮ ክነብር ከም ፍቓድካ:

ናይ ደቂ ሰባት ጭንቀት ጥራይ'ዩ ዘዕግበካ:

ኣብ ታሪኽ ዓለምና ብዙሕ’ዩ ብገበን ዘሕትተካ፡

ልዑል ኣምላኽ ባዕሉ ምሕረት የውርደልካ።

 

ፖለቲካ ኣርሓ እንዲኻ ትእዝዝ ንኹሎም:

ንገሊኦም ኣብ ሰማይ ትሰቕሎም:

ንገሊኦም ኣብ ጎዳጉዲ ትቐብሮም:

ንገሊኦም ኣብ ባሕሪ ተጥሕሎም:

ንገሊኦም ኣብ ገደል ተጽድፎም:

ንገሊኦም ዓጀውጅው ተብሎም:

ንገሊኦም ካብ ስልጣን ተውርዶም:

ንገሊኦም ኣብ ስልጣን ተደይቦም:

ንገሊኦም ኣጉል ደሞክራሲ  ተልብሶም:

ንገሊኦም ውልቀ ምልኪ ተስንቖም:

ንገሊኦም ኣብ ቤት ኣምላኽ ተናቑቶም:

ንገሊኦም ኣብ ህዝባዊ ባይቶ ተናኽሶም:

ንገሊኦም ኣብ ስልጣን ተእርጎም:

ንገሊኦም ብዕልዋ መንግስቲ ትሰጎም:

ንገሊኦም ኣብ ሕድሕዶም ተባእሶም:

ንመራሕቲ ሃገራት ከም ድሌትካ ትእዝዞም:

እንተ ደለኻ ትኣልዮም እንተ ደለኻ ትሕዞም።

 

ፖለቲካ ዋላ ዘይብልካ ንሕስያ:

ኣብ ቅድመኻ ኩሉ ክንዲ ጽንጽያ:

ነዛ ዓለም ሰላም ከሊእካያ:

ኩናት ኣብ ዩክረይን ምስ ሩስያ:

ኩናት ኣብ ቓዛ ኣብ እስራኤል ዙርያ:

ምስ ፍልስጠም ምስ ሶርያ:

ምስ ለባኖስ ምስ የመንያ:

ኢራን'ውን ትትኩስ ኣማዕድያ:

ሬሳታት ተኣኪቡ ብክሻ ብዓረብያ:

ኩናት'ውን ኣብ ሱዳን ጽርግያ:

ዕግርግር ኣብ ደቡብ ኮረያ:

ፍኽክር ኣብ ሕድሕድ ሶማልያ:

ኩናት ከሎ ኣብ ውሽጢ ኢትዮጵያ:

ንጎረቤት ኤርትራ ክትወራ ተሃንጥያ:

ፖለቲካ እንዲኻ ኣጆኺ ዝበልካያ:

ኩናት ክትውልዕ እነሆ ተዳልያ:

ኣፍ ደገ ባሕሪ ክትውንን ተመኒያ:

ካብ ፈረንሳ ደገፍ ክትረክብ ጉያጉያ:

ንሩስያ'ውን  ሓገዝ ክትህባ ተጸብያ:

ፖለቲካ ንኢትዮጵያ ዋላ እንተሓገዝካያ:

ንዓሰብ ካብ ማዕዶ ጥራይ እያ ክትርእያ:

ፖለቲካ ኣብ ኩሉ ጦብሎቅ ትብል ከም ወኻርያ:

ነዛ ዓለምና ኣብ ቅልውላው ኣእቲኻያ:

ኣብ ገለ ሃገራት ሰላም ኣጥፊእካያ:

ንገሊኤን ተዕጥቐን ኣዕናዊ መሳርያ:

ንገሊኤን ተጥፈኤን ዝሓንገዳ ዝኣበያ:

ፖለቲካ ስራሕካ ኩሉ ግዜ ንቅያ:

ፖለትካ ይግብኣካ ናይ ክፍኣት መዳልያ።

 

ፖለቲካ ዝፈጸምካዮ በደል ኣብ ሃገርና:

ሓደ ሓደ ከም ኣብነት እንተ ጠቐስና:

ብሰንክኻ ተመቓቒሉ ህዝብና:

ተቓዋሚ ደጋፊ ኢልካ ፈላሊኻና:

ትርጉም ናይ ነጻነት ሓርነት ምስ ጠፍኣና፡

ስርዓተ-ፍርዲ ሕጊ ቅዋም ምስ ሰኣና፡

ንጎረባብትና ቶኽቲኽካ ኩናት ምስ በዝሓና፡

ናይ ብሉጻት ደቂ ሃገር መስዋእቲ ምስ ከፈልና፡

ኩነታት ሃገርና ብኹሉ መለክዒ ምስ ከፍኣና፡

ካብታ ሃገርና ወጺእና ፍቐድኡ ተበታቲና:

ኣብ ርሑቕ ኣወስትራልያ ሰፊርና:

ኣብ ሃገራት ኤውሮጳ ፋሕ ኢልና፡

ኣብ ካናዳ ኣመሪካ ተዘሪእና:

ኣብ ሃገራት ኣፍሪቃ ተዛሚድና:

ኣብ ማእከላይ ምብራቅ ተዋፊርና:

ካብ ኩሉ ስድራቤት ዝንኣስና ዝዓበና:

ኣረጊት ኣደ ሽማግለ ኣቦ ከይተረፍና:

መንእሰይ ብፍላይ ኩላህና ተሰዲድና:

ኣብ ኤርትራ መን ተሪፋ መን ገዲፍና:

ጥራሓ ተሪፋ መፍቶ እቶም ጸላእትና:

ተረጊምና ዲናስ ወይስ ፈሪድካና፡

መስሓቕ ህዝቢ ዓለም ዝገበርካና:

ከምታ ኣብ ሓሳረ-መከራ  ሓኒቅካ ዘእተኻና:

ፖለቲካ ቀልጢፍካ ካብታ ጸበባ ኣውጽኣና:

ብሰላም ናብታ ትውልዲ ሃገርና ምለሰና:

ባህልና ታሪኽና  ክንዕቅብ ኣብታ መረበትና:

ቀሲንና ክንነብር እታ ዝተረፈት ሂወትና:

ትምኒትና ክሰምር ኣምላኽ ይርድኣና።

 

ክብርን ምስጋናን ንልዑል ኣምላኽና:

ራህዋን ሰላምን ንሓላል ህዝብና:

ዕድመን ጥዕናን ይውረድ ኣብ ኩላህና:

ዕድመኻ ይሕጸር ፖለቲካ ዓለምና።

10 የካቲት 2025