“ኣቱም ብእግዚኣብሄር ተስፋ እትገብሩ ኵልኹም በርትዑ ልብኹምውን ይጽናዕ“ (መዝ 31፡24)

“ክርስቲያን ተስፋ ኣይቆርጽን እዩ” ዝብል ኣበሃህላ ብምርዳእ ይኹን ብዘይ ምርዳእ ካብ ብዙሓት እንሰምዖ ቋንቋ እዩ። ብርግጽ ሰዓቢ ክርስቶስ ዝኾነ ሰብ ተስፋ ምቑራጽ ባህርይኡ ኣይኮነን፡ ክኸውን'ውን ኣይግባእን። ምኽንያቱ ከምቲ ዓለም ኣብ ዕዮ ኣእዳው ፍጡራት ኣሚና ተስፋ ትገብር ዘይኮነስ፡ ነቲ በዒንትና ዘይረኣናዮ ግናኸ ብእምነት እነስተውዕሎ ጀማርን ደምዳምን እምነትና ዝኾነ ክርስቶስ ኢና ተስፋ እንገብር (ሮሜ 8፡24-25)። ካሌብን ኢያሱን ነታ ጸባን መዓርን እተውሕዝ ከተማ ከም ዝወርስዋ ተስፋ ምስ ተዋህቦም ዘይከምቶም ዓሰርተ ሰለይቲ ብቑመትን ብዝሕን ዓናቓውያን ከይተዳህሉ እቲ ንኣርብዓ ዓመታት ኣብ ምድረበዳ ዘሳገሮም ኣምላኽ ሕጂውን ነታ ዝተረፈት ንእሽተይ ቦታ ከም ዘሳግሮም ሰብ ምሉእ ተስፋ ኮይኖም ክንኣትዋ ኢና ኢሎም። ናብራ ክርስትና ኣብ ተስፋ ኣምላኽ እምበር ኣብ ጻዕርን ሃልክን ስራሕ ኣእምሮ ኣይምርኮስን እዩ። ነዚ ጽቡቕ ኣብነት ክኾነና ዝኽእል ኣብርሃም እዩ። ድሕሪ ነዊሕ ሃረርታን ትጽቢትን ተስፋ እግዚኣብሔር ኣብ ጊዜኡ ተፈጺሙ። ምምህማን ልቢ ኣብርሃም ብዘየገድስ ኣብቲ ምዱብ ጊዜኡ ተስፋ እግዚኣብሔር ክውን ኮይኑ። እዚ ክውንነት ኣብዛ ምድሪ እዚኣ መጻእተኛን ስደተኛን ምዃኑ ኣግሂዱሉ። ኣብቲ ዝተዋህቦ ምድሪ ድማ ህንጻን ጽቡቕ ነገርን ኣይበሃገን። ንጊዚኡ ካብ ጸሓይ ከጽልለሉ ዝኽእል ድንኳን ጥራይ ተኺሉ።

ዘለናዮ ዘመን ብተስፋ ዘቑርጽ ነገር ዓቕሉ ዝጸበቦ ዘመን እኳ እንተኾነ ኣብዚ ንኣና ዝኸበደና እዋን እግዚኣብሔር ዝሃበና ተስፋ ዝፍጽሞን ተስፍኡ ዘብዝሓልና ኣምላኽ ምዃኑ ግን ሓለፋ ኵሉ ሓጐስና እዩ። እግዚኣብሔር ንሓንቲ ነገር ይደልየና፡ ከም ኣብርሃም ምድራዊ ናብራና ኣብ ድንኳን ክኸውን ከምኡውን ተስፋና ኣብ ኣምላኽ ክንገብርን ይደሊ። እቲ ሰማያዊ ተስፋና ድማ ሓደ መዓልቲ ነዚ ምድራዊ ናብራ ክትክኦ እዩ (መዝ 33፡18፣ ኤር 17፡7፣ 1ጴጥ 1፡21)።

ኣስተንትን

1. ናብራኻ ኣብዛ ምድሪ እዚኣ ዘለኣለማዊ ኮይኑ'ዶ ይስምዓካ?

2. ዕላማ ምንባርካ ኣብዚ ምድሪ እንታይ እዩ?

ጸሎት፡- እግዚኣብሔር ኣቦ ኣብዛ ተስፋ ዝሰኣነት ሓላፊት ዓለም ዘይበርስን ዘለኣለማውን ዝዀነ ተስፋ ስለ ዝሃበና ነመስግን።

ይትባረክ እግዚኣብሔር ኣምላከ ኣበዊነ

መካነ-ህይወት