ብሓዋርያዊ ሰንሰለት ቅዱስ ኣቡነ እንጦንዮስ እትምእከል ኦርቶዶክሳዊት ተዋሕዶ ቤተ ክርስቲያን ኣብ ስዊዘርላንድ ከተማ ጀነቫ ተመስሪታ። እዚ ብጻዕሪ ካህናትን ብምትሕብባር ምእመናን ዝተመስረተ ቤተ ክርስቲያን ቅድስት ድንግል ማርያም፡ ድሮ ንምእመናን መንፈሳዊ ኣገልግሎት ምሃብ ጀሚሩ ኣሎ።

በዚ ኣጋጣሚ፣ መንበረ ጵጵስና ሰሜን ኣሜርካ ንምእመናን ከተማ ጀነቫ ኦርቶዶክሳዊት ተዋሕዶ ቤተ ክርስቲያን እንቋዕ ደስ በለኹም እናበለ በቲ እግዚኣብሔር ዝገበረልኩም ሰናይ ነገር ንኣምላኽ ስብሓት ይኹኖ።

ሰይጣንን መሳርሕቱን ኩሉግዜ ሰለዘይዕርፉ ግና፣ ነቲ ዝሃነጽኩሞ ቤተ ክርስትያን ከፍርሱ፣ ንሕብረትኩም ክብትኑ፣ ለይትን መዓልትን ላሕ ዝብሉ ኣይክሰኣኑን እዮም። ነዚ ተረዲእኩም፣ መጀመርያ ብጸሎት ክትነቕሑ፣ ከምኡውን ከምቲ ቅዱስ ጽሑፍ “ነቲ ዚመጸካ መከራ ኣይትፍርሀዮ። ክሳዕ ሞት እሙን ኩን፡ ኣነውን ኣኽሊል ህይወት ክህበካ እየ።” (ራእይ 2.10) ዝብሎ፣ ኣብቲ ዝተጸዋዕኩምሉ እምነት ደው ክትብሉ ይግባእ። እግዚኣብሔር እሙን እዩ'ሞ፡ ኣብቲ እዋን ፈተና ኣይክሓድገኩምን እዩ።