”ግናኸ እታ መዓልቲ እቲኣ ኣብ ኩላ ዝባን ምድሪ፡ ንዝነብሩ ዘበሉ ከም መፈንጠራ ክትበጽሖም እያ እሞ፡ ስስዐን፡ ስኽራንን ሓልዮት ሓዳርን ንልብኹም ከይከብድ፡ እታ መዓልቲ እቲኣ ብድንገት ከይትመጸኩምሲ ንነፍስኹም ተጠንቀቑ። ስለዚ ኻብዚ ዝመጽእ ኵሉ ነገር ንምሙላቕን፡ ኣብ ቅድሚ ወዲ ሰብ ደው ንምባልን ሓይሊ ምእንቲ ክትረኽቡስ፡ ኵሉ ሳዕ እናጸለኹም ንቕሑ።” (ሉቃ 21፡34-36)

ኣብዛ ምድሪ እዚኣ ንልብና ዘኽብዱን፡ ካብ ጐይታ ዝፈልዩን ብዙሓት እዮም። ምናልባት ኣብዞም ሰለስተ (ስስዐ፡ ስኽራን፡ ሓልዮት ሓዳር) ክጠቓለሉ ይኽእሉ ይኾኑ፡ ዕላማኦም ድማ፡ ልቡጣት ከም ሎዲቅያ ክገብሩና እሞ ዓዊርና ምርኣይ ብምስኣን፡ ህያዋን እናመሰለና፡ ሞይትና ክንርከብ'ዩ። እዚ ዝጠቐስናዮ ይኹን ካልእ ፈውሱ፡ “ኵሉ ሳዕ እናጸለኹም ንቕሑ እዩ” ምኽንያቱ ብጸሎት ሓይሊ ምስ እንዕጠቕ ጥራሕ ኢና፡ ብስልጣን ደው ንምባል ንበቅዕ። “ስለዚ ምሕረት ምእንቲ ክንቅበል፡ ብጊዜ ጸበባና ንረዲኤትና ዝኸውን ጸጋ ክንረክብ ብትብዓት ናብ ዝፋን ጸጋ ንቕረብ” ዝተባህለልና። ምስ ዘይንነቅሕ ግን፡ ተዀርባ በቑሉ፡ ቈጥቋጥ ክውሕጠና እዩ። (ኤፌ 6፡10-20፣ 1ተሰ 5፡6-8፣ ራእ 3፡1-2,15-17)

ኣስተንትን

1. ንሕና'ኸ ካብዞም ንልብና ዝኸብዱ ነጻ ዲና?

2. ካብዚ ኵሉ መፈንጠራ ንምሙላቕ፡ ብጸሎት ኵሉ ሳዕ ንነቅሕ'ዶ ኣለና?

3. ከምቲ እታ መርዓትን፡ እቲ መንፈስን ዝብልዎ፡ ጐይታ ኢየሱስ ንዓ ንምባል ትብዓት ኣለና'ዶ ?

ጐይታ ባዕሉ ንዅለንትናና ክቕድስን በቲ ምጽኣቱ ብዘሎ መንፈስናን፡ ነፍስና፡ ስጋናን ብዘይ መንቅብ ክርከብ ክሕልወና ወትሩ በጸሎት ንንቃሕ።

ይትባረክ እግዚኣብሔር ኣምላከ ኣበዊነ።

መካነ-ህይወት