ብፁዕ ኣቡነ መቃርዮስ፡ ኣብ ማእከላይ-ምብራቕ ሓዋርያዊ ዑደት ኣካይዶም። ብፁዕ ኣቦና፡ ብመጀመርታ ንተዋህዶ ቤተ ክርስቲያን ኤርትራ ወኪሎም ኣብቲ ኣብ ግብጺብ9 ሰነ 2010 ዓ.ም (ብ2 ሰነ 2002 ግእዝ) ኣብ ኢየሩሳሌም ሃገረ-እስራኤል ኣትዮም፡ ኩነታት እቶም ኣብ ማእከል ስደተኛታት ተዓቑቦም ዘለዉ ኤርትራውያን ንኽፈልጡ ቀጥታዊ ርክብ ኣካይዶም። ኣብ እስራኤል ካብ ዘለዉ ስደተኛታት እቲ ዓብላሊ ቁጽሪ፡ ብዝሒ ኣመንቲ ኦርቶዶክስ ስለዝኾነ ድማ፡ ኣብ መንጎ እቶም ስደተኛታት ምስ ዘለዉ ካህናትን ዲያቆናትን ብምዝርራብ፣ መንፈሳዊ ኣገልግሎት ክርከበሉ ዝኽእል ኩነታት ዘትዮም። ኣብቲ ብፁዕ ኣቦና ዝሃብዎ ትምህርቲ፡ "ስደት ብህዝቢ ኤርትራ ኣይተጀመረን። ኵሉ መነባብሮ ዝኰርኰሖን ዘይጠዓሞን ህዝቢ፡ ክስደድ ጸኒሑ’ዩ፡ ሕጂ’ውን ይስደድ ኣሎ። እምነትካን ሃይማኖትካን ገዲፍካ ዝግበር ስደት ግን፡ የልቦን። ንአብነት፡ ዮሴፍ ንግብጺ ክስደድ ከሎ፡ እምነቱ ስለ ዘይሓደገ’ዩ፡ ነቲ ኣብ እንዳ ጶጢፋር ዘጋጠሞ ከቢድ ፈተና ክሰግሮ ዝኸኣለ። ስለ’ዚ ንስኻትኩም’ውን፡ ካብ ዝኾነ ጊዜ፡ ብዝበለጸ ረድኤት ኣምላኽ ከድልየኩም እዩ። ስለ’ዚ ከኣ እዩ፡ ምስ እግዚኣብሔር ዘራኽበኩም ቤተ-ክርስቲያን ክህልወኩም ዘድሊ ዘሎ። ከመይ’ሲ፡ ምጽንናዕን ተስፋን ካብ እግዚኣብሔር ጥራይ’ዩ ዝርከብ፡” ብምባል ቃል-ማዕዳ ኣስሚዖም።
ካብ’ዚ ብምቕጻል፡ ብፁዕ ኣቦና፡ ምስ ሓለፍቲ እቲ ምምሕዳር ስደተኛታት ተዛራሪቦም። ካብ’ቲ ብፁዕ ኣቦና ዝበሉዎ ቃል፡ ብዛዕባ ስደት ክዝረብ ከሎ ካብ ህዝቢ እስራኤል ንላዕሊ ብዛዕባ ስደት ዝርድኦ ካልእ ህዝቢ ኣሎ ክበሃል ኣይከኣልን። ኣቦታትኩም ብመገዲ ስደት ከምዝሓለፉ ንዓኻትኩም ምንጋር ዘድሊ ኣይኮነን። ንህዝቢ እስራኤል ግን፡ ዓለም ኣይሓደጎምን፡ ጸግዕን ዑቅባን ክኾኖም ከምዝኸአለ ታሪኽ ምስክር እዩ። ሕጂ ድማ፡ ዓለም ብግዲኡ ናባኻትኩም ዑቝባ ደልዩ ይመጽእ አሎ። ዝመረሮን ዝጸበቦን ህዝቢ፡ ተስፋ ከምዝደሊ ንዓኻትኩም ይጠፍኣኩም’ዩ ስለ ዘይበሃል፡ እቲ ዝተረፈ ዕማም ኵሉ ንዓኻትኩም ዝግደፍ’ዩ ብምባል ልቦና ዝመልኦ መልእኽቲ ኣማሓላሊፎም።
ብድሕሪ'ዚ፡ ኣብ’ታ ሃገር ምስ ዘለዉ ክልተ ሊቀ-ጳጳሳት ግብጺ፡ ብፁዕ ኣቡነ ኣብርሃምን ብፁዕ ኣቡነ እንጦንዮስን ተራኺቦም፡ ኤርትራውያን ኣመንቲ መንፈሳዊ ኣገልግሎት ክረኽቡሉ ዝኽእሉ መገዲ ተዘራሪቦም። ከም ውጺኢቱ፡ “ታቦት ቅድስት ድንግል ማርያም” ሒዞም ሥርዓተ-ኣምልኾ ንምፍጻም ዘኽእሎም ቤተ-ክርስቲያንን ንዋየ-ቅዱሳትን ድሮ ረኺቦም ኣሎዉ። ብ5 ሰነ 2002 ዓ/ም ድማ ብብፁዕ ኣቦና ዝተመርሐ ፈላሚ ቅዳሴ ኣካይዶም።
ንሓዋርያዊ ተልእኮ ብፁዕ ኣቦና ንምትዕንቓፍ ዝተገብረ ፈተነ ምንባሩ ክጥቀስ ግቡእ እዩ። ዮፍታሀን መሻርኽቱን፡ ምፍራስን ምብልሻውን እምበር ሠናይ ተግባር ምስ ባሕርያቶም ዝሳነ ብዘይ ምዃኑ “እቶም ብሥጋ ዝምርሑ ንኣምላኽ ከሥምሩዎ ኣይከኣሎምን እዩ” (ሮሜ 8፡8) ክብል ቅዱስ ጽሑፍ ሰኒድዎ'ሎ። እኩይ ተግባራቶም ኣይተዓወተን፣ እታ ቤተ ክርስትያን ግና ተሰሪታ።
ብፁዕ ኣቦና ሓዋርያዊ ዑደቶም ብምቕጻል ብ19 ሰነ 2010 ዓ/ም (ብ12 ሰነ 2002 ግእዝ) ናብ ሃገረ -ግሪክ ኣትዮም ኣለዉ። እቲ ኵሉ ምእንቲ ኣገልግሎት ወንጌል ዝገብርዎ ዘለዉ ዑደት፡ ነታ ኣብ ሓደጋ ትርከብ ዘላ ቤተ ክርስቲያንና ምኽንያት ዓወት ኮይኑ ክርከብ ሠናይ ትምኒትና ንገልጽ።
ክብርን ዕቤትን ንኣምላኽና ይኹን።
