- በስመ ኣብ ወወልድ ወመንፈስ ቅዱስ አሐዱ አምላክ፡ ኣሜን!
- መላእ ገዳማውያን ኣቦታት፡ ውሉደ ክህነትን ማኅበረ ማእመናንን ምእመናትን ብኃበራ፡
ሕጋውን ቀኖናውን ሣልሳይ ፓትርያርክ ዘሃገረ ኤርትራ፡ ቅዱስ እንጦንዮስ ቀዳማዊ፡ ኣብታ ቅድስቲ መንበሮም ይምለሱ እሞ፡ ዕርቀ-ሰላም ክወርድ፥ ብተስፋ ንብዙሕ እዋን ክጽበ ጸኒሑ እዩ። ይኹን እምበር እቲ ብወገን ኣሥመራ ብ13 ግንቦት 2021 ዓ.ም.ፈ ዝተኣወጀ፡ ቀኖና ቤተ-ክርስቲያን ዝጠሓሰ፡ ምርጫ ዘይሕጋዊ 5ይ ፓትርያርክ፡ መንበረ ጵጵስና ኣኅጉረ ስብከታት ሰሜን ኣመሪካ፡ ኤውሮጳን ማእከላይ ምብራቕን፡ ብትሪ ከም ዝነጽጎን ከም ዝቃወሞን እናሓበረ፡ ኣብ ደረት ሓቅን ሕግን ቈይሙ ኸኣ፡ ከም ቀደሙ፡ ንሓዋርያዊ መሪሕነት 3ይ ፓትርያርክ ቅዱስ እንጦንዮስ ጥራይ ከም ዝቕበል፡ ንመላእ ማኅበረ ምእመናን፡ ውሉደ ክህነት፥ ኣኃት ኦሬንታል ኣብያተ ክርስቲያናትን ንኹሎም ዝምልከቶም ኣካላትን፡ ጽኑዕ መርገጺኡ የፍልጥ።
ቀኖናዊ መንበረ ጵጵስና ኣኅጉረ ስብከታት፡ ነዚ ብጸቕጥን ድፍኢትን መንግሥቲ ዝተገብረ፡ ሕርያ 5ይ ፓትርያርክ፡ ንጥንታዊ ቀኖናን ንሓዋርያዊ ሰንሰለትን ዝጠሓሰ፥ ስለ ዝኾነ ኩሉ ኦርቶዶክሳዊ ኣማኒ ኣሰር ቅዱስ እንጦንዮስ ክስዕብን ኣብ ሓቂ ደው ክብልን የዘኻኽር።
ቅድሚ ሕጂ ኩሎም ጳጳሳት፡ ብፍላይ ከኣ ኣቡነ ቄርሎስ፡ ኣብ ሃገረ-ነርወይ ኣብ መወዳእታ 2018 ዝተዛረብዎ ”ኣይትሸበሩ ሕጂ ሰላም ክኸውን’ዩ። ንሕና ንኣቦና ኣቡነ እንጦንዮስ፡ ነፍቅሮም፡ ንደልዮም. . . ብናይ ኣቡነ እንጦንዮስ እንተዀይኑ ሕጂ ክትሕጐሱ ምዃንኩም አረድአኩም ኣለኹ፡ ቃል እኣትወልኩም ኣለኹ” ብምባል፡ ኣብ ቅድሚ ሕዝቢ፡ መብጽዓ ኣትዮም ክንሶም፡ ነቲ ዝኣተውዎ ቃል ጠሊሞም፥ ብሸርሕን ምፍርራሕን ሰበ ሥልጣን መንግሥቲ ኣብ ዘይመንበሮም ንኽቕመጡ ብምቕባሎም፥ ታሪኻዊ ውድቀት ንቤተ ክርስቲያንና ኮይኑ ተሰኒዱ ኣሎ።
ቅድስት ቤተ ክርስቲያን ንኣስታት ክልተ ሽሕ ዓመታት ክትስዕቦ ዝጸንሐትን ዘላን፡ ሐዋርያውን ቀኖናውን ኣገባብ ሲመተ ፓትርያርክ፡ ኣብ ዘመንና በጺሑ ክጠሓስ ስለ ዘይብሉ፥ ቀኖናዊ መንበረ ጵጵስና ኣኅጉረ ስብከታት፡ ነዚ መሠረታዊ ሓቂ እዚ ሸለል ኢሉ ክሓልፎ ብፍጹም ስለ ዘይግባእ፥ ኩሉ ኣማኒ ብሕብረት ምእንቲ ክብርን ሓድነትን ተዋሕዶ ቤተ ክርስቲያንና ኣብ ሓቂ ደው ኢሉ ዓገብ ክብል ይግባእ።
እቲ ንዕለት 13 ሰነ 2021 ዓ.ም.ፈ ተቘጺሩ ዘሎ በዓለ ሲመት፡ ከምቲ ኣብ ዘመነ ኣቡነ ዲዮስቆሮስ ዘጋጠመ፡ ሕጂ’ውን ነቲ ቅዱስ ሥርዓት እግዚአብሔርን፡ ንቀኖና ቤተክርስቲያንን ስዒርካ ዝግበር ሲመት፡ መርገም እምበር በረኸት ከስዕብ ዘይክእል ብምዃኑ፡ ኩሎም ገዳማውያን ኣቦታት፡ መላእ ውሉደ ክህነትን፡ መላእ ማኅበረ ምእመናንን ምእመናትን ከምኡ’ውን ኩሎም ዝምልከቶም ኣካላት ክሓብርዎ ዘይኮነስ ክቃወምዎን ክዅንንዎን ቀኖናዊ መንበረ ጵጵስና ይጽውዕ።
ቀኖናዊ መንበረ ጵጵስና ኣኅጉረ ስብከታት፡ ገዳም ደብረ-ቢዘንን ገዳም ኣቡነ እንድርያስን መንፈሳዊ ሓላፍነቶም ተረዲኦም ከቢድ ዋጋ ዝኸፍሉ ዘለዉ፥ ኣቦታት እናኣመስገነ፥ ዝተረፋ ገዳማትና ድማ ኣሰረን ክስዕባ ደጊሙ የዛኻኽር። ከምቲ ሕብረት ኦሬንታል ኣብያተ ክርስቲያናት ብ 13 ግንቦት 2021 ዓ.ም.ፈ ነቲ ዘይሕጋዊ 5ይ ሽመትን ኢድ ምትእትታዉ መንግሥትን ዝኾነኖኦ፡ ገዳማትናውን ሓዋርያዊ ሰንሰለት ንምዕቓብ፡ ነዚ ቅዱስ ተግባር ክስዕበኦ ንላቦ።
ጸልዩ በእንተ ሰላመ ቤተ ክርስቲያን!
ቀኖናዊ መንበረ ጵጵስና ኣኅጉረ ስብከታት፡ ሰሜን ኣመሪካ፡ ኤውሮጳን፡ ማእከላይ ምብራቕን
20 ግንቦት 2021 (፲፪ ግንቦት ፳፻፲፫ ዓ.ም)