“ኣቱም ኣቦታትውን፡ ነቶም ውሉድኩም ብናይ ጐይታ ተግሳጽን ምዕዶን ደኣ ኣዕብይዎም እምበር ኣይተዀርይዎም።” (ኤፌ 6፡4)
ሓደ መዓልቲ ኣብ ጐረቤትና ብርቱዕ ኣውያት ምስ ተሰምዐ፡ ክንረድእ ምስ ሓደ ብጻየይ ተጓይና ከድና፡ እንተ ርኣናስ ሓደ ፍርዙን ወዲ ንኣዲኡ ብኽሳዳ ሓኒቑ የጣርዓ። ምናልባት ንምንታይ ከምዚ ይኸውን፧ እዚ ሞት ይግብኦ መርገም እዩ ንብል ንኸውን። ወላዲ ኣብቲ ዝግብኦ ዕድመ ንውሉዱ እቲ ክገብሮ ዝግብኦ መንፈሳዊ ሓላፍነት እንተ ደኣ ዘይገይሩ፡ ንመጻኢ ሓጢኣት ምኽንያት ዝኾኑ፡ ኣንጻር ኣምላኽን ጽድቕን ዝቓለሱ ደቂ ብልያል የዕቢ ምህላው ክግንዘብ ይግብኦ። እዞም ኣብ ብዙሕ ከባቢ ንሰባት ዝርብሹ ዘለው እኳ፡ ኣብቲ ዝግብኦም ዕድመ ተግሳጽን ማዕዳን ስለ ዘይረኸቡ እዮም። ኣምላኽ ከኣ ውሉድ ብምውላድና ዘይኮነስ ናይ ብሓቂ ነቲ ውሉድ ዘርኢ ኣምላኽ ጌርና ብምርኣይናን ንእኡ ዝበቅዕ ጌርና ብምዕባይናን እዩ ዝሕጐስ። ስለዚ ንደቅና ኣብ ኢድና ከለው ብፍላይ ኣብቲ ክሰምዑና ዝኽእሉ ዕድመ፡ ብናይ ጐይታ ተግሳጽን ማዕዳን ከነዕብዮም ግቡእና እዩ። እዚ ምግባር እንተ ረሲዕና ግና ከምቲ ኣብቲ መእተዊ ጽሑፍና ዝረኣናዮ ከጋጥመና ዝከኣል ነገር እዩ። (ምሳ 22፡6፣ ምሳ 15፡20፧ ዘዳ 6፡7)
ኣስተንትን
1. ኣምላኽ እንታይ ስለዝደለየ እዩ ውሉድ ሂቡካ፧
2. ንውሉድካ መደብ ጌርካ ተገልግሎምዶ፧
3. ካብ መጽሓፍ ቅዱስ እዙዛትን ዘይእዙዛትን ውሉድ ዘርዝር፧
ጐይታ ንዅሉ በቲ ንሱ ዝሓስቦን ዝርእዮን ክንሓስብን ክንርእን ክረድኣና ንጸሊ።
ይትባረክ እግዚኣብሔር ኣምላከ ኣበዊነ።
መስከረም 6
“ኵሉ ግብርኹም ብፍቕሪ ይገበር” (1ቈረ 16፡14)
መሰረት ኵሉ ናብራኻ ማለት ኣገልግሎትካን ኵሉ ግብርኻን ብፍቕሪ እዩ ክኸውን ዘለዎ። ምኽንያቱ ፍቕሪ መደምደምታ ኵሉ ትእዛዝ ስለ ዝኾነት። ብዘይ ፍቕሪ ኵሉ ንብረትካ ንድኻታት እንተ ሃብካ፡ ስጋኻውን ንምንዳድ ኣሕሊፍካ እንተ ሃብካ፡ ካልእ ንእኡ ዝመስል ተግባራት እንተ ፈጸምካ'ውን ኣብ ቅድሚ ኣምላኽ ሚዛን ኣየውህበካን እዩ። ስለዚ ብፍቕሪ ምግልጋልና ንኣና ኣብ ኣምላኽ ምህላውና ውሕስነት ዘውህበናን፡ ኣብ ቅድሚ ኣምላኽ ድማ ምኡዝ መስዋእቲ ከነቕርብ እንኽእለሉን ምዃኑ ፈሊጥና እንገብሮ ኵሉ ኣብ ፍቕሪ ዝተሞርኮሰ ምዃኑ ብምርዳእ ክንፍጽሞ ይግባእ። (ማቴ 7፡22-23፣ ፊሊ 1፡16-17፣ 1ቈረ 13፡1-3)
ኣስተንትን
1. እትገብሮ ዕዮ ዅሉ ካብ ፍቕሪ ዝተበገሰ ድዩ፧
2. ካብ ፍቕሪ ወጻኢ ዝግበር ኣገልግሎት እንታይ ሳዕቤን ኣለዎ፧
3. ንማሕበር ኤፌሶን ነታ ቐዳመይቲ ፍቕርኻ ሓዲግካያ ክብሎ ከሎ እንታይ ማለት እዩ፧
ድርኺት ናይ ኵሉ ኣገልግሎትና፡ ንኣምላኽ ዘለና ፍቕሪ ክኸውን ንጸሊ።
ይትባረክ እግዚኣብሔር ኣምላከ ኣበዊነ።
ካብ ውሽጢ ኤርትራ ዝተረኽበ ንቤተ ክርስቲያን ተዋህዶ ንምቁጽጻር ብመንግስቲ ኤርትራ ክካየድ ዝጸንሐን ዘሎን ሽርሒ ዘቃልዕ ቪድዮ
ድኳን መጻሕፍቲ/Book Store
ራድዮ ቃለ ኣዋዲ